ଯାଜପୁର ଅଫିସ, ୧୮।୧୧: ଯାଜପୁର ଜିଲା ବଡ଼ଚଣା ବ୍ଲକରେ ମଧୁବାବୁ ପେନସନ ଯୋଜନାରେ ବାର୍ଦ୍ଧକ୍ୟ ଭତ୍ତା ହିତାଧିକାରୀ ହଇରାଣ ହରକତ ହେଉଛନ୍ତି। ଏଥିରେ ବିଭାଗୀୟ ଅଧିକାରୀଙ୍କ ଅବହେଳା ଯୋଗୁ ହିତାଧିକାରୀ ଅଧିକାଂଶ ସମୟରେ ଖାଲି ହାତରେ ଫେରୁଛନ୍ତି। ନିର୍ଦ୍ଧାରିତ ପ୍ରତି ମାସ ୧୫ ତାରିଖ କିମ୍ବା ପରବର୍ତ୍ତୀ ତାରିଖରେ ହିତାଧିକାରୀମାନେ ପେନ୍ସନ ନେବାକୁ ଆସି ପ୍ରାୟ ୬ ଘଣ୍ଟା ପର୍ଯ୍ୟନ୍ତ ଲମ୍ବା ଧାଡିରେ ଠିଆ ହୋଇ ନିରାଶ ହେଉଛନ୍ତି। ଏଭଳି ସମ୍ବେଦନଶୀଳ ଅଭିଯୋଗ ଉପରେ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ (ଏସ୍ଏସ୍ଇପିଡି) ବିଭାଗର ଯୁଗ୍ମ ସଚିବ ଦୀପକ ରାଉତରାୟ ଉଦ୍ବେଗ ପ୍ରକାଶ କରିଛନ୍ତି। ଏହାକୁ ଗୁରୁତର ଭାବେ ଗ୍ରହଣ କରି ୧୫ ଦିନ ମଧ୍ୟରେ ଉପଯୁକ୍ତ ତଦନ୍ତ ରିପୋର୍ଟ ଦାଖଲ କରିବାକୁ ସଚିବ ରାଉତରାୟ ଗତ ୧୬ ତାରିଖରେ ଯାଜପୁର ଜିଲାପାଳଙ୍କୁ କଡା ନିର୍ଦ୍ଦେଶ ଜାରି କରିଛନ୍ତି।
ଯାଜପୁର ଜିଲା ବଡଚଣା ବ୍ଲକର ତନୁଶ୍ରୀ ମହାନ୍ତି ଗତ ୪ା୧୧ା୨୦୨୧ରେ ମୁଖ୍ୟମନ୍ତ୍ରୀଙ୍କ ସମେତ ମୁଖ୍ୟ ଶାସନ ସଚିବ, ଏସ୍ଏସ୍ଇପିଡିର ସଚିବ, ଯାଜପୁର ଜିଲାପାଳ ପ୍ରମୁଖଙ୍କୁ ବାର୍ଦ୍ଧକ୍ୟ ଭତ୍ତା ପ୍ରଦାନରେ ବିଳମ୍ବ ସଂକ୍ରାନ୍ତରେ ଅଭିଯୋଗ କରିିଥିଲେ। ଉକ୍ତ ଅଭିଯୋଗରେ ସେ ଆହୁରି ଦର୍ଶାଇଥିଲେ, ପ୍ରତିମାସରେ ହିତାଧିକାରୀମାନେ ଭତ୍ତା ପାଇବାରେ ସମସ୍ୟାର ସମ୍ମୁଖୀନ ହେଉଛନ୍ତି। ଗତ ଏପ୍ରିଲରୁ ଏହି ସମସ୍ୟା ଉପୁଜୁଛି। ଏ ସଂକ୍ରାନ୍ତରେ ସ୍ଥାନୀୟ ଅଧିକାରୀଙ୍କୁ ୧୦ରୁ ଊର୍ଦ୍ଧ୍ୱ ଥର ଦୃଷ୍ଟି ଆକର୍ଷଣ କରିଥିଲେ ହେଁ କୌଣସି ସୁଫଳ ମିଳି ନାହିଁ। କେବଳ ସମାଧାନ କରିବାର ପ୍ରତିଶ୍ରୁତି ମିଳୁଛି। ଏହିକ୍ରମରେ ୮୦ ରୁ ୯୦ ବର୍ଷ ବୟସ୍କ ବୃଦ୍ଧାବୃଦ୍ଧ ଭତ୍ତା ନେବାକୁ ଆସି ଖାଲି ହାତରେ ଫେରୁଛନ୍ତି। ସେମାନଙ୍କ ଦୁଃଖ ବର୍ଣ୍ଣନା କରି ହେବ ନାହିଁ। ତେଣୁ ପ୍ରତି ମାସର ଗୋଟିଏ ଦିନ ଧାର୍ଯ୍ୟ କରି ସେହିଦିନ ସୁନିଶ୍ଚିତ ଭାବେ ଭତ୍ତା ପ୍ରଦାନ କରିବାକୁ ସେମାନେ ଦାବି କରିଥିଲେ।
