ଭୁବନେଶ୍ୱର,୧୨।୭: ମୁଣ୍ଡରେ ନାଲି ଗାମୁଛା, ଦେହରେ ମାଟିଆ ପୋଷାକ। ଘର ଆଠମଲ୍ଲିକ। ରାଜ୍ୟ ରାଜନୀତିକୁ ହୁଲସ୍ତୁଲ କରୁଛନ୍ତି ଏହି ନେତା। ଏହି ନେତାଜଣକ ୪ଦିନ ଧରି ରାଜ୍ୟରେ ଡ୍ରାଇଭର ସଂଘ ଆନ୍ଦୋଳନକୁ ଆଗକୁ ବଢାଉଛନ୍ତି। ବଡ଼ବଡ଼ ନେତାଙ୍କ ଠାରୁ ମନ୍ତ୍ରୀ ଯାଏ ଓଡ଼ିଶା ଡ୍ରାଇଭର ମହାସଂଘର ସଭାପତି ପ୍ରଶାନ୍ତ ମେଣ୍ଡୁଲିଙ୍କୁ ବୁଝାଇବା ପାଇଁ ଫୋନ କରୁଛନ୍ତି। ତେବେ ସତରେ କ’ଣ ଜଣେ ବ୍ୟକ୍ତି ଏତେ ପାଓ୍ବାରଫୁଲ୍ ହୋଇପାରେ? ଯିଏ ୪ଦିନ ଧରି ରାଜ୍ୟ ରାଜନୀତିକୁ ସରଗରମ କରି ରଖିଛନ୍ତି।
ପ୍ରଶାନ୍ତ ମେଣ୍ଡୁଲି। ଗତକାଲି ଡ୍ରାଇଭର ସଂଘର ତାଙ୍କ ଉପରେ ରାଗିଯାଇ ତାଙ୍କ ବିରୋଧରେ ଏତଲା ଦାୟର କରିଛନ୍ତି। ସାରା ରାଜ୍ୟରେ ଚକାଜାମ୍ କରି ସେ ସରକାରଙ୍କ ଉପରେ ଚାପ ପକାଉଛନ୍ତି। ଜୁଲାଇ ୭ରୁ ସାରା ରାଜ୍ୟରେ ଆନ୍ଦୋଳନ ଆରମ୍ଭ କରିଛନ୍ତି। ୭ଦଫା ଦାବିରେ ସେ ସରକାରଙ୍କ ନିକଟରେ ଅଡି ବସିଛନ୍ତି। ସରକାରଙ୍କ ଠାରୁ ଆରମ୍ଭ କରି ମନ୍ତ୍ରୀ କି ବିଧାୟକ ତାଙ୍କ ସହ କଥା ହେଲେ ମଧ୍ୟ ସେ ଅଡି ବସିଛନ୍ତି। ୪ଦିନ ଧରି ରାଜ୍ୟକୁ ଅଚଳ କରି ରଖିଥିବାବେଳେ ଯେତେବେଳେ ଭୁବନେଶ୍ୱରକୁ କଂଗ୍ରେସ ନେତା ରାହୁଲ ଗାନ୍ଧୀ ଆସିଲେ ସେ ତାଙ୍କ ପାଇଁ ଆନ୍ଦୋଳନ କୋହଳ କରିଦେଇଥିଲେ। ଯାହାପରେ ରାଜନୀତି ଜୋର୍ ଧରିଛି। ରାହୁଲ କାଲି ସମାବେଶରେ ତାଙ୍କୁ ସମର୍ଥନ ଦେବା ନେଇ ମଧ୍ୟ ଘୋଷଣା କରିଛନ୍ତି।
କିନ୍ତୁ ସମସ୍ତଙ୍କ ମନରେ ସେହି ଗୋଟିଏ ପ୍ରଶ୍ନ। ମେଣ୍ଡୁଲି କ’ଣ ଏହି ଆନ୍ଦୋଳନ କରିବାର କ୍ଷମତା ରଖିଛନ୍ତି? ନା ତାଙ୍କ ପଛରେ ଆଉ କିଏ ଅଛି ଯିଏ ତାଙ୍କୁ ବଳ ଯୋଗାଉଛି। ଯେତେବେଳେ କଗ୍ରେଂସର ଆନ୍ଦୋଳନ ହେଉଛି ସେତେବେଳେ ଭକ୍ତ ଦାସ, ରମେଶ ଜେନା ଓ ତାରା, ମେଣ୍ଡୁଲିଙ୍କୁ ଫୋନ କରୁଛନ୍ତି। ଏହି ସମୟରେ ସେ ଅନୁରୋଧ ରକ୍ଷା କରି ଆନ୍ଦୋଳନ କୋହଳ ବି କରୁଛନ୍ତି। ଯାହାପରେ ଭାଜପା ଅଭିଯୋଗ ଆଣିଛି ଯେ, ମେଣ୍ଡୁଲି କଂଗ୍ରେସ ପାଇଁ କାମ କରୁଛନ୍ତି।
