ଥୁଆମୁଳ ରାମପୁର,୧୩।୨(ଦୁର୍ଗା କୀର୍ତ୍ତି): ସରକାରଙ୍କ ପକ୍ଷରୁ ଲୋକମାନଙ୍କୁ ପାଇପ ଯୋଗେ ବିଶୁଦ୍ଧ ପାନୀୟ ଜଳ ଯୋଗାଇ ଦେବା ପାଇଁ ବିଭିନ୍ନ ଯୋଜନା ହାତକୁ ନେଇଛନ୍ତି। ସେଥିପାଇଁ କଳାହାଣ୍ତି ଜିଲା ଆଦିବାସୀ ଅଧ୍ୟ୍ୟୁଷିତ ଥୁଆମୁଳ ରାମପୁର ବ୍ଳକର ୨୪ ଟି ପଞ୍ଚାୟତର ଗ୍ରାମଗୁଡିକରେ ବସୁଧା ଯୋଜନା କାର୍ଯ୍ୟ କରୁଛି। ଏଥିପାଇଁ ସରକାରଙ୍କ ରାଜକୋଷରୁ କୋଟି କୋଟି ଟଙ୍କା ଖର୍ଚ୍ଚ କରାଯାଉଛି। ହେଲେ କିଛି ଠିକାଦାରଙ୍କ ସହିତ ବିଭାଗୀୟ କର୍ମଚାରୀ ହାତ ମିଳାଇ ନିମ୍ନମାନର କାର୍ଯ୍ୟ କରିବା ସହିତ ନିମ୍ନମାନର ପାଇପ୍ ବ୍ୟବହାର ଯୋଗୁ ଅନେକ ସ୍ଥାନରେ ପାଇପ ଫାଟି ଯାଉଥିବା ଦେଖିବାକୁ ମିଳୁଛି l ଅପରପକ୍ଷରେ ବସୁଧା ଯୋଜନାରରୁ ପାଣି ନ ପାଇ ଗ୍ରାମବାସୀ ମାନେ ବାରମ୍ବାର ବିଭାଗୀୟ କର୍ମଚାରୀଙ୍କୁ ଜଣାଇ ଆସୁଥିଲେ ମଧ୍ୟ କୌଣସି ସୁଫଳ ମିଳିପାରୁ ନାହିଁ।
ଘଟଣାରୁ ପ୍ରକାଶ ଯେ, ସବୁ ଗ୍ରାମରେ ବସୁଧା ଯୋଜନା କାର୍ଯ୍ୟ ପାଇଁ ଠିକାଦାରମାନଙ୍କୁ ଇ-ଟେଣ୍ଡର ଜରିଆରେ କାର୍ଯ୍ୟାଦେଶ ଦିଆଯାଇଛି। ଏଥିରେ ବୋରୱେଲ ଖନନ, ପମ୍ପ ହାଉସ ନିର୍ମାଣ, ଓଭର ହେଡ ଟାଙ୍କି ନିର୍ମାଣ, ଟାଙ୍କି ଠାରୁ ହିତାଧିକାରୀଙ୍କ ଘର ପର୍ଯ୍ୟନ୍ତ ମାଟିତଳେ ପାଇପ ବିଛାଇବା, ପ୍ରତ୍ୟେକଙ୍କ ଘର ସାମ୍ମାରେ ଟ୍ୟାପ ଷ୍ଟାଣ୍ତ ନିର୍ମାଣ କରିବା ଇତ୍ୟାଦି କାର୍ଯ୍ୟ ପାଇଁ କାର୍ଯ୍ୟାଦେଶ ଦିଆଯାଇଛି। ହେଲେ ଦୁର୍ଗମ ଅଞ୍ଚଳ ମାନଙ୍କରେ ଲାଭଖୋର ଠିକାଦାର ଅର୍ଥ ଆତ୍ମସାତ କରିବା ପାଇଁ ଯୋଜନା ପ୍ରସ୍ତୁତ କରୁଛନ୍ତି ବୋଲି ଗ୍ରାମବାସୀ ଅଭିଯୋଗ କରୁଛନ୍ତି। ଏଭଳି ଘଟଣା ଥୁଆମୁଳ ରାମପୁର ବ୍ଳକର ଅନେକ ପଞ୍ଚାୟତରେ ଏପରି କାର୍ଯ୍ୟରେ ବାଟମାରଣା ହୋଇଥିବା ଅନୁମାନ କରାଯାଏ। କେଉଁଠି ଓଭର ହେଡ ଟାଙ୍କିକୁ ପାଣି ଉଠୁନାହିଁ, ତୋ କେଉଁଠି ଓଭର ହେଡ ଟାଙ୍କି ନିର୍ମାଣ ଶେଷ ହୋଇ ନ ଥିବାବେଳେ କେଉଁଠି ନିମ୍ନମାନର ପାଇପ ବିଛାଯାଇଥିବା ଯୋଗୁ ପାଇପ ଫାଟିଯାଉଛି। ପୁଣି କେଉଁଠି ଓଭର ହେଡ ଟାଙ୍କି ନିର୍ମାଣ ଓ ପାଇପ ବିଛା କାମ ଶେଷ ହୋଇଛି ହେଲେ ପାଣି ଯୋଗାଣ ହୋଇ ପାରିନାହିଁ। ସେପରି କିଛି ସ୍ଥାନରେ ଓଭର ହେଡ ଟାଙ୍କିରୁ ପାଣି ଝରୁଛି।
