ନୂଆଦିଲ୍ଲୀ,୩୦।୩ : ବିଶ୍ୱସ୍ତରରେ, ଏହା ବିକଶିତ ହେଉ କିମ୍ବା ବିକାଶଶୀଳ ରାଷ୍ଟ୍ର ହେଉ, ସାଇବର ଅପରାଧ ସମସ୍ତଙ୍କ ପାଇଁ ଏକ ବଡ଼ ଆହ୍ବାନ ଭାବରେ ଉଭା ହୋଇଛି । ଭାରତରେ ସାଇବର ଅପରାଧର ମୁକାବିଲା ତଥା ଏହାର ବିପଦ ବିଷୟରେ ଲୋକଙ୍କୁ ଅବଗତ କରାଇବା ପାଇଁ କେନ୍ଦ୍ର ସ୍ବରାଷ୍ଟ୍ର ମନ୍ତ୍ରଣାଳୟ ଅନେକ ପଦକ୍ଷେପ ନେଇଛି। ଏହାକୁ ଦୃଷ୍ଟିରେ ରଖି ସମନ୍ବିତ ତଥା ବ୍ୟାପକ ଢଙ୍ଗରେ ସାଇବର ଅପରାଧର ମୁକାବିଲା ପାଇଁ ୧୦ ଜାନୁୟାରୀ ୨୦୨୦ରେ ଭାରତୀୟ ସାଇବର କ୍ରାଇମ ସମନ୍ବୟ କେନ୍ଦ୍ର ପ୍ରତିଷ୍ଠା କରାଯାଇଥିଲା। ବର୍ତ୍ତମାନ ଏହାର ଅର୍ଥପୂର୍ଣ୍ଣ ଫଳାଫଳ ଆସିବା ଆରମ୍ଭ କରିଛି।
ପ୍ରାୟ ହଜାରେ ଦିନରେ ସାଇବର କ୍ରାଇମ ପୋର୍ଟାଲକୁ ୧୩ କୋଟିରୁ ଅଧିକ ଥର ସହାୟତା ପାଇଁ ଲୋକେ ଲଗଇନ କରିଛନ୍ତି। ଏହା ଉକ୍ତ ପୋର୍ଟାଲର ବିଶ୍ୱସନୀୟତା ଏବଂ ଉପଯୋଗିତାକୁ ଦର୍ଶାଉଥିବା ସରକାରଙ୍କ ପକ୍ଷରୁ କୁହାଯାଇଛି। ବର୍ତ୍ତମାନ ପର୍ଯ୍ୟନ୍ତ ପୋର୍ଟାଲରେ ୨୦ ଲକ୍ଷରୁ ଅଧିକ ସାଇବର ଅପରାଧ ଅଭିଯୋଗ ପଞ୍ଜିକୃତ ହୋଇଛି। ଏହି ସଂଖ୍ୟାକୁ ଦିନ ଆଧାରରେ ଗଣନା କଲେ ଜଣାଯାଏ, ସାଇବର ଅପରାଧ ସମ୍ବନ୍ଧରେ ପ୍ରତିଦିନ ୧୮୨୬ ଟି ଅଭିଯୋଗ ଗ୍ରହଣ କରାଯାଇଛି । କେବଳ ଏହି ଆଧାରରେ, ୪୦ ହଜାରରୁ ଅଧିକ ଏଫଆଇଆର ପଞ୍ଜିକୃତ ହୋଇଛି ।
ଦେଶରେ ସାଇବର ଅପରାଧ ରୋକିବା ଏବଂ ଭାରତୀୟ ସାଇବର କ୍ରାଇମ ସମନ୍ବୟ କେନ୍ଦ୍ର୍ର କାର୍ଯ୍ୟକାରିତା ସମ୍ପର୍କରେ କେନ୍ଦ୍ର ସ୍ବରାଷ୍ଟ୍ର ମନ୍ତ୍ରଣାଳୟରେ ଏକ ସମୀକ୍ଷା ବୈଠକ ଆୟୋଜିତ ହୋଇଥିଲା। ବର୍ତ୍ତମାନ ସୁଦ୍ଧା ୧.୩୩ ଲକ୍ଷରୁ ଅଧିକ ଲୋକଙ୍କଠାରୁ ସାଇବର ଅପରାଧ ଦ୍ୱାରା ଠକେଇ ହୋଇଥିବା ୨୫୩ କୋଟିରୁ ଅଧିକ ଟଙ୍କା ଜବତ କରାଯାଇଛି। ଏହା ବ୍ୟତୀତ ବଡ଼ ଧରଣର ୫୦ ସାଇବର ଆକ୍ରମଣ ମାମଲାର ମୋଡସ ଅପରେଣ୍ଡି ଉପରେ ଏକ ଆନାଲିଟିକାଲ ରିପୋର୍ଟ ପ୍ରସ୍ତୁତ କରାଯାଇଛି।
