ମାଥିଲି,୧୫ା୪(ଡି.ଏନ.ଏ.) ମାଲକାନଗିରି ଜିଲା ମାଥିଲି ବ୍ଲକର ଘାଟି ଉପରେ ଥିବା ଗ୍ରାମଗୁଡ଼ିକରେ ପହଞ୍ଚତ୍ପାରିନି ଏଯାଏ ମୌଳିକ ସୁବିଧା ସୁଯୋଗ। ଏପର୍ଯ୍ୟନ୍ତ ଗ୍ରାମବାସୀଙ୍କ ପାଇଁ ରାସ୍ତାଘାଟ ସ୍ବପ୍ନ ପାଲଟିଛି। ଚାଉଳ ଓ ଭତ୍ତା ପାଇଁ ୧୩ କି.ମି. ପାହାଡ଼ ଚଢ଼ି ପଞ୍ଚାୟତ କାର୍ଯ୍ୟାଳୟକୁ ଯିବାକୁ ପଡୁଛି। ସ୍ବାସ୍ଥ୍ୟସେବା ମଧ୍ୟ ଲୋକଙ୍କୁ ମିଳୁନି। ପାନୀୟଜଳ ଅଭାବ ମଧ୍ୟ ଲାଗି ରହିଛି। ଏପରି ଦେଖିବାକୁ ମିଳିଛି ମାଲକାନଗିରି ଜିଲା ମାଥିଲି ବ୍ଲକ ଟେମୁରୁପଲ୍ଲି ପଞ୍ଚାୟତର ତୁଳସୀ, କେରମେଟି, ଚାରକଟୋଲା ଓ ମୁରଇବେଡା ଗ୍ରାମରେ। ଏକଦା ଏଠାରେ ମାଓବାଦୀଙ୍କ ରାଜୁତି ଚାଲୁଥିଲା। ତୁଳସୀ ପାହାଡ଼କୁ ସେମାନେ କବ୍ଜା କରି ରଖିଥିଲେ। ଏବେ ସ୍ଥିତି ବଦଳିଛି। ଟେମୁରୁପଲ୍ଲିରେ ବିଏସ୍ଏଫ୍ କ୍ୟାମ୍ପ ପ୍ରତିଷ୍ଠା ହେବା ପରେ ଉକ୍ତ ଅଞ୍ଚଳର ବିକାଶ ନେଇ ଲୋକଙ୍କ ଆଶା ଥିଲା, ମାତ୍ର ସେ ଆଶା ଏବେ ମଉଳିଯାଇଛି। ଗ୍ରାମଗୁଡ଼ିକରେ ବିଦ୍ୟାଳୟ ଅଛି, ମାତ୍ର ନିଯୁକ୍ତି ପାଇଥିବା ଶିକ୍ଷକଙ୍କ ଓଡ଼ିଆ ଭାଷା ପିଲା ବୁଝିପାରୁନାହାନ୍ତି। ଶିକ୍ଷକ ଓଡ଼ିଆ ଭାଷାରେ କଥାହେଲେ ପିଲା ଦୁରୁଆ ଓ କୋୟା ଭାଷାରେ କଥାବାର୍ତ୍ତା କରନ୍ତି। ଏଠି ପିଲାଙ୍କ ଭାଷା ଶିକ୍ଷକ ବୁଝୁ ନ ଥିବା ବେଳେ ପିଲା ଶିକ୍ଷକଙ୍କ ଭାଷା ବୁଝିପାରୁନାହାନ୍ତି। ଏପରିସ୍ଥଳେ ପ୍ରାଥମିକ ଶିକ୍ଷା ଉପରୋକ୍ତ ଗ୍ରାମାଞ୍ଚଳରେ ବିପର୍ଯ୍ୟସ୍ତ ହୋଇପଡ଼ିଛି। ଜିଲା ପ୍ରଶାସନ ଏଥିପ୍ରତି ଦୃଷ୍ଟି ଦେଇ ସମସ୍ୟା ସମାଧାନ କରିବାକୁ ଦାବି ହେଉଛି।