ସିନ୍ଧିପଦର ଗ୍ରାମର ନିଚେମସ୍କା, କନ୍ଦାଝିପି, ପଲସାପଡା, ପୋଈଗୁଡା ସମାପଲା ଗାଁ ମାନଙ୍କରେ ଓଭର ହେଡ ଟାଙ୍କି ନିର୍ମାଣର କାର୍ଯ୍ୟ ସମାପ୍ତ ଅବଧି ଶେଷ ହୋଇ ୨/୩ ବର୍ଷ ଅତିକ୍ରମ କରିସାରିଥିଲେ ମଧ୍ୟ ମାତ୍ର ୫୦% କାମ ସରିଛି l ସରକାରଙ୍କ ଜନ କଲ୍ୟାଣ ଯୋଜନା ବସୁଧା ଯୋଜନାର କୋଟି କୋଟି ସରକାରୀ ଟଙ୍କା ଖୁଲମଖୋଲା ଲୁଟୁଛନ୍ତି ନିତ୍ୟାନନ୍ଦ ପଣ୍ଡା ଏବଂ ଅନ୍ୟ ଠିକା ସଂସ୍ଥା ବୋଲି ସିଧା ଗ୍ରାମବାସୀ ଅଭିଯୋଗ କରୁଛନ୍ତି l ଏନେଇ ବାରମ୍ବାର ଅଭିଯୋଗ କରିଆସୁଥିଲେ ମଧ୍ୟ କେହି ଶୁଣୁ ନ ଥିବା ପ୍ରକାଶ କରିଛନ୍ତି ଉକ୍ତ ଗ୍ରାମବାସୀ।
ଏଠାରେ ପ୍ରକାଶ ଥାଉକି, ଏହି ସିନ୍ଧିପଦର ଗ୍ରାମ ପଞ୍ଚାୟତକୁ ପୂର୍ବ ବିଜେଡି ସରକାରଙ୍କ ସମୟରେ ଆଦର୍ଶ ପଞ୍ଚାୟତ ଭାବରେ ଘୋଷଣା କରିଛନ୍ତି। ମାତ୍ର ଆଦର୍ଶ ପଞ୍ଚାୟତ ଭାବରେ ପରିଚୟ ପାଇଥିବା ପଞ୍ଚାୟତର ଅବସ୍ଥା ଅତି ଶୋଚନୀୟ ହୋଇ ରହିଛି। ନା ମିଳୁଛି ସ୍ବଚ୍ଛ ପାନୀୟ ଜଳ ନା ମିଳୁଛି ଇଣ୍ଟରନେଟ ସେବା ବୋଲି ସ୍ଥାନୀୟ ସରପଞ୍ଚ ଗୀତାଞ୍ଜଳି ମାଝୀ ଗଣମାଧ୍ୟମକୁ ଦୁଃଖର ସହ ଜଣାଇଛନ୍ତି।
ଏ ସମ୍ପର୍କରେ କାମ ପାଇଥିବା ଠିକା ସଂସ୍ଥା ନିତ୍ୟାନନ୍ଦ ପଣ୍ଡାଙ୍କୁ ପଚାରିଲେ ମୋ ଇଚ୍ଛା ମୁଁ ଯେମିତି କାମ କରିବି କିମ୍ବା କାମ ନ କରିବି ଟଙ୍କା ଉଠାଇବି ସେଥିରେ ତୁମମାନଙ୍କ କ’ଣ ଯାଉଛି ବୋଲି ଉତ୍ତର ରଖିଥିଲେ। ଏନେଇ ଜଳ ଓ ପରିମଳ ବିଭାଗର କାର୍ଯ୍ୟନିର୍ବାହୀ ଯନ୍ତ୍ରୀ ମନ୍ମଥ ମୁର୍ମୁଙ୍କୁ ପଚାରିଲେ ଜିଲାସ୍ତରୀୟ ବୈଠକରେ ବାରମ୍ବାର ଜିଲାପାଳ ଉକ୍ତ ଠିକାସଂସ୍ଥାକୁ ତାଗିଦ କରୁଛନ୍ତି। ଜିଲାପାଳଙ୍କ କଥା ସେମାନେ ବେଖାତିର କରୁଛନ୍ତି ବୋଲି ସେ କହିଚନ୍ତି। ତେବେ ଦେଖିବାକୁ ବାକି ରହିଲା ଆଗକୁ ଗ୍ରୀଷ୍ମ ଋତୁ ଆସୁଛି ଜିଲା ପ୍ରଶାସନ ତଥା ଡବଲ ଇଞ୍ଜିନ ଭାଜପା ସରକାର ଏହା ଉପରେ କିଭଳି ପଦକ୍ଷେପ ଗ୍ରହଣ କରୁଛନ୍ତି l
