ଓ୍ବାଶିଂଟନ/ମସ୍କୋ,୯।୩ : ୟୁକ୍ରେନକୁ ପୁଣି ଏକ ବଡ ଝଟକା ମିଳିଛି। ପୋଲାଣ୍ଡର ୨୮ ମିଗ -୨୯ ଯୁଦ୍ଧ ବିମାନ ଯୋଗାଇବା ପ୍ରସ୍ତାବକୁ ଆମେରିକା ପ୍ରତ୍ୟାଖ୍ୟାନ କରିଛି। ପୋଲାଣ୍ଡର ମିଗ-୨୯ ଯୁଦ୍ଧ ବିମାନକୁ ଜର୍ମାନୀର ଆମେରିକାର ବାୟୁସେନା ବେସକୁ ସ୍ଥାନାନ୍ତର କରିବାକୁ ଆମେରିକାର ପ୍ରତିରକ୍ଷା ମନ୍ତ୍ରଣାଳୟ ଏକ ପ୍ରସ୍ତାବକୁ ପ୍ରତ୍ୟାଖ୍ୟାନ କରିଛି।
ୟୁକ୍ରେନ ଏବଂ ରୁଷିଆ ମଧ୍ୟରେ ପ୍ରବଳ ଯୁଦ୍ଧ ଚାଲିଥିବା ସମୟରେ ଆମେରିକାର ରାଷ୍ଟ୍ରପତି ଜୋ ବାଇଡେନ୍ ଏହି ଗୁରୁତ୍ୱପୂର୍ଣ୍ଣ ପ୍ରସ୍ତାବକୁ ପ୍ରତ୍ୟାଖ୍ୟାନ କରିଛନ୍ତି। ରୁଷିଆ ରାଷ୍ଟ୍ରପତି ବ୍ଲାଡିମୀର ପୁଟିନ୍ଙ୍କ ଭୟରେ ବାଇଡେନ୍ ପଛଘୁଞ୍ଚା ଦେଇଥିବା ଅନ୍ତର୍ଜାତୀୟସ୍ତରରେ ଚର୍ଚ୍ଚା ହେଉଛି।
ରୁଷିଆ ସୈନ୍ୟ ୟୁକ୍ରେନ୍ ରାଜଧାନୀ କ୍ୱିଭ୍କୁ ଘେରି ରହିଛନ୍ତି। ରାଜଧାନୀଠାରୁ ମାତ୍ର କିଛି କିଲୋମିଟର ଦୂରରେ ସେମାନେ ଅଛନ୍ତି। ରୁଷିଆର ମୁକାବିଲା ପାଇଁ ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କି ପାଶ୍ଚାତ୍ୟ ଦେଶଗୁଡିକୁ ଯୁଦ୍ଧ ବିମାନ ଯୋଗାଇବା ପାଇଁ ନିରନ୍ତର ନିବେଦନ କରୁଛନ୍ତି।
ପେଣ୍ଟାଗନ ମୁଖପାତ୍ର ଜନ କିର୍ବି ମଙ୍ଗଳବାର ଏକ ବିବୃତ୍ତିରେ କହିଛନ୍ତି ଯେ ପୋଲାଣ୍ଡର ପ୍ରସ୍ତାବକୁ ଗ୍ରହଣ କରିବାରେ ଆମେରିକା ଅସମର୍ଥ। ଏହି ଯୁଦ୍ଧ ବିମାନଗୁଡ଼ିକୁ ଆମେରିକାର ରାମଷ୍ଟାନ ଏୟାରବେସକୁ ସ୍ଥାନାନ୍ତର କରିବାକୁ ପୋଲାଣ୍ଡ ପ୍ରସ୍ତାବ ଦେଇଥିଲା। ଏହା ପରେ, ସେଠାରୁ ସେଗୁଡ଼ିକୁୁ ରୁଷିଆ ବିରୁଦ୍ଧରେ ୟୁକ୍ରେନକୁ ସାହାଯ୍ୟ କରିବାକୁ ପଠାଯିବା ଉଚିତ ବୋଲି ପୋଲାଣ୍ଡ କହିଥିଲା।
କିର୍ବି କହିଛନ୍ତି ଯେ ଯଦି ଏହି ବିମାନଗୁଡିକ ଜର୍ମାନୀରୁ ୟୁକ୍ରେନର ଯୁଦ୍ଧ ଅଞ୍ଚଳକୁ ପଠାଯାଏ, ତେବେ ଏହା ସମଗ୍ର ନାଟୋ ସହଯୋଗୀ ଦଳ ପାଇଁ ଚିନ୍ତାର ବିଷୟ ହେବ।
ଆମେରିକାର ଅନ୍ୟ ଜଣେ ବୈଦେଶିକ ବ୍ୟାପାର ଅଧିକାରୀ ଭିକ୍ଟୋରିଆ ନୁଲାଣ୍ଡ କହିଛନ୍ତି ଯେ ଏହି ପ୍ରସ୍ତାବ ଦେବା ପୂର୍ବରୁ ପୋଲାଣ୍ଡ ଆମେରିକାର ପରାମର୍ଶ ନେଇ ନାହିଁ।
