ଭବାନୀପାଟଣା,୨୫।୯(ଉତ୍ତମ କୁମାର ଦାଶ): କଳାହାଣ୍ଡି ଜିଲା ଜୁନାଗଡ଼ ବ୍ଲକ ଭଇଁରୀଗୁଡା-ବାଗଡୁଙ୍ଗରୀ ଗ୍ରାମବାସୀଙ୍କ ଦୀର୍ଘ ଦିନର ସ୍ବପ୍ନ ପୂରଣ ହେବାକୁ ଯାଉଛି। କାରଣ ଏହି ୨ ଗାଁ ମଧ୍ୟରେ ଥିବା ହାତୀ ନଦୀରେ ଏକ ସୁଉଚ୍ଚ ପୋଲ ନିର୍ମାଣ କରିବା ନେଇ ରାଜ୍ୟ ସରକାରଙ୍କ ପକ୍ଷରୁ ସବୁଜ ସଙ୍କେତ ମିଳିଛି। ଜୁନାଗଡ଼ ବିଧାୟକ କ୍ୟାପଟେନ ଦିବ୍ୟ ଶଙ୍କର ମିଶ୍ର ମଙ୍ଗଳବାର ବିଧାନସଭାରେ ଏହି ପ୍ରସ୍ତାବିତ ପୋଲର ସ୍ଥିତିକୁ ନେଇ ପ୍ରଶ୍ନ ପଚାରିଥିଲେ। ଯାହାର ଉତ୍ତର ରଖିଥିଲେ ରାଜ୍ୟ ସରକାରଙ୍କ ଗ୍ରାମ୍ୟ ଉନ୍ନୟନ ମନ୍ତ୍ରୀ ରବି ନାରାୟଣ ନାଏକ। ମନ୍ତ୍ରୀ ନାୟକ ତାଙ୍କ ଉତ୍ତରରେ କହିଥିଲେ ଯେ, ସେତୁ ବନ୍ଦ ଯୋଜନାରେ ୨୦୨୪/୨୫ ଆର୍ଥିକ ବର୍ଷରେ ଭଇଁରୀଗୁଡା-ବାଗଡୁଙ୍ଗରୀ ହାତୀ ନଦୀ ଉପରେ ସୁଉଚ୍ଚ ପୋଲ ନିର୍ମାଣ ପାଇଁ ଅନୁମୋଦନ ହୋଇଛି।
ଏହି ପୋଲର ବର୍ତ୍ତମାନ ଡିପିଆର ପ୍ରସ୍ତୁତି ଶେଷ ହୋଇଥିବାବେଳେ ଏହି ପ୍ରକଳ୍ପ ର୍ନିମାଣ ପାଇଁ ୨୧.୫୮ କୋଟି ଟଙ୍କା ରହିଛି ବୋଲି କହିଥିଲେ। ଜୁନାଗଡ଼ ବିଧାୟକ କ୍ୟାପଟେନ ଦିବ୍ୟ ମିଶ୍ରଙ୍କ ହସ୍ତକ୍ଷେପ କ୍ରମେ ଏଠାରେ ପୋଲ ନିର୍ମାଣ ପାଇଁ ଅର୍ଥ ମଞ୍ଜୁର ହୋଇଥିବାରୁ ସ୍ଥାନୀୟ ଅଞ୍ଚଳବାସୀ ତାଙ୍କୁ କୃତଜ୍ଞତା ଜଣାଇଛନ୍ତି। ସେହିପରି ଏଠାରେ ଏକ ପୋଲ ନିର୍ମାଣ କରିବା ପାଇଁ ଭଇଁରୀଗୁଡା ଗ୍ରାମର ସାମାଜିକ କର୍ମୀ ଦେବରାଜ ବାଣୁଆ,କ୍ଷୀରସିନ୍ଦୁ ବାଣୁଆ,ଉଦୟ ଭାନୁ ବାଣୁଆ ପ୍ରମୁଖ ଗତ ଫେବୃଆରୀ ୨୦୨୪ ରେ ୫ ଟି ସଚିବ ଜରିଆରେ ପୂର୍ବତନ ରାଜ୍ୟ ସରକାରଙ୍କୁ ଦାବିପତ୍ର ଦେଇଥିଲେ। ଏଠାରେ ପୋଲ ନିର୍ମାଣ ପାଇଁ ଗତ ଖରା ମାସରେ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ପ୍ରକଳ୍ପ ସ୍ଥାନ ( ହାତୀ ନଦୀର) ମାଟି ମଧ୍ୟ ପରୀକ୍ଷା ସରିଛି। ଏହି ପୋଲ ହେଲେ ଉପରୋକ୍ତ ୨ ଗ୍ରାମ ସମେତ ଭେଜିପଦର,ଯମୁନାବାହାଲ,ମିଚାଗାଁ, ଆଟିଗାଁ ସମେତ ସ୍ଥାନୀୟ ନଦୀ କୁଳିଆ ଗାଁର ଲୋକେ ଉପକୃତ ହେବେ।