ସେପଟେ କଂଗ୍ରେସ ଅଭିିଯୋଗ ଆଣିଛି ଯେ, ରାହୁଲ ଭୁବନେଶ୍ୱର ଆସିବାକୁ ଥିବାରୁ ଭାଜପା ଜାଣିଶୁଣି ଆନ୍ଦୋଳନକୁ ଜାରି ରଖୁଛି। ତେବେ ଏହିସବୁ ଅଭିଯୋଗକୁ ସିଧାସିଧା ଖଣ୍ଡନ କରିଛନ୍ତି ମେଣ୍ଡୁଲି। ସେ କହିଛନ୍ତି, ମୁଁ ନିଜ ବେସ୍ ନିଜେ ବନେଇଛି। ରାଜ୍ୟରେ ନେତୃତ୍ୱ ନେବା ଏତେ ସହଜ ନୁହେଁ। ମୁଁ ନିଜ ଦମ୍ରେ ଏତେବଡ଼ ଡ୍ରାଇଭର ସଂଘର ନେତା ହୋଇଛି। ମୋ କଥାରେ ପୂରା ସଂଘ ପରିଚାଳିତ ହୁଏ। ତେବେ ଏସବୁକୁ ନେଇ ମଧ୍ୟ ଆଲୋଚନା ହେଉଛି କି, ପୂରା ଡ୍ରାଇଭର ସଂଘକୁ ନେଇ ମେଣ୍ଡୁଲିଙ୍କ ଏତେ ଦକ୍ଷତା ନା ପଛରେ କାହାର ଶକ୍ତି ରହିଛି? ଏହାରି ଭିତରେ ମୁହଁ ଖୋଲିଛନ୍ତି ପ୍ରଶାନ୍ତ ମେଣ୍ଡୁଲି।
ଓଡ଼ିଶା ଡ୍ରାଇଭର ମହାସଂଘରେ ଅଭ୍ୟନ୍ତରୀଣ ବିବାଦ ଏବେ ଚର୍ଚ୍ଚାର ବିଷୟ ହୋଇଛି। ସଂଘର ସଭାପତି ପ୍ରଶାନ୍ତ ମେଣ୍ଡୁଲିଙ୍କ ନେତୃତ୍ୱକୁ ନେଇ ଅନେକ ଡ୍ରାଇଭର ଅସନ୍ତୋଷ ପ୍ରକାଶ କରିଥିବା ବେଳେ, ଏହି ବିବାଦ ଏକ ନୂଆ ମୋଡ଼ ନେଇଛି। ମେଣ୍ଡୁଲିଙ୍କ ବିରୋଧରେ ମିନି ଟ୍ରକ ମାଲିକ ସଂଘ ଭୁବନେଶ୍ୱର ମଞ୍ଚେଶ୍ୱର ଥାନାରେ ଏକ ଅଭିଯୋଗ ଦାୟର କରିଛନ୍ତି, ଯେଉଁଥିରେ ସେ ଅଗଣତାନ୍ତ୍ରିକ ପଦ୍ଧତିରେ ହକ ମାଗୁଥିବା ଏବଂ ଡ୍ରାଇଭର ଓ ମାଲିକମାନଙ୍କୁ ଅପମାନିତ କରୁଥିବା ଅଭିଯୋଗ ହୋଇଛି।
ଏହି ଘଟଣାକୁ ନେଇ ପ୍ରଶାନ୍ତ ମେଣ୍ଡୁଲି କାନ୍ଦ କାନ୍ଦି ଭିଡିଓ ଜାରି କରିଛନ୍ତି। ସେ କହିଛନ୍ତି, ଡ୍ରାଇଭର୍ ଭାଇମାନେ ବିଚାର କରନ୍ତୁ, ଏ ସମୟ ଆଉ ପାଇବନି। ଯେଉଁ ଭାଇମାନେ ମାଲିକଙ୍କୁ ଚାହୁଁଛନ୍ତି, ମହାସଂଘ ଛାଡ଼ି ଦିଅନ୍ତୁ। ଯେଉଁ ଭାଇମାନେ ଗାଡ଼ି ଚଲାଇବେ ସମସ୍ତଙ୍କ ଫଟୋ ଉଠାଯିବ। ଯେଉଁମାନେ ସଂଘକୁ ପଇସା ଦେଇଛନ୍ତି ତାକୁ ବି ଫେରେଇ ଦେବୁ। ଟଙ୍କା ଫେରେଇ ଦେବୁ କିନ୍ତୁ ସଦସ୍ୟ ଭାବେ ରଖିବୁ ନାହିଁ। ଭାଇମାନେ ଧର୍ଯ୍ୟ ରଖନ୍ତୁ, ଆମକୁ କେହି କିଛି କରିପାରିବେ ନାହିଁ। ଏକ ରହେଙ୍ଗେ ତୋ ସବ ସେଫ ରହେଙ୍ଗେ।
