ପାଟଣା,୧୦।୬(ସ୍ବ.ପ୍ର.): କେନ୍ଦୁଝର ଜିଲା ପାଟଣା ବ୍ଲକ ଡୁମୁରିଆ ପଞ୍ଚାୟତ ଭୀମକୁଣ୍ଡଠାରେ ଆୟୋଜିତ ଏକ ସାଧାରଣ ସଭାରେ ଶନିବାର ୫-ଟି ସଚିବ ଭି.କେ. ପାଣ୍ଡିଆନ୍ ଯୋଗ ଦେଇଛନ୍ତି। ସକାଳେ ସେ ତଣ୍ଡ ଅସ୍ଥାୟୀ ହେଲି ପ୍ୟାଡ୍ରେ ଅବତରଣ କରିବା ପରେ ଭୀମକୁଣ୍ଡ ୱାଚ ଟାୱାର ପରିଦର୍ଶନ କରିଥିଲେ। ଏହାପରେ ଭୀମକୁଣ୍ଡ ପଡ଼ିଆରେ ଆୟୋଜିତ ସାଧାରଣ ସଭାରେ ପାଟଣା ମାଟିକୁ ନମସ୍କାର କରି ଜୟ ଜଗନ୍ନାଥ କହି ଅଭିଭାଷଣ ଆରମ୍ଭ କରିଥିଲେ । ସଭାସ୍ଥଳୀରେ ଉପସ୍ଥିତ ଏସ୍ଏଚ୍ଜି ମହିଳା, ଜନତା ଓ ବିଭିନ୍ନ ବର୍ଗର ଲୋକଙ୍କଠାରୁ ପାଟଣା ଅଞ୍ଚଳର ପ୍ରମୁଖ ସମସ୍ୟା ଓ ଉନ୍ନୟନ କାର୍ଯ୍ୟ ସମ୍ବଳିତ ଦାବିପତ୍ର ଗ୍ରହଣ କରିଥିଲେ। ଭୀମକୁଣ୍ଡକୁ ବିଶ୍ୱସ୍ତରୀୟ ପର୍ଯ୍ୟଟନ କେନ୍ଦ୍ରରେ ଡିସେମ୍ବର ସୁଦ୍ଧା ପରିଣତ କରିବାକୁ ସେ ଘୋଷଣା କରିଥିଲେ। ଚାଷୀମାନଙ୍କ ଉନ୍ନତି ପାଇଁ ଜଳସେଚନ ସୁବିଧା, ମନ୍ଦିର, ମସ୍ଜିଦର ଉନ୍ନତି ସହ ଜନସାଧାରଣଙ୍କ ପକ୍ଷରୁ ଆସିଥିବା ଅନ୍ୟାନ୍ୟ ଦାବିକୁ ମୁଖ୍ୟମନ୍ତ୍ରୀ ବିଚାର କରିବେ ବୋଲି ପାଣ୍ଡିଆନ୍ କହିଥିଲେ। ସେ ମୟୂରଭଞ୍ଜ ଜିଲାପାଳ ଥିବାବେଳେ ବହୁବାର ପାଟଣା ପାର୍ଶ୍ୱ ଭୀମକୁଣ୍ଡ ପରିଦର୍ଶନ କରିଛନ୍ତି। ପାଟଣା ଅଞ୍ଚଳର ବିକାଶ ଧାରା ଉପରେ ଆସନ୍ତା ୧୮ ତାରିଖ ମଧ୍ୟରେ ଲୋକଙ୍କୁ ଶୁଭ ଖବର ମିଳିଯିବ ବୋଲି ସେ କହିଥିଲେ। ସଭାସ୍ଥଳୀକୁ ଖୋଦ ଜିଲାପାଳ ଆଶିଷ ଠାକ୍ରେ ଓ ଅନ୍ୟାନ୍ୟ ପ୍ରଶାସନ ଅଧିକାରୀ ତଦାରଖ କରିଥିଲେ।
