ନୂଆଦିଲ୍ଲୀ,୧୬।୫ : କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ଏବଂ ଫାର୍ମାସ୍ୟୁଟିକାଲ୍ସ ବିଭାଗ ଏକ ନୂତନ ନୀତି ଆପଣାଇଛନ୍ତି। ଏହି ନୀତିରେ ମହାନିର୍ଦ୍ଦେଶକ ବୈଦେଶିକ ବାଣିଜ୍ୟକୁ ମଧ୍ୟ ଯୋଗାଯୋଗ କରାଯାଇଛି ଏବଂ ସେମାନଙ୍କଠାରୁ ପରାମର୍ଶ ନିଆଯାଇଛି। ବିଦେଶକୁ ଔଷଧ ପଠାଇବା ପୂର୍ବରୁ ଆଞ୍ଚଳିକ କିମ୍ବା କେନ୍ଦ୍ରୀୟ ଔଷଧ ପରୀକ୍ଷା ଲ୍ୟାବରେ ଏସବୁ ଔଷଧର ଗୁଣବତ୍ତା ପରୀକ୍ଷା କରାଯିବ। ଏହାକୁ ବର୍ତ୍ତମାନ ଗୁରୁତ୍ୱପୂର୍ଣ ଭାବରେ ବିଚାର କରାଯାଉଛି। ଗାମ୍ବିଆ, ଉଜବେକିସ୍ତାନ, ଆମେରିକା ଭଳି ଦେଶରେ ଭାରତୀୟ ଔଷଧ ଉପରେ ପ୍ରଶ୍ନ ଉଠିବା ପରେ ନୂତନ ନୀତି ଗୁରୁତର ସହ ବିଚାର କରାଯାଉଛି। ବର୍ତ୍ତମାନ ପର୍ଯ୍ୟନ୍ତ, ରପ୍ତାନି ଲାଇସେନ୍ସ ପାଇବା ପରେ କମ୍ପାନୀଗୁଡିକ ସିଧାସଳଖ ବିଦେଶୀ ଦେଶକୁ ଔଷଧ ରପ୍ତାନୀ କରୁଥିଲେ ଏବଂ ଔଷଧର ଗୁଣବତ୍ତା ଯାଞ୍ଚ କରାଯାଉ ନ ଥିଲା। କିନ୍ତୁ ବର୍ତ୍ତମାନ ରପ୍ତାନି କେବଳ ଔଷଧର ଗୁଣବତ୍ତା ଯାଞ୍ଚ ପରେ କରାଯାଇପାରିବ।
ଗାମ୍ବିଆରେ ଶିଶୁଙ୍କ ମୃତ୍ୟୁ ସହ ଜଡିତ ଏକ ଭାରତୀୟ ସଂସ୍ଥା ଦ୍ୱାରା ପ୍ରସ୍ତୁତ ଚାରୋଟି କାଶ ସିରପ ଉପରେ ବିଶ୍ୱ ସ୍ବାସ୍ଥ୍ୟ ସଂଗଠନ ଦ୍ୱାରା ସତର୍କ ସୂଚନା ଜାରି କରାଯାଇଥିଲା ଏବଂ ଏହି ସିରପଗୁଡିକ ବିପଜ୍ଜନକ ବୋଲି କୁହାଯାଉଥିଲା। ଏହା ପରେ ପରୀକ୍ଷିତ ୨୩ ଟି ନମୁନା ମଧ୍ୟରୁ ୪ଟିରେ ଡାଇଥାଇଲନ ଗ୍ଲାଇକଲ / ଇଥାଇଲନ ଗ୍ଲାଇକଲ ମିଳିଥିଲା। ଏହି ଘଟଣା ପରେ ଭାରତ କପ ସିରପ ତିଆରି କରୁଥିବା କମ୍ପାନୀର ଉତ୍ପାଦର ଗୁଣବତ୍ତା ଯାଞ୍ଚ କରି କିଛି କମ୍ପାନୀର ଉତ୍ପାଦ ଉପରେ ପ୍ରତିବନ୍ଧକ ଲଗାଇଥିଲା।
