ନୂଆଦିଲ୍ଲୀ: ଭର୍ଚୁଆଲ କରେନ୍ସି ବିଟ୍ କଏନ କାରବାର ଭାରତରେ ଏବେ ଲଗାତର ବଢୁଛି। ଟେସ୍ଲା କମ୍ପାନୀର ମୁଖ୍ୟ ଏଲନ୍ ମସ୍କ ବିଟ୍ କଏନରେ ଦେଢ଼ ଶହ କୋଟି ଡଲାର ନିବେଶ କରିବା ନେଇ ଘୋଷଣା କରିବା ପରେ ଭାରତୀୟ କ୍ରିପ୍ଟୋକରେନ୍ସି ନିବେଶକଙ୍କ ମଧ୍ୟରେ ବେଶ୍ ଉତ୍ସାହ ପରିଲକ୍ଷିତ ହୋଇଛି। ସେହିଭଳି କ୍ରିପ୍ଟୋକରେନ୍ସି ପେମେଣ୍ଟର ଏକ ବିକଳ୍ପ ଭାବେ ଏହି କମ୍ପାନୀ ଗ୍ରହଣ କରିବ ବୋଲି ଶୁଣାଯାଉଛି। ଏଭଳି ସ୍ଥିତିରେ ଭାରତୀୟ କ୍ରିପ୍ଟୋକରେନ୍ସି ଏକ୍ସଚେଞ୍ଜ ଏବଂ ଟ୍ରେଡିଂ ପ୍ଲାଟ୍ଫର୍ମଗୁଡିକରେ ଜମା କରିବା ନେଇ ଲୋକଙ୍କ ଅନୁରୋଧ ୪ ଗୁଣା ବଢ଼ିଥିବା ଶିଳ୍ପ ସୂତ୍ରରୁ ସୂଚନା ମିଳିଛି।
ଏହି ପରିପ୍ରେକ୍ଷୀରେ ମୁମ୍ବାଇଭିତ୍ତିକ କ୍ରିପ୍ଟୋକରେନ୍ସି ଏକ୍ସଚେଞ୍ଜ ପ୍ଲାଟ୍ଫର୍ମ ଓ୍ବାଜିର ଏକ୍ସର ପ୍ରତିଷ୍ଠାତା ନିଶ୍ଚଳ ସେଟ୍ଟୀ କହିଛନ୍ତି, ଟେସ୍ଲାର ଘୋଷଣା ପରେ ଟ୍ରାଞ୍ଜାକଶନ ପ୍ରାୟ ୩୦୦% ବଢ଼ିଥିବା ଦେଖିବାକୁ ପାଉଛୁ। ପ୍ରତି ମିନିଟରେ ଜମା କରିବା ନେଇ ରିକ୍ୱେଷ୍ଟ ବା ଅନୁରୋଧ ବଢ଼ିଚାଲିଛି। କିଛି ସମୟ ବିଳମ୍ବ ହେଲେ ମଧ୍ୟ ଲୋକଙ୍କ ଜମାକୁ କ୍ରେଡିଟ କରିବା ଦିଗରେ ପଦକ୍ଷେପ ନିଆଯାଉଛି। ସେ ପୁଣି କହିଛନ୍ତି, କ୍ରିପ୍ଟୋକରେନ୍ସି ବିଲ୍ରେ ଯଦି ସରକାର ଘରୋଇ କ୍ରିପ୍ଟୋକରେନ୍ସି ଟ୍ରେଡରଙ୍କ ଉପରେ କଟକଣା ଲଗାନ୍ତି ତେବେ ସଙ୍ଗଠିତ କ୍ଷେତ୍ରର ସଂସ୍ଥାଗୁଡ଼ିକ ପ୍ରଭାବିତ ହେବେ। ବେଆଇନ ଭାବେ ଲୋକମାନେ ଏହି ଭର୍ଚୁଆଲ କରେନ୍ସିରେ ନିବେଶ ଏବଂ କାରବାର କରିବେ।
