ଓ୍ବାଶିଂଟନ,୮ା୬: ରୁଷିଆ-ୟୁକ୍ରେନ ଯୁଦ୍ଧ ମଧ୍ୟରେ ଆମେରିକାର ରାଷ୍ଟ୍ରପତି ଜୋ ବାଇଡେନ ଚଳିତମାସ ୨୫ ତାରିଖରେ ଦକ୍ଷିଣ ଜର୍ମାନୀର ସ୍କଲ୍ସ ଏଲମାଉ ଯାତ୍ରା କରିବେ। ଏଠାରେ ବରିଷ୍ଠ ନେତାଙ୍କ ସହ ଜି-୭ ଶିଖର ସମ୍ମିଳନୀରେ ଯୋଗଦେବେ। ହ୍ବାଇଟ୍ ହାଉସର ପ୍ରେସ୍ ସଚିବ କରିନ ଜିଆନ ଏକ ବିବୃତ୍ତିରେ ଏହି ସୂଚନା ଦେଇଛନ୍ତି।
ଏହି ବିବୃତ୍ତିରେ ଆହୁରି ମଧ୍ୟ କୁହାଯାଇଛି ଯେ, ବାଇଡେନ କରୋନା ମହାମାରୀ ସମୟରେ ବିଶ୍ୱ ସ୍ବାସ୍ଥ୍ୟ ସୁରକ୍ଷା, ରୁଷିଆର ଯୁଦ୍ଧ ଯୋଗୁ ସୃଷ୍ଟି ହୋଇଥିବା ଖାଦ୍ୟ ଏବଂ ଶକ୍ତି ସଙ୍କଟ ଉପରେ ମଧ୍ୟ ଆଲୋଚନା କରିବେ।
ଅନ୍ୟପକ୍ଷରେ ୨୦୨୨ ନାଟୋ ଶିଖର ସମ୍ମିଳନୀ ପାଇଁ ବାଇଡେନ ଜୁନ୍ ୨୮ରେ ସ୍ପେନର ମାଡ୍ରିଡ ଯାତ୍ରା କରିବେ। ଯେଉଁଠାରେ ସହଯୋଗୀ ନେତାମାନଙ୍କ ସହ ଆଗାମୀ ଏକ ଦଶନ୍ଧି ମଧ୍ୟରେ ନାଟୋର ପରିବର୍ତ୍ତନ ନେଇ ମାର୍ଗଦର୍ଶନ କରିବେ। ଫିନ୍ଲ୍ୟାଣ୍ଡ ଏବଂ ସ୍ବିଡେନ ଆମେରିକାର ନେତୃତ୍ୱରେ ୩୦ଟି ଦେଶର ସାମରିକ ସଙ୍ଗଠନ ନାଟୋରେ ଯୋଗଦେବା ପାଇଁ ଆବେଦନ କରିଥିବାବେଳେ ତୁର୍କୀ ସେମାନଙ୍କ ସଦସ୍ୟତାରେ ବାଧା ସୃଷ୍ଟି କରୁଛି। ତେବେ ଆମେରିକା ସମେତ ୟୁରୋପର ଅନେକ ଦେଶ ଫିନଲ୍ୟାଣ୍ଡ ଏବଂ ସ୍ବିଡେନର ସଦସ୍ୟତା ସପକ୍ଷରେ ଅଛନ୍ତି। ଏହା ମାଧ୍ୟମରେ ରୁଷିଆକୁ ଘେରି ରହିବା ସହଜ ହେବ
