ସମ୍ବଲପୁର,୧୭।୧(ପ୍ରମୋଦ ବହିଦାର): ବରଗଡ଼଼ ଧନୁଯାତ୍ରା ଦେଖିବାକୁ ଆସି ନିଖୋଜ ହୋଇଥିବା ଯୁବତୀଙ୍କୁ ଜଙ୍ଗଲରୁ କ୍ଷତବିକ୍ଷତ ଅବସ୍ଥାରେ ଉଦ୍ଧାର କରାଯାଇଥିଲା। ଘଟଣାର ଅଭିଯୁକ୍ତଙ୍କୁ ତୁରନ୍ତ ଗିରଫ କରିବା ଦାବିରେ ବିଜେଡିର ଫ୍ୟାକ୍ଟ ଫାଇଣ୍ଡିଂ ଟିମ୍ ସମ୍ବଲପୁରରେ ଗୁରୁବାର ପହଞ୍ଚିଥିଲା। ରାଜ୍ୟ ବିଜୁ ମହିଳା ଜନତା ଦଳ ଅଧ୍ୟକ୍ଷା ସ୍ନେହାଙ୍ଗିନି ଛୁରିଆଙ୍କ ନେତୃତ୍ୱରେ ଏହି ଟିମ ଆଇଜିଙ୍କ କାର୍ଯ୍ୟାଳୟରେ ଧାରଣା ଦେଇଥିଲେ। ଆଇଜିଙ୍କୁ ସାକ୍ଷାତ୍ ପାଇଁ ସକାଳୁ ଟିମ୍ ପକ୍ଷରୁ ଖବର ଦିଆଯାଇଥିଲା। ମାତ୍ର ସେ ଆସିଲେ ନାହିଁ କି ତାଙ୍କ ଫୋନ କଲ ଗ୍ରହଣ କଲେ ନାହିଁ ବୋଲି କହିଛନ୍ତି ଛୁରିଆ। ଏଥିପୂର୍ବରୁ ଗୁରୁବାର ସକାଳେ ବିଜେଡି ସଭାପତି ନବୀନ ପଟ୍ଟନାୟକଙ୍କ ପରାମର୍ଶରେ ଫ୍ୟାକ୍ଟ ଫାଇଣ୍ଡିଂ ଟିମ ବରଗଡ଼଼ରୁ ଭିମସାର ଯାଇ ଚିକିତ୍ସାଧୀନ ପୀଡ଼ିତାଙ୍କ ସ୍ବାସ୍ଥ୍ୟବସ୍ଥା ପଚାରି ବୁଝିଥିଲେ। ପୀଡ଼ିତାଙ୍କ ପରିବାର ଲୋକଙ୍କ ସୂଚନା ଅନୁସାରେ ଯୁବତୀଙ୍କୁ ଅପହରଣ ପରେ ବଳାତ୍କାର କରାଯାଇ ଶାରୀରିକ ନିର୍ଯାତନା ଦିଆଯାଇଛି। ଏଭଳି ଏକ ସମ୍ବେଦନଶୀଳ ଘଟଣାକୁ ପୋଲିସ ଆଦୌ ଗୁରୁତ୍ୱପୂର୍ଣ୍ଣ ଦେଉନାହିଁ ବୋଲି ଛୁରିଆ ଅଭିଯୋଗ କରିଛନ୍ତି। ତେଣୁ ଯଥାଶୀଘ୍ର ଅଭିଯୁକ୍ତକୁ ଗିରଫ କରି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେ ଦାବି କରିଥିଲେ। ଅନ୍ୟଥା ଆଗାମୀ ଦିନରେ ବିଜେଡି ପକ୍ଷରୁ ଦୁର୍ବାର ଆନ୍ଦୋଳନ କରାଯିବ ବୋଲି ସେ ଚେତାବନୀ ଦେଇଛନ୍ତି। ମହିଳା ବିଜେଡି ଜିଲା ଅଧ୍ୟକ୍ଷା ବନ୍ଦିତା ମିଶ୍ର, ଜୋନାଲ ଅଧ୍ୟକ୍ଷା ସିପ୍ରା ମହାନ୍ତିଙ୍କ ତତ୍ତ୍ୱାବଧାନରେ ଯାଇଥିବା ଟିମ୍ରେ ଉଷା ପ୍ରଧାନ, ବରଗଡ଼଼ ଜିଲା ପରିଷଦ ଅଧ୍ୟକ୍ଷା ମାନିନୀ ଭୋଇ, ବରଗଡ଼଼ ଏନଏସି ଅଧ୍ୟକ୍ଷା କଳ୍ପନା ମାଝୀ, ପୁଷ୍ପା ଭୋଇ, କଳ୍ପନା ବେହେରା, ଶାନ୍ତିଲତା କର, ବୈଜନ୍ତି ପାଢୀ ପ୍ରମୁଖ ସାମିଲ ହୋଇଥିଲେ। ସୂଚନାଯୋଗ୍ୟ ଯେ, ବରଗଡ଼ ଧନୁଯାତ୍ରା ଦେଖିବାକୁ ଆସି ଗତ ୧୨ ତାରିଖରେ ନିଖୋଜ ହୋଇଥିଲେ ଉକ୍ତ ଯୁବତୀ। ଦୀର୍ଘ ୪୮ ଘଣ୍ଟା ପରେ ବରଗଡ଼ ନିକଟସ୍ଥ କୁର୍ଲା ଜଙ୍ଗଲରୁ ତାଙ୍କୁ ମୂମୁର୍ଷୁ ଅବସ୍ଥାରେ ଉଦ୍ଧାର କରାଯାଇଥିଲା। ଅପରପକ୍ଷରେ ଭିମସାର ନିର୍ଦ୍ଦେଶକ ଡା. ଭାବଗ୍ରାହୀ ରଥ କହିଛନ୍ତି ଯେ, ପୀଡ଼ିତାଙ୍କ ଚିକିତ୍ସା ଠିକ୍ ଭାବେ ଚାଲିଛି। ତାଙ୍କ ଶରୀରରେ ଘଟିଥିବା କ୍ଷତ ଗୁଡ଼ିକର ପ୍ଲାଷ୍ଟିକ ସର୍ଜରୀ କରାଯାଇଛି। ମାତ୍ର ତାଙ୍କ ମୁଣ୍ଡ ଖପୁରି ହାଡ଼ ଭାଙ୍ଗିଛି। ମାନସିକ ଭାବେ ସେ ସ୍ଥିର ହୋଇନାହାନ୍ତି। ତେଣୁ ତାଙ୍କ ବୟାନ ନିଆ ଯାଇ ପାରିନାହିଁ ବୋଲି କହିଛନ୍ତି ନିର୍ଦ୍ଦେଶକ ଡା. ରଥ।