ବାଙ୍ଗାଲୋର ଭିତ୍ତିକ କଏନ ସ୍ବିଚ୍ କୁବେରର ମୁଖ୍ୟ ବାଣିଜ୍ୟ ଅଧିକାରୀ ସରନ ନାୟାର କହିଛନ୍ତି, ଟେସ୍ଲାର ଘୋଷଣା ପରେ ଦୈନିକ ନେଣଦେଣ ଭଲ୍ୟୁମ ବଢ଼ିଛି। ସେହିଭଳି ଭୌଲ୍ଦର ସିଇଓ ଦର୍ଶନ ବଥିଜା କହିଛନ୍ତି, ଆମ ପ୍ଲାଟ୍ଫର୍ମରେ ନେଣଦେଣ ପରିମାଣ ୨ ଗୁଣ ବଢ଼ିଛି। ଟ୍ରେଡିଂ ଭଲ୍ୟୁମ ମଧ୍ୟ ୨ ଗୁଣ ବଢିଛି। ନୂଆ ୟୁଜରଙ୍କ କ୍ଷେତ୍ରରେ ୬୦% ବୃଦ୍ଧି, ରିଟର୍ନି ୟୁଜର ୨୦% ରହିଛନ୍ତି। ଗତ ୨୪ ଘଣ୍ଟା ମଧ୍ୟରେ ୧୦ ନିୟୁତ ଡଲାର ନେଣଦେଣ ହୋଇଛି। ଏହା ପୂର୍ବରୁ ଦୈନିକ ୪ରୁ ୫ ନିୟୁତ ଡଲାର ରହିଥିଲା। ସେହିଭଳି ପୂର୍ବରୁ ୧୬ କୋଟି ଜମା ହେଉଥିବା ବେଳେ ବର୍ତ୍ତମାନ ଦୈନିକ ୩୦ କୋଟିକୁ ବଢିଛି। ଅନ୍ତର୍ଜାତୀୟ ବଜାରରେ କ୍ରିପ୍ଟୋକରେନ୍ସି ଏବଂ ବିଟ୍ କଏନ ଲାଗି ଏକ ସକାରାତ୍ମକ ନୀତି ଆଣୁଥିବା ବେଳେ ଭାରତ ଏହାର ବିପରୀତ ନୀତି ସହ ଯାଉଥିବା ସେ ମତ ରଖିଛନ୍ତି। ୟୁନିକର୍ନର ସିିଇସି ସାତ୍ୱିକ ବିଶ୍ୱନାଥ କହିଛନ୍ତି, ବୁଧବାର ସକାଳୁ ଆମ ପ୍ଲାଟ୍ଫର୍ମରେ ୪ ହଜାର ନୂଆ ନିବେଶକ ଟ୍ରେଡିଂ କରୁଥିବା ଦେଖିବାକୁ ପାଉଛୁ। ଏହା ପୂର୍ବରୁ ଦୈନିକ ୫୦୦ରୁ ୬୦୦ ମଧ୍ୟରେ ରହୁଥିଲା। ପୂର୍ବରୁ ୩ରୁ ୪ ଦିନରେ ୪.୫ କୋଟି କାରବାର ହେଉଥିବା ବେଳେ ଏହା ବୁଧବାର ସକାଳୁ କିଛି ଘଣ୍ଟାରେ ୫ କୋଟି ଛୁଇଁଛି। ଏହା ୧୦ କୋଟି ଛୁଇଁପାରେ। ସରକାର ହୁଏତ ଗୋଟିଏ ଏଜେନ୍ସିକୁ ଏହି କ୍ରିପ୍ଟୋକରେନ୍ସି ପରିଚାଳନା ଲାଗି ଅନୁମତି ଦେଇପାରନ୍ତି ବୋଲି ବିଶ୍ୱନାଥ ଆଶଙ୍କା କରିଛନ୍ତି।
କେମିତି କ୍ରିପ୍ଟୋକରେନ୍ସି କିଣୁଛନ୍ତି ଭାରତୀୟ
– ଓ୍ବାଜିର ଏକ୍ସ ଏବଂ କଏନ ସ୍ବିଚ୍ କୁବେର ଭଳି ସ୍ଥାନୀୟ କ୍ରିପ୍ଟୋକରେନ୍ସି ଏକ୍ସଚେଞ୍ଜରେ ଆକାଉଣ୍ଟ ଖୋଲିବା ସହ ନିବେଶ କରିହେବ।
– କଓ୍ବୋଇସି ସମ୍ପୂର୍ଣ୍ଣ ହେବା ପରେ ବ୍ୟାଙ୍କ ଆକାଉଣ୍ଟରୁ ଟଙ୍କା ଟ୍ରାନ୍ସଫର କରି କିଣିବାକୁ ହୁଏ।
– ସମାନ ପ୍ଲାଟ୍ଫର୍ମ ବ୍ୟବହାର ଦ୍ୱାରା ଆସେଟ ବିକ୍ରି, ବ୍ୟାଙ୍କ ଆକାଉଣ୍ଟରେ ଟଙ୍କା ଉଠାଣ।
