ନନ୍ଦପୁର,୬।୩(ତୁଷାର କାନ୍ତ ମହାନ୍ତି): ନନ୍ଦପୁର ବ୍ଲକରେ ସଡ଼କ ଦୁର୍ଘଟଣା । କୋରାପୁଟ ଜିଲା ନନ୍ଦପୁର ବ୍ଲକ ସଦର ମହକୁମା ସ୍ଥିତ ବୁଧବାର ସାପ୍ତାହିକ ହାଟର ମୋଡରେ ପୂର୍ତ୍ତବିଭାଗ ତରଫରୁ ନିର୍ମାଣଧିନ ଡ୍ରେନ ଓ କଲଭର୍ଟ ତଳକୁ ଏକ ବାଇକ୍ ଓଡି୧୦ ୟୁ ୧୨୭୫ ଖସି ପଡିଛି । ଦୁର୍ଘଟଣାରେ ବୈପାରିଗୁଡ଼ା ବ୍ଲକ ମାଳୀଗୁଡ଼ା ଗ୍ରାମର ଦୁଇଜଣ ବଳରାମ ମାଳି (୨୦) ଓ ତିଳକ ମାଳି (୨୨) ଗୁରୁତର ହୋଇଛନ୍ତି । ସୂଚନା ପାଇ ନିଜେ ନନ୍ଦପୁର ଥାନାଧିକାରୀ ତ୍ରିନାଥ ତୋଟାପାଡିଆ ଘଟଣା ସ୍ଥଳରେ ପହଞ୍ଚି ୨ ଜଣଙ୍କୁ ଉଦ୍ଧାର କରି ନନ୍ଦପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଛନ୍ତି ।
ଉପସ୍ଥିତ ଡାକ୍ତର ଦୁହିଁଙ୍କ ଅବସ୍ଥା ଗୁରୁତର ଥିବାରୁ ସେମାନଙ୍କୁ କୋରାପୁଟ ସହିଦ ଲକ୍ଷ୍ମଣ ନାୟକ ଭେଷଜ ମହାବିଦ୍ୟାଳୟ ଓ ଚିକିତ୍ସାଳୟ ସ୍ଥାନାନ୍ତର କରିଛନ୍ତି । ଦୁର୍ଘଟଣାରେ ବଳରାମ ମାଳିଙ୍କ ବାମ ଗୋଡ ଭାଙ୍ଗି ଯାଇଛି । ତିଳକ ମାଳିଙ୍କ ଅଣ୍ଟାରେ ମାଡ ହେବା ସହ ଡ୍ରେନ ନିର୍ମାଣ ପାଇଁ ବିଛା ଯାଇଥିବା ଲୁହା ରଡ଼ର ଆଘାତ ହୋଇଛି। ପ୍ରାଥମିକ ତଦନ୍ତରୁ ଦୁହେଁ ମାଳିଗୁଡା ଗ୍ରାମରୁ ବନମାଳୀପୁଟ ଗ୍ରାମକୁ ଏକ ବିବାହ ଭୋଜିରେ ସାମିଲ ହେବାକୁ ଆସିଥିଲେ। ଭୋଜି ଖାଇ ସାତସମୀଳି ଗ୍ରାମରେ ଥିବା ଅନ୍ୟ ସମ୍ପର୍କୀୟଙ୍କ ଘରକୁ ଯାଉଥିଲେ ବୋଲି ସୂଚନା ମିଳିଛି । ନନ୍ଦପୁର ପୋଲିସ ପରିବାର ଲୋକଙ୍କୁ ସୂଚନା ଦେଇ ଘଟଣାର ତଦନ୍ତ କରୁଛି । ପରିବାର ତରଫରୁ ଦୁର୍ଘଟଣା ଗ୍ରସ୍ତ ଦୁଇଜଣଙ୍କୁ ଉଦ୍ଧାର କରି ଚିକିତ୍ସା ପାଇଁ ଡାକ୍ତରଖାନା ନେଇଥିବା ଥାନାଧିକାରୀଙ୍କୁ କୃତଜ୍ଞତା ଜଣାଇଛନ୍ତି ।