ଓ୍ବାଶିଂଟନ/ମସ୍କୋ/ବେଜିଂ/ପୋଙ୍ଗୟାଙ୍ଗ, ୩୧।୫ : ଆମେରିକା ରାଷ୍ଟ୍ରପତି ଜୋ ବାଇଡେନ୍, ଚାଇନା ଏବଂ ରୁଷିଆ ପ୍ରତିପକ୍ଷ ଶି ଜିନପିଙ୍ଗ୍ ଏବଂ ଭ୍ଲାଦିମିର ପୁଟିନଙ୍କ ସ୍ବାସ୍ଥ୍ୟାବସ୍ଥା ନେଇ ଅନ୍ତର୍ଜାତୀୟସ୍ତରରେ ନାନା କଳ୍ପନାଜଳ୍ପନା ଜାରି ରହିଛି।
୭୯ ବର୍ଷିୟ ଆମେରିକାର ରାଷ୍ଟ୍ରପତି ଜୋ ବାଇଡେନ ବାର୍ଦ୍ଧକ୍ୟ ଜନିତ ରୋଗରେ ଘେରି ରହିଛନ୍ତି। କେତେକ ରିପୋର୍ଟରେ ତାଙ୍କୁ ଡିମେନ୍ସିଆର ରୋଗୀ ବୋଲି ବର୍ଣ୍ଣନା କରାଯାଇଛି। ୧୯୮୮ ରେ ବାଇଡେନଙ୍କର କେତେକ ମସ୍ତିଷ୍କ ସମସ୍ୟା ମଧ୍ୟ ରହିଥିଲା, ଯେଉଁଥିପାଇଁ ସେ ଚିକିତ୍ସିତ ହୋଇଥିଲେ। ଏହା ତାଙ୍କଠାରେ ପୁନର୍ବାର ଘଟିବାର ମାତ୍ର ୨୦ ପ୍ରତିଶତ ସମ୍ଭାବନା ଅଛି। ବାଇଡେନଙ୍କ ଗଲ ବ୍ଲାଡର ମଧ୍ୟ ବାହାର କରାଯାଇଛି।
୬୯ ବର୍ଷ ବୟସ୍କ ପୁଟିନଙ୍କ ସ୍ବାସ୍ଥ୍ୟ ଗୁରୁତର ଥିବା ନେଇ ଗୁପ୍ତ ସୂଚନା ମିଳିଛି। କେତେକ ରିପୋର୍ଟରେ ତାଙ୍କୁ ଥାଇରଏଡ କର୍କଟ ରୋଗ ହୋଇଥିବାର କୁହାଯାଇଛି। କେତେକ ରିପୋର୍ଟରେ ସେ ପାର୍କିନ୍ସନ ରୋଗରେ ପୀଡିତ ଥିବା ମଧ୍ୟ କୁହାଯାଉଛି। ନିକଟରେ ପୁଟିନଙ୍କ ଦୁଇଟି ଭିଡିଓ ଭାଇରାଲ ହୋଇଛି। ପ୍ରଥମ ଭିଡିଓ ହେଉଛି ବେଲାରୁଷର ରାଷ୍ଟ୍ରପତି ଆଲେକ୍ସଜାଣ୍ଡାର୍ ଲୁକାଶେଙ୍କୋ ହାତ ଉଠାଇ ସ୍ବାଗତ କରୁଛନ୍ତି। ଭିଡିଓରେ ଲୁକାଶେଙ୍କୋଙ୍କୁ ଅପେକ୍ଷା କରିଥିବା ପୁଟିନଙ୍କ ହାତ କମ୍ପିବାରେ ଲାଗୁଥିବାର ଦେଖିବାକୁ ମିଳୁଛି। କମ୍ପିବା ବନ୍ଦ କରିବା ପାଇଁ, ସେ ତାଙ୍କ ଛାତିରେ ହାତ ରଖିଥିବାର ମଧ୍ୟ ଦେଖାଯାଉଛି। ଏହାପୂର୍ବରୁ, ୧୨ ମିନିଟର ଏକ ଭିଡିଓରେ ପୁଟିନ ରୁଷିର ପ୍ରତିରକ୍ଷା ମନ୍ତ୍ରୀ ସରୋଜ ଶୋଏଗୁଙ୍କ ସହ ସାକ୍ଷାତ ସମୟରେ ଟେବୁଲର ଏକ କୋଣ ଧରି କ୍ରମାଗତ ଭାବରେ ବସିଥିବାର ନଜର ଆସିଥିଲେ। ଏହି ସମୟରେ, ତାଙ୍କ ଡାହାଣ ହାତର ଆଙ୍ଗୁଠି ଏବଂ ପାଦ ଥରୁୁଥିଲା।
୬୮ ବର୍ଷିୟ ଚାଇନାର ରାଷ୍ଟ୍ରପତି ଶି ଜିନପିଙ୍ଗ ମସ୍ତିଷ୍କ ଆନେୱରାଇଜମରେ ପୀଡିତ ଥିବା କୁହାଯାଉଛି। ଏହି କାରଣରୁ, ପୀଡିତଙ୍କର ମସ୍ତିଷ୍କର ସ୍ନାୟୁ ଦୁର୍ବଳ ହୋଇ ଫୁଲିଯାଇଥାଏ। ଏହା ଯୋଗୁ ମୁଣ୍ଡବିନ୍ଧା, ବାନ୍ତି, ବେକରେ କଠିନତା ସମସ୍ୟା ସୃଷ୍ଟି ହୋଇଥାଏ। ଜିନପିଙ୍ଗ୍ ଏହାର ଚିକିତ୍ସା ପାଇଁ ପାରମ୍ପରିକ ଔଷଧର ବ୍ୟବହାର କରୁଥିବା କୁହାଯାଉଛି। ମାର୍ଚ୍ଚ ୨୦୧୯ ରେ ଇଟାଲୀ ଗସ୍ତ ସମୟରେ, ତାଙ୍କର ସ୍ବାସ୍ଥ୍ୟ ଭଲ ନଥିବା ଜଣାପଡ଼ିଥିଲା। ସେ ଫ୍ରାନ୍ସରେ ପହଞ୍ଚିଲେ, ତାଙ୍କୁ ବସିବା ପାଇଁ ଅନ୍ୟର ସାହାଯ୍ୟ ନେବାକୁ ପଡ଼ିଥିଲା। ସେହିଭଳି, ଅକ୍ଟୋବର ୨୦୨୦ରେ ଭାଷଣ ସମୟରେ ତାଙ୍କ ସ୍ବର ବହୁତ ଧୀର ଥିଲା ଏବଂ ତାଙ୍କ କାଶ ହେଉଥିବାର ଦେଖିବାକୁ ମିଳିଥିଲା। ଏହାକୁ ନେଇ ଅନ୍ତର୍ଜାତୀୟସ୍ତରରେ ଚର୍ଚ୍ଚା ଆରମ୍ଭ ହୋଇଥିଲା।
ସେହିପରି ଉତ୍ତରକୋରିଆର ଏକଛତ୍ରବାଦୀ ଶାସକ କିମ ଜୋଙ୍ଗ ଉନ ୨୦୨୧ରେ ଏକ ମାସ ପାଇଁ କୌଣସି ସାଧାରଣ କାର୍ଯ୍ୟକ୍ରମରେ ଉପସ୍ଥିତ ନଥିଲେ। ତାଙ୍କ ଓଜନ ପ୍ରାୟ ୨୦ କିଲୋଗ୍ରାମ କମି ଯାଇଥିବା ନେଇ ଚର୍ଚ୍ଚା ହୋଇଥିଲା। ତାଙ୍କର ଓପନ ହାର୍ଟ ସର୍ଜରୀ ହୋଇଥିବା କୁହାଯାଇଥିଲା। କିନ୍ତୁ ଉତ୍ତର କୋରିଆର ଅଧିକାରୀମାନେ କହିଥିଲେ ଯେ କିମ୍ କୌଣସି ରୋଗରେ ପୀଡିତ ନାହାନ୍ତି।
