ନିରାକାରପୁର,୧୦ା୪(ଡି.ଏନ୍.ଏ.): ପୂର୍ବ ଶତ୍ରୁତାକୁ କେନ୍ଦ୍ରକରି ଜଣେ ବ୍ୟକ୍ତିଙ୍କୁ କାଠ ଫାଳିଆରେ ପିଟି ହତ୍ୟା କରାଯାଇଥିବା ଅଭିଯୋଗ ହୋଇଛି। ମୃତକ ହେଲେ ଖୋର୍ଦ୍ଧା ଜିଲା ନିରାକାରପୁର ଥାନା ଅଧୀନ ନୂଆଗଡ଼ ପଞ୍ଚାୟତ ହରିପୁର ମାଝିସାହିର କୃଷ୍ଣଚନ୍ଦ୍ର ମାଝି ଓରଫ କୁଶିଆ(୪୫)। ଏନେଇ ମୃତକଙ୍କ ମା’ ବଦନୀ ମାଝିଙ୍କ ଅଭିଯୋଗକ୍ରମେ ପୋଲିସ ଏକ ମାମଲା (ନଂ.୯୫/୨୩)ରୁଜୁକରି ଜଣେ ମହିଳାଙ୍କ ସମେତ ୪ ଜଣଙ୍କୁ ଅଟକ ରଖି ତଦନ୍ତ ଚଳାଇଛି।
ମୁତାବକ, ଗ୍ରାମର ଭାଗବତ ଘରେ କୁଶିଆ ଶୋଇଥିବା ବେଳେ ସେହି ଗ୍ରାମର ନିତେଇ ମାଝିଙ୍କ ପୁଅ ପହଞ୍ଚି କୌଣସି କାରଣକୁ ନେଇ ଗାଳିଗୁଲଜ କରିବା ସହ ଛେପ ପକାଇଥିଲେ। କିଛି ସମୟ ପରେ ସେଠାରୁ କୁଶିଆ ଆସି ଘରେ ପହଞ୍ଚି ବାରିପଟକୁ ଯାଇଥିଲେ। ତେବେ ପାଟିତୁଣ୍ଡ ହେଉଥିବା ଶୁଣି ବଦନୀ ମଧ୍ୟ ବାରିପଟକୁ ଯାଇଥିଲେ। ସୁଦାମ ମାଝି, ନିତେଇ ମାଝି, ଭାରତୀ ମାଝି, ସୁମନ୍ତ ମାଝି, ଧରମା ମାଝି, ରବି ମାଝି ପ୍ରମୁଖ ତାଙ୍କ ପୁଅକୁ କାଠ ଫାଳିଆରେ ଆକ୍ରମଣ କରୁଥିବା ବଦନୀ ଦେଖିବାକୁ ପାଇଥିଲେ। ପୁଅକୁ ଛାଡ଼ିଦେବା ପାଇଁ ସେ ଆକ୍ରମଣକାରୀଙ୍କୁ ଅନୁରୋଧ କରିଥିଲେ ମଧ୍ୟ କେହି ଶୁଣି ନ ଥିଲେ। ଏପରି କି ଆକ୍ରମଣକାରୀମାନେ ତାଙ୍କୁ ମଧ୍ୟ ତଳେ ପକାଇ ମାଡ଼ ମାରିଥିଲେ। ଏହାପରେ କୁଶିଆ ଅଚେତ୍ ହୋଇଯିବାରୁ ଆକ୍ରମଣକାରୀମାନେ ସେଠାରୁ ପଳାଇଥିଲେ। ଖବରପାଇ ବଦନୀଙ୍କ ସମ୍ପର୍କୀୟ ପହଞ୍ଚି କୁଶିଆଙ୍କୁ ଗୁରୁତର ଅବସ୍ଥାରେ ଟାଙ୍ଗୀ ମେଡିକାଲରେ ଭର୍ତ୍ତି କରିଥିଲେ। ସ୍ବାସ୍ଥ୍ୟାବସ୍ଥା ସଙ୍କଟାପନ୍ନ ଥିବାରୁ ତାଙ୍କୁ ଖୋର୍ଦ୍ଧା ମେଡିକାଲକୁ ସ୍ଥାନାନ୍ତର କରାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଅନ୍ୟପକ୍ଷରେ ଥାନାରେ ଅଟକ ଥିବା ଭାରତୀ କୁହନ୍ତି, ଦୀର୍ଘ ୧୨ବର୍ଷ ହେବ କୁଶିଆ ତାଙ୍କ ପରିବାର ସଦସ୍ୟଙ୍କୁ ହଇରାଣ କରିଆସୁଥିଲେ। ସୋମବାର ସକାଳେ ଶ୍ୱଶୁରଙ୍କ ଶ୍ରାଦ୍ଧ ଥିବାରୁ ଖିରି ବସାଇଥିଲି। ସେହି ସମୟରେ କୁଶିଆ ପହଞ୍ଚତ୍ ଗାଳିଗୁଲଜ କରିବା ସହିତ ତାଙ୍କ ମୁହଁରେ ଛେପ ପକାଇଥିଲା। ମଦ ପିଇଥିବାରୁ କିଛିବାଟ ଯିବାପରେ ସେ ତଳେ ପଡ଼ିଯାଇଥିଲା। ଏହାପରେ କୁଶିଆଙ୍କୁ ସେ କାଠଫାଳିଆରେ ବାଡ଼େଇଥିଲେ। ମୋ ଦୁଇ ପୁଅ ଓ ସ୍ବାମୀଙ୍କ ଏଥିରେ ସମ୍ପୃକ୍ତି ନାହିଁ ବୋଲି ଭାରତୀ କହିଛନ୍ତି। ଅନ୍ୟପକ୍ଷରେ ଘଟଣାର ତଦନ୍ତ ଚାଲିଛି ବୋଲି ଥାନା ଅଧିକାରୀ ଗୀତାଞ୍ଜଳି ନାୟକ କହିଛନ୍ତି।
