ନୂଆଦିଲ୍ଲୀ,୧୩।୯: ସରକାରୀ ଚାକିରି ସ୍ବପ୍ନ ଦେଖୁଥିବା ଯୁବପିଢିଙ୍କ ପାଇଁ ବଡ଼ ଖବର। ବଡ଼ ନିଯୁକ୍ତି ସୁଯୋଗ ଆଣିଛି ଭାରତୀୟ ଷ୍ଟେଟ ବ୍ୟାଙ୍କ (SBI) । SBI ଜୁନିୟର ଆସୋସିଏଟ (କ୍ଲର୍କ) ପଦବୀ ପାଇଁ ୬,୫୮୯ଟି ପଦବୀ ପୂରଣ କରିବାକୁ ଯାଉଛି, ଯାହା ଦେଶର ସବୁଠାରୁ ବଡ଼ ସରକାରୀ ବ୍ୟାଙ୍କରେ କାର୍ଯ୍ୟ କରିବାର ଏକ ସୁବର୍ଣ୍ଣ ଅବସର। ଏହି ଭର୍ତ୍ତି ପରୀକ୍ଷାର ପ୍ରାରମ୍ଭିକ ପର୍ଯ୍ୟାୟ ୨୦, ୨୧ ଏବଂ ୨୭ ସେପ୍ଟେମ୍ବର ୨୦୨୫ରେ ଦେଶର ବିଭିନ୍ନ ପରୀକ୍ଷା କେନ୍ଦ୍ରରେ ଅନୁଷ୍ଠିତ ହେବ।
SBI ଜୁନିୟର ଆସୋସିଏଟ ଭର୍ତ୍ତି ତିନୋଟି ପର୍ଯ୍ୟାୟରେ ଅନୁଷ୍ଠିତ ହେବ: ପ୍ରାରମ୍ଭିକ ପରୀକ୍ଷା, ମୁଖ୍ୟ ପରୀକ୍ଷା ଏବଂ ସ୍ଥାନୀୟ ଭାଷା ପରୀକ୍ଷା (LLPT)। ପ୍ରାରମ୍ଭିକ ପରୀକ୍ଷାରେ ୧୦୦ ନମ୍ବରର ୧୦୦ଟି ପ୍ରଶ୍ନ ରହିବ, ଯେଉଁଥିରେ ଇଂରାଜୀ ଭାଷା, ସାଂଖ୍ୟିକ ଦକ୍ଷତା ଏବଂ ତାର୍କିକ କ୍ଷମତା ଉପରେ ପ୍ରଶ୍ନ ରହିବ। ଏହି ପରୀକ୍ଷା ଅନଲାଇନ ହେବ ଏବଂ ପ୍ରତ୍ୟେକ ବିଭାଗ ପାଇଁ ର୍ନିଦ୍ଦିଷ୍ଟ ସମୟ ର୍ନିଦ୍ଧାରଣ କରାଯାଇଛି। ତେଣୁ, ସମୟ ପରିଚାଳନା ଏହି ପରୀକ୍ଷାରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ।
ଏଡମିଟ କାର୍ଡ ଏବଂ ପ୍ରସ୍ତୁତିର ଶେଷ ପର୍ଯ୍ୟାୟ
ପରୀକ୍ଷାର ଏଡମିଟ କାର୍ଡ ସେପ୍ଟେମ୍ବର ୧୫ ପରେ ଯେ କୌଣସି ସମୟରେ SBIର ଅଫିସିଆଲ ୱେବସାଇଟ www.sbi.co.inରେ ଉପଲବ୍ଧ ହେବ। ପ୍ରାର୍ଥୀମାନେ ନିଜର ରେଜିଷ୍ଟ୍ରେସନ ନମ୍ବର ଏବଂ ଜନ୍ମ ତାରିଖ ବ୍ୟବହାର କରି ଏହାକୁ ଡାଉନଲୋଡ କରିପାରିବେ। ଏଡମିଟ କାର୍ଡ ବିନା ପରୀକ୍ଷା କେନ୍ଦ୍ରରେ ପ୍ରବେଶ ଅନୁମତି ମିଳିବ ନାହିଁ, ତେଣୁ ଏହାର ଏକ ହାର୍ଡ କପି ସାଙ୍ଗରେ ରଖନ୍ତୁ।
ଶେଷ ପର୍ଯ୍ୟାୟରେ ପ୍ରସ୍ତୁତି ପାଇଁ, ପ୍ରାର୍ଥୀମାନେ ପରୀକ୍ଷା କେନ୍ଦ୍ରର ସ୍ଥାନ ଏବଂ ରିପୋର୍ଟିଂ ସମୟ ଆଗରୁ ଯାଞ୍ଚ କରି ନିଅନ୍ତୁ। ପରୀକ୍ଷା ଦିନ ମାନସିକ ଏବଂ ଶାରୀରିକ ଭାବେ ସୁସ୍ଥ ରହିବା ପାଇଁ ପର୍ଯ୍ୟାପ୍ତ ନିଦ୍ରା ଏବଂ ହାଲୁକା ଖାଦ୍ୟ ଗ୍ରହଣ କରନ୍ତୁ।
ଯୋଗ୍ୟତା ଏବଂ ଆବେଦନ ପ୍ରକ୍ରିୟା
ଏହି ଭର୍ତ୍ତି ପାଇଁ ଯୋଗ୍ୟତା ହେଉଛି ଯେ କୌଣସି ସୱୀକୃତ ବିଶ୍ୱବିଦ୍ୟାଳୟରୁ ସ୍ନାତକ ଡିଗ୍ରୀ, ଏବଂ ବୟସ ୨୦ରୁ ୨୮ ବର୍ଷ ମଧ୍ୟରେ ହେବା ଆବଶ୍ୟକ। ସଂରକ୍ଷିତ ଶ୍ରେଣୀ ପାଇଁ ବୟସ ସୀମାରେ ଛାଡ଼ ରହିଛି: OBC ପାଇଁ ୩ ବର୍ଷ, SC/ST ପାଇଁ ୫ ବର୍ଷ ଏବଂ ଦିବ୍ୟାଙ୍ଗମାନଙ୍କ ପାଇଁ ୧୦ ବର୍ଷ। ଆବେଦନ ପ୍ରକ୍ରିୟା ୬ ଅଗଷ୍ଟରୁ ୨୬ ଅଗଷ୍ଟ ୨୦୨୫ ମଧ୍ୟରେ ସମାପ୍ତ ହୋଇଛି, ଯେଉଁଥିରେ ଜେନେରାଲ, OBC ଏବଂ EWS ଶ୍ରେଣୀ ପାଇଁ ୭୫୦ ଟଙ୍କା ଏବଂ SC/ST/ଦିବ୍ୟାଙ୍ଗ ଶ୍ରେଣୀ ପାଇଁ କୌଣସି ଆବେଦନ ଶୁଳ୍କ ନାହିଁ।
