ଭଞ୍ଜନଗର,୨୬।୩(ବାବୁଲା ପ୍ରଧାନ): ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ବୁଧବାର ବିଧାନସଭାରେ ୨୦୨୫-୨୬ ଗୃହ ବିଭାଗ ବଜେଟ ଉପସ୍ଥାପନ କରିଛନ୍ତି। ଏଥିରେ ଭଞ୍ଜନଗର ବିଧାୟକ ପ୍ରଦ୍ୟୁମ୍ନ କୁମାର ନାୟକ ଭାଗ ନେଇ ବଜେଟକୁ ସମର୍ଥନ ଜଣାଇ ମୁଖ୍ୟମନ୍ତ୍ରୀ ଙ୍କୁ ସେ ଧନ୍ୟବାଦ ଜଣାଇଛନ୍ତି। ଏଥିସହ ବିରୋଧୀ କଂଗ୍ରେସ ପକ୍ଷରୁ କରାଯାଉଥିବା ଅଚଳାବସ୍ଥାକୁ ନେଇ ପ୍ରତିକ୍ରିୟା ରଖିଛନ୍ତି।
ଆଲୋଚନାରେ ଭାଗ ନେଇ ବିଧାୟକ କହିଛନ୍ତି, ନୂଆ କରି ବିଧାୟକ ଭାବେ ନିର୍ବାଚିତ ହେବା ପରେ ଅନେକ କିଛି ଶିଖିବୁ ବୋଲି ଆଶା ଥିଲା। ହେଲେ କଂଗ୍ରେସ ଏବଂ ବିଜେଡି ୭ ଦିନ ହେବ ବିଧାନସଭା ଚଳାଇ ଦେଉନାହାନ୍ତି। ସେମାନଙ୍କର ଦୁର୍ନୀତି ଏବଂ ଅପରାଧୀ କାର୍ଯ୍ୟକଳାପ ପଦାରେ ପଡ଼ିଯିବ ଭୟରେ ଏହିଭଳି ବିଶୃଙ୍ଖଳା କରୁଛନ୍ତି। ପୂର୍ବତନ ମନ୍ତ୍ରୀ ନବ ଦାସ ହତ୍ୟା ମାମଲାର ପେଡି ମୁଖ୍ୟମନ୍ତ୍ରୀ ପୁଣି ଖୋଲିବା ପରେ ବିଜେଡି ନେତା ମାନେ ଭୟଭୀତ ହୋଇ ପଡ଼ିଛନ୍ତି। ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ହିଞ୍ଜିଳିକାଟୁ ନିର୍ବାଚନମଣ୍ଡଳୀରେ ଏକାଧିକ ହତ୍ୟା ଘଟିଛି। ଏଥିରେ କେତେ ନେତା ଜଡ଼ିତ ଅଛନ୍ତି, କେତେ ଜଣକୁ ଗିରଫ କରାଯାଇଛି ବୋଲି ପ୍ରଦ୍ୟୁମ୍ନ ପ୍ରଶ୍ନ କରିଛନ୍ତି।
ବିଜେଡି ଶାସନ ସମୟରେ ରାଜ୍ୟରେ ଆଇନ ଶୃଙ୍ଖଳା ବିପର୍ଯ୍ୟସ୍ତ ହୋଇପଡ଼ିଥିଲା। ଏବେ ବିରୋଧି ଦଳର ମୁଖା ଖୋଲିଯାଇଛି। ରାଜ୍ୟବାସୀ ସବୁକିଛି ଜାଣିସାରିଛନ୍ତି। କଂଗ୍ରେସ ବିଧାୟକ ମାନଙ୍କୁ ତାଙ୍କ ନିର୍ବାଚନମଣ୍ଡଳୀ ଲୋକ କଣ ଏଠି ଘଣ୍ଟ ମୃଦଙ୍ଗ ବାଡେଇବା ପାଇଁ ପଠାଇଛନ୍ତି। ଏଣୁ ଆମେ ଆହ୍ବାନ କରୁଛୁ ରାଜ୍ୟର ବିକାଶ ପାଇଁ ମିଳିମିଶି କାର୍ଯ୍ୟ କରିବା ବୋଲି ପ୍ରଦ୍ୟୁମ୍ନ ବିଧାନ ସଭା ଆଲୋଚନାରେ ଭାଗ ନେଇ ଆହ୍ବାନ କରିଛନ୍ତି।
