ଏମ୍ଭି ୭୯,୩ା୬(ଡି.ଏନ୍.ଏ.): ମାଲକାନଗିରି ଜିଲା କାଲିମେଳା ବ୍ଲକରେ ବସୁଧା ଯୋଜନା ବାଟବଣା ହୋଇଛି। ଏମ୍ଭି-୭୯,ଏମ୍ପିଭି-୫୫,ଏମ୍ପିଭି-୪୨,ଏମ୍ପିଭି-୮୨,ଏମ୍ପିଭି-୭୯,ଏମ୍ଭି-୭୮, ଏମ୍ପିଭି-୮୧, ଗୁମୁକା, ବେଙ୍କଟପଲମ, ଏମ୍ଭି-୬୩ ଓ କୋଇକୁଣ୍ଡା ଗ୍ରାମରେ ବସୁଧା ଯୋଜନାରେ ନିର୍ମିିତ ପ୍ରକଳ୍ପ ୮ରୁ ୧୦ବର୍ଷ ହେଲା ଶେଷ ହୋଇଥିଲେ ସୁଦ୍ଧା ସେଗୁଡିକ ବର୍ତ୍ତମାନ ପର୍ଯ୍ୟନ୍ତ କାର୍ଯ୍ୟକାରୀ ହୋଇପାରିନାହିଁ। ଦୂଷିତ ପାଣିକୁ ପାନୀୟ ଜଳ ରୂପେ ବ୍ୟବହାର କରି ପ୍ରତିବର୍ଷ ଲୋକେ କିଡ୍ନୀ ରୋଗରେ ଆକ୍ରାନ୍ତ ହୋଇ ମୃତ୍ୟମୁଖରେ ପଡୁଛନ୍ତି। ଏଥିରୁ ରାଜ୍ୟ ସରକାରଙ୍କ ଏହି ମହତ୍ତ୍ୱାକାଂକ୍ଷୀ ଯୋଜନା ଯେ ଉପରୋକ୍ତ ଗ୍ରାମଗୁଡିକରେ ବାଟବଣା ହୋଇଛି ତାହା ସ୍ପଷ୍ଟ ହୋଇଛି। ଏହି ପ୍ରକଳ୍ପଗୁଡିକ ପାଇଁ ଖର୍ଚ୍ଚ ହୋଇଥିବା ୩ କୋଟିରୁ ଅଧିକ ଟଙ୍କା ପାଣିରେ ପଡିଥିବା ଅଭିଯୋଗ ହୋଇଛି। ଏହି ଜଳ ପ୍ରକଳ୍ପ ମଧ୍ୟରୁ ଅନେକ ସ୍ଥାନରେ ଗଛଲତା ମାଡି ଯାଇଥିବା ଦେଖିବାକୁ ମିଳୁଛି। ଉପରୋକ୍ତ ଗ୍ରାମଗୁଡିକର ପ୍ରାୟ ୪୦ ହଜାର ଲୋକ ପାଣି ମୁନ୍ଦିଏ ପାଇଁ ଡହଳବିକଳ ହେଉଛନ୍ତି। ଯେଉଁ କେତୋଟି ନଳକୂଅ ରହିଛି ସେଠାରୁ ପାଣି ନେବାକୁ ଲୋକଙ୍କ ଲମ୍ବା ଧାଡି ଲାଗୁଛି। ଏହି ନେଇ ଆର୍ଡବ୍ଲ୍ୟୁଏସ୍ଏସ୍ର ଯନ୍ତ୍ରୀ ପିଥା ସରେନଙ୍କୁ ପଚାରିବାରୁ ସେ କହିଲେ, ପ୍ରକଳ୍ପ କାର୍ଯ୍ୟ ଶେଷ ହୋଇଯାଇଛି। ମାତ୍ର ବିଦ୍ୟୁତ୍ ସଂଯୋଗ ହୋଇନାହିଁ। ଆମେ ଏ ସମ୍ପର୍କରେ ବିଦ୍ୟୁତ୍ ଅଧିକାରୀଙ୍କୁ ବାରମ୍ବାର ଜଣାଇଥିଲେ ସୁଦ୍ଧା ସେମାନେ ଆମ କଥା ଶୁଣୁନାହାନ୍ତି। ଫଳରେ ଆମେ ଲୋକଙ୍କୁ ପାଣି ଯୋଗାଇ ଦେଇପାରୁନାହୁଁ ବୋଲି ସରେନ କହିଛନ୍ତି।
