ନୂଆଦିଲ୍ଲୀ,୧।୧୧: ଭାରତରେ ଲୋକେ ଯେବେ ଗୁରୁବାର ରାତିରେ ଦୀପାବଳି ପାଳନ କରୁଥିଲେ ସେତେବେଳେ ଆମେରିକା ସେୟାର ମାର୍କେଟରେ ହ୍ରାସର ଝଡ଼ ସୃଷ୍ଟି ହୋଇଛି। ଫଳରେ ଡାଉଜୋନ୍ସ ଇଣ୍ଡଷ୍ଟ୍ରିଆଲ ଏଭରେଜ ୦.୯୦ ପ୍ରତିଶତ ହ୍ରାସ ହୋଇ ୪୧୭୬୩ ସ୍ତରରେ ବନ୍ଦ ହୋଇଛି। ସେହିପରି ଏସ ଆଣ୍ଡ ପି ୨.୭୬ ପ୍ରତିଶତ ହ୍ରାସ ସହ ୫୭୦୫ରେ ବନ୍ଦ ହୋଇଥିବା ବେଳେ ନାସଦାକରେ ୨.୭୬ ପ୍ରତିଶତର ବଡ଼ ହ୍ରାସ ଦେଖାଯାଇଛି। ଏହି ହ୍ରାସର ପ୍ରଭାବ ଆମେରିକୀୟ ଧନୀକଙ୍କ ଉପରେ ମଧ୍ୟ ପଡିଛି।
ଏଥିରେ ଷ୍ଟିଭ ବାଲମୋରଙ୍କୁ ୮.୩୫ ବିଲିୟନ ଡଲାରର ଝଟକା ଲାଗିଛି। ବ୍ଲୁମବର୍ଗ ବିଲେନିୟର ଇଣ୍ଡେକ୍ସର ୧୦ମ ସ୍ଥାନରେ ଥିବା ଏହି ଆମେରିକୀୟ ଧନୀକଙ୍କ ସମ୍ପତ୍ତି ହ୍ରାସ ପରେ ୧୪୨ ବିଲିୟନ ଡଲାରକୁ ପହଞ୍ଚି ଯାଇଛି। ସେହିପରି ମେଟା ସିଇଓ ମାର୍କ ଜୁକରବର୍ଗଙ୍କ ନେଟୱର୍ଥ ୮.୩୪ ବିଲିୟନ ଡଲାର ହ୍ରାସ ହୋଇ ୨୦୧ ବିଲିୟନ ଡଲାର ହୋଇଯାଇଛି। ତେବେ ଏହି ହ୍ରାସ ଯୋଗୁ ଜୁକରବର୍ଗଙ୍କ ର଼୍ୟାଙ୍କିଙ୍ଗ ଉପରେ ପ୍ରଭାବ ପଡି ନାହିଁ। ଜୁକର ବର୍ଗ ଏବେବି ବିଶ୍ୱର ତୃତୀୟ ଧନଶାଳୀ ବ୍ୟକ୍ତି ଅଛନ୍ତି।
ଟେକ ସେୟାରରେ ହ୍ରାସର ପ୍ରଭାବ ଆମାଜନ ମାଲିକ ଜେଫ ବେଜୋସଙ୍କ ଉପରେ ପଡିଛି। ତାଙ୍କ ମୋଟ ସମ୍ପତ୍ତିରେ ୬.୧୨ବିଲିୟନ ଡଲାର ହ୍ରାସ ହୋଇ ୨୦୯ ବିଲିୟନ ଡଲାର ହୋଇଯାଇଛି। ବେଜୋସ ବିଶ୍ୱର ଦ୍ୱିତୀୟ ଧନିକ ଭାବେ ପରିଚିତ। ଗୁରୁବର ଟପ ଲୁଜର୍ସଙ୍କ ସୂଚୀର ଚତୁର୍ଥ ସ୍ଥାନରେ ଲ୍ୟାରୀ ଏଲିସନ ଅଛନ୍ତି। ତାଙ୍କ ମୋଟ ସମ୍ପତ୍ତିରେ ୬.୧୧ ବିଲିୟନ ଡଲାର ହ୍ରାସ ହୋଇଛି। ଫଳରେ ତାଙ୍କର ମୋଟ ନେଟୱର୍ଥ ୧୮୧ ବିଲିୟନ ଡଲାର ହୋଇଯାଇଛି।
ଏଥିରେ ବିଶ୍ୱର ଏକ ନମ୍ବର ଧନୀକ ଟେସଲା ସିଇଓଙ୍କ ସମ୍ପତ୍ତିରେ ୫.୬୧ ବିଲିୟନ ଡଲାର ହ୍ରାସ ହୋଇଥିବା ବେଳେ ବିପୁଳ କ୍ଷତିର ସମ୍ମୁଖୀନ ହୋଇଛନ୍ତି। ଆମେରିକୀୟ ଷ୍ଟକ ଏକ୍ସଚେଞ୍ଜରେ ହୋଇଥିବା ହ୍ରାସର ପ୍ରଭାବରୁ ଭାରତୀୟ ଧନୀକମାନେ ମଧ୍ୟ ବାଦ ପଡି ନାହାନ୍ତି। ଯଦି ଏଥିରେ ଭାରତର କଥା କୁହାଯାଏ ଦୀପାବଳି ଦିନ ଭାରତୀୟ ସେୟାର ବଜାରରେ ମଧ୍ୟ ହ୍ରାସ ଦେଖାଯାଇଛି। ଫଳରେ ଗୌତମ ଆଦାନୀଙ୍କ ସମ୍ପତ୍ତିରେ ୬୦୦ ମିଲିୟନ ଡଲାରର ହ୍ରାସ ହୋଇଛି। ଏବେ ଆଦାନୀ ଧନିକଙ୍କ ସୂଚୀରେ ୯୩.୫ ବିଲିୟନ ଡଲାର ନେଟୱର୍ଥ ସହିତ ଅଷ୍ଟାଦଶ ସ୍ଥାନରେ ଅଛନ୍ତି। ଏଥିରେ ମୁକେଶ ଅମ୍ବାନୀ ୭୨୫ ମିଲିୟନ ଡଲାର ହରାଇ ୧୦୧ ବିଲିୟନ ଡଲାର ସହିତ ଧନୀକଙ୍କ ସୂଚୀର ୧୭ତମ ସ୍ଥାନରେ ଅଛନ୍ତି।
