ଭଞ୍ଜନଗର,୫।୪(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ସହରର ଐତିହାସିକ ଠାକୁରାଣୀ ଯାତ୍ରା ଆସନ୍ତା ୨୬ ତାରିଖରୁ ଆରମ୍ଭ ହୋଇ ମେ ମାସ ୨୦ ତାରିଖ ପର୍ଯ୍ୟନ୍ତ ଚାଲିବ। ଏହା ପୂର୍ବରୁ ସହରର ସୌନ୍ଦର୍ଯ୍ୟକରଣ ସମେତ ଅନ୍ୟାନ୍ୟ କାର୍ଯ୍ୟ ଦ୍ରୁତ ଗତିରେ ଚାଲିଛି । ସହରର ପ୍ରମୁଖ ରାସ୍ତା ଗୁଡ଼ିକର ଅପରିଷ୍କାର ଅବସ୍ଥାରେ ଥିବା ପାଚେରୀ ଗୁଡିକୁ ସୌନ୍ଦର୍ଯ୍ୟକରଣ କରାଯାଉଛି । ମୁଖ୍ୟ ରାସ୍ତା ଉପରେ ଝୋଟି ସମେତ ବିଭିନ୍ନ ଚିତ୍ର ଆଙ୍କିବା ପ୍ରକ୍ରିୟା ଆରମ୍ଭ ହୋଇଛି।
ଯାତ୍ରା ୨୬ ତାରିଖରୁ ଆରମ୍ଭ ହେଉଥିବା ବେଳେ ଏହା ପୂର୍ବରୁ ଭଞ୍ଜନଗର ଏଲଆଇସି କଲୋନୀ ଛକରେ ହାତିବନ୍ଧ ପୋଖରୀର କିଛି ଅଂଶକୁ ପୋତି ନୂତନ୍ ଭାବେ ନିର୍ମାଣ ହୋଇଥିବା ପାର୍କ ତାହାକୁ ଖୁବଶୀଘ୍ର ଉଦଘାଟନ କରିବା ଯୋଜନା ଅଛି। ତେଣୁ କାର୍ଯ୍ୟ ଦ୍ରୁତ ଗତିରେ ଚାଲିଛି । ଏବାବଦରେ ପ୍ରାୟ ୫ କୋଟିରୁ ଊର୍ଦ୍ଧ୍ୱ ଟଙ୍କା ଖର୍ଚ୍ଚ ହୋଇଛି । ଶିଶୁମାନେ ଖେଳିବା ପାଇଁ ଇଣ୍ଡୋର ଗ୍ୟାମ ସହ ଅନେକ ସୁଵିଧା ଅଛି । ଯୁବପିଢ଼ି ଏବଂ ବୟସ୍କ ଲୋକଙ୍କ ମନୋରଞ୍ଜନ ପାଇଁ ମଧ୍ଯ ଅନ୍ୟାନ୍ୟ ସୁବିଧା ଅଛି ।
ସହର ମଧ୍ୟରେ ପାର୍କ ନଥିଲା। ପାର୍କ ଖୋଲିଲେ ସହରବାସୀ ତାହାର ମଜା ଉଠାଇବେ । ଏଥିସହ ଆଗାମୀ ଦିନରେ ଏଆଇ ଲେଜର ସୋ, ଅତ୍ୟାଧୁନିକ ମ୍ୟୁଜିକ୍ ଫାଉଣ୍ଟେନ ଲାଗିବ । ଏ ବାବଦରେ ମଧ୍ଯ କୋଟି କୋଟି ଟଙ୍କା ବ୍ୟୟ ହେବ। ଏନେଇ ପୂର୍ବରୁ ହୋଇଥିବା ଟେଣ୍ଡରକୁ ତେଣୁ ବାତିଲ କରି ଦିଆଯାଇଛି। ଏଥିସହ ପାନୀୟଜଳ, ବିଦ୍ୟୁତ୍, ରାସ୍ତା ମରାମତି ସମେତ ଅନ୍ୟାନ୍ୟ କାର୍ଯ୍ୟ ଦ୍ରୁତ ଗତିରେ ଚାଲିଛି । ଅପରପକ୍ଷେ ଦେବୀଙ୍କ ଆଗମନ ପୂର୍ବରୁ ଅସ୍ଥାୟୀ ମଣ୍ଡପ ମୁଖ୍ୟ ସଡ଼କରେ ନିର୍ମାଣ ଚାଲିଛି । ଯାତ୍ରା କମିଟି କର୍ମକର୍ତ୍ତା ନିୟମିତ ବିଭିନ୍ନ କାର୍ଯ୍ୟର ସମୀକ୍ଷା କରୁଛନ୍ତି । ଏନେଇ ମ୍ୟୁନିସିପାଲଟି ନିର୍ବାହୀ ଅଧିକାରୀ ମୁରଲୀ କୃଷ୍ଣ ପଣ୍ଡାଙ୍କ ସହ ଯୋଗାଯୋଗ କରିବାରୁ ସେ ଏଠାରେ କହିଛନ୍ତି ଯେ ଯାତ୍ରା ସମୟରେ ଲୋକଙ୍କ ସୁଵିଧା ପାଇଁ ସବୁ ପ୍ରକାର ପଦକ୍ଷେପ ନିଆଯାଇଛି । ଆଗାମି ଦିନରେ ହାତିବନ୍ଧ ପାର୍କ ଉଦଘାଟନ ହେବ । ତେଣୁ କାମ ଦ୍ରୁତ ଗତିରେ ଚାଲିଛି ବୋଲି କହିଛନ୍ତି ।