ଭଞ୍ଜନଗର,୬ା୩(ବାବୁଲା ପ୍ରଧାନ): ଭଞ୍ଜନଗର ପୋଲିସ ପକ୍ଷରୁ ଗୁରୁବାର ସ୍ଥାନୀୟ କବି ସମ୍ରାଟ ଉପେନ୍ଦ୍ର ଭଞ୍ଜ ମହାବିଦ୍ୟାଳୟରେ ସାଇବର ଠକେଇରୁ କିଭଳି ମୁକୁଳିବା, ଭାରତର ଯେ କୌଣସି ସ୍ଥାନରେ କିଭଳି ଏତଲା ଦେଇପାରିବା, ଅନ୍ଲାଇନ ଏତଲା କିଭଳି ଦିଆଯିବ ଏବଂ ନୂଆ ଆଇନ ଉପରେ ସଚେତନତା କାର୍ଯ୍ୟକ୍ରମ ହୋଇଥିଲା। ଏଥିରେ ଥାନା ଅଧିକାରୀ ଜୀବନାନନ୍ଦ ଜେନା ଅଧ୍ୟକ୍ଷତା କରି କହିଥିଲେ ଯେ, ଯୁବପିଢ଼ି ସଚେତନ ହେଲେ ଅଧା ଅନ୍ଲାଇନ୍ ଠକେଇ ଏବଂ ଅପରାଧ କମିଯିବ। ସୋସିଆଲ ମିଡିଆରେ ଅନେକ ମେସେଜ ଆସୁଛି। ଏଥିପ୍ରତି ସଚେତନ ହେବାକୁ ପଡ଼ିବ। ଫେସବୁକ୍ ସମେତ ବିଭିନ୍ନ ସୋସିଆଲ ମିଡିଆ ଆଇଡିରେ ନିଜର ଫଟୋ ଡିପିରେ ରଖିବେ ନାହିଁ। ଆଧାର କାର୍ଡ ଯେଉଁଠି ଦାଖଲ କରୁଛନ୍ତି, ସେଠି ଦସ୍ତଖତ କରିବା ପୂର୍ବରୁ କେଉଁ କାରଣରୁ କାର୍ଡ ଦେଉଛନ୍ତି ତାହା ଉଲ୍ଲେଖ କରିବେ। ନଚେତ୍ ପରବର୍ତ୍ତୀ ପର୍ଯ୍ୟାୟରେ ତାହାକୁ ଦୁର୍ବୃତ୍ତମାନେ ଅପବ୍ୟବହାର କରି ଆପଣକୁ ହଇରାଣରେ ପକାଇ ପାରନ୍ତି। ବିଭିନ୍ନ ସମୟରେ ବିଭିନ୍ନ ବେସରକାରୀ ସଂସ୍ଥା ସର୍ଭେ କରୁଛନ୍ତି। ଏହି ସମୟରେ ସେମାନେ ଆଧାର କାର୍ଡ ତଥ୍ୟ ନେଉଛନ୍ତି। ସର୍ଭେ ସରିବା ପରେ ଉକ୍ତ ସଂସ୍ଥାରୁ କୌଣସି ମାଧ୍ୟମରେ ତଥ୍ୟ ଠକମାନଙ୍କ ପାଖକୁ ଚାଲି ଯାଉଛି। ଏହାପରେ ଠକମାନେ ଆଧାର କାର୍ଡ ସହାୟତାରେ ବିଭିନ୍ନ ତଥ୍ୟ ଚୋରି କରିବା ସହ ଟଙ୍କା ମଧ୍ୟ ଠକି ନେଉଛନ୍ତି। ବର୍ତ୍ତମାନ ଡିଜିଟାଲ ଆରେଷ୍ଟ ଚାଲିଛି। ଲୋକେ ଭୟଭୀତ ହୋଇ ଟଙ୍କା ଦେଇ ଦେଉଛନ୍ତି। ତେଣୁ ଫୋନ କିମ୍ବା ଭିଡିଓ କଲ ମାଧ୍ୟମରେ କିଏ ଭୟଭୀତ କରାଇ ଟଙ୍କା ମାଗିଲେ ଭୟଭୀତ ହୁଅନ୍ତୁ ନାହିଁ। ପୋଲିସକୁ ସୂଚନା ଦିଅନ୍ତୁ। ଆମେ ଆପଣମାନଙ୍କୁ ସାହାଯ୍ୟ ବୋଲି ଥାନା ଅଧିକାରୀ କହିଥିଲେ। ଏଥିସହ ସେ କହିଥିଲେ ଯେ, ଅପରାଧୀମାନଙ୍କ ସମ୍ପର୍କରେ ଆମକୁ ସୂଚନା ଦିଅନ୍ତୁ। ଆମେ ଅପରାଧୀଙ୍କୁ ଦମନ କରିବୁ। ସୂଚନା ଦାତାଙ୍କ ତଥ୍ୟକୁ ସମ୍ପୂର୍ଣ୍ଣ ଗୁପ୍ତ ରଖିଯିବ। ତେଣୁ ଭୟଭୀତ ନ ହୋଇ ପୋଲିସକୁ ଅପରାଧୀମାନଙ୍କ ସମ୍ପର୍କରେ ସୂଚନା ଦେବାକୁ ଥାନା ଅଧିକାରୀ ଉପସ୍ଥିତ ଛାତ୍ରୀଛାତ୍ରଙ୍କୁ ଆହ୍ବାନ କରିଥିଲେ। ଷ୍ଟ୍ରିଟ୍ ରୋମିଓମାନଙ୍କୁ ଦମନ କରାଯିବ। ସଚେତନ ହେବାକୁ ସୁଯୋଗ ଦିଆଯିବ। ସଚେତନ ନ ହୋଇ ବେନିୟମ କାର୍ଯ୍ୟ କଲେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି ମଧ୍ୟ ଥାନା ଅଧିକାରୀ ଜେନା ସଭାରେ କହିଥିଲେ। ସଭାରେ ଅନ୍ୟମାନଙ୍କ ମଧ୍ୟରେ ପୂର୍ବତନ କଲେଜ ଅଧ୍ୟକ୍ଷ କୃତୀବାସ ବିଶାଳ, ଡ ପୂର୍ଣ୍ଣଚନ୍ଦ୍ର ତ୍ରିପାଠୀ, କଲେଜ ଅଧ୍ୟକ୍ଷ ରାଜେନ୍ଦ୍ର କୁମାର ଦାସ, ସରପଞ୍ଚ ଶିବ ରାମ ସାହୁ, ପ୍ରାଧ୍ୟାପକ ବିଭାସ ଦାସ,ଅଧ୍ୟାପିକା ସୁନିତା ରାଣୀ ଖଣ୍ଡୁଆଳ, ଶିକ୍ଷକ ନେତା ସନ୍ତୋଷ ଜେନା, ଏସ୍ଆଇ ସମୀର ସେଠୀ ପ୍ରମୁଖ ଯୋଗଦେଇ ଉଦ୍ବୋଧନ ଦେଇଥିଲେ। ଆମ ପୋଲିସ ସମିତି ସଭ୍ୟ ଅନୁପମ ବାନାର୍ଜୀ ସଭାକୁ ସଂଯୋଜନା କରିଥିଲେ।
