ଦାରିଙ୍ଗବାଡି, ୨୫।୫ (ଅରୁଣ ସାହୁ):କନ୍ଧମାଳ ଜିଲା ଦାରିଙ୍ଗବାଡି ବ୍ଲକ ସଭାଗୃହ ପରିସରରେ ସୋମବାର ଜିଲାପାଳଙ୍କ ଅଭିଯୋଗ ଶୁଣାଣି ଚାଲିଥିବାବେଳେ ଦେଖିବାକୁ ମିଳିଛି ଏକ ନିଆରା ଘଟଣା। ଲୋକଙ୍କ ଭିଡ଼କୁ ନିୟନ୍ତ୍ରଣ କରିବା ପାଇଁ ଡ୍ୟୁଟିରେ ଥିବା ଜଣେ ସୁରକ୍ଷାକର୍ମୀ ଦିବ୍ୟାଙ୍ଗ ଲୋକଙ୍କୁ ଟ୍ରାଇ ସାଇକଲରେ ନେଇ ଜିଲାପାଳଙ୍କ ଅଭିଯୋଗ ଶୁଣାଣି ପ୍ରକୋଷ୍ଠରେ ସୁରକ୍ଷିତ ଭାବେ ପହଞ୍ଚାଇଥିଲେ। ତାଙ୍କ ଅଭିଯୋଗକୁ ଜିଲାପାଳ ଶୁଣିବା ପରେ ପୁଣି ସୁରକ୍ଷିତ ଭାବେ ବାହାରକୁ ଆଣିବାରେ ସାହାଯ୍ୟ କରୁଥିଲେ। ସେ ସୁରକ୍ଷକର୍ମୀଜଣଙ୍କ ଦାରିଙ୍ଗବାଡି ଥାନା ବାରକରେ ରହୁଥିବା ଓଏସଓପି ଥାର୍ଡ଼ ଏସଏସବିଏନର ବସନ୍ତ କୁମାର ପାତ୍ର ବୋଲି ଜଣାପଡିଛି। ତାଙ୍କୁ ଏହିଭଳି କାର୍ଯ୍ୟ ପାଇଁ ଚାରିଆଡୁ ପ୍ରଂଶସା ମିଳିଛି। ଏହା କରିବାକୁ ତାଙ୍କୁ କେହି ନିର୍ଦ୍ଦେଶ ଦେଇ ନ ଥିବା ଓ ଦିବ୍ୟାଙ୍ଗଙ୍କୁ ସୁବିଧାରେ ତାଙ୍କ ଅଭିଯୋଗ କରିବାକୁ ଜିଲାପାଳଙ୍କ ନିକଟରେ ସେ ପହଞ୍ଚାଇଥିବା କହିଛନ୍ତି। ସେ ଏହି ଅଭିଯୋଗ ଶୁଣାଣିକୁ ଆସୁଥିବା ସମସ୍ତ ଦିବ୍ୟାଙ୍ଗଙ୍କୁ ସହଯୋଗ କରିଥିବା କହିଛନ୍ତି। ସୁରକ୍ଷାକର୍ମୀଙ୍କ ଏଭଳି ସେବା ମନୋବୃତ୍ତି ଦେଖି ସ୍ଥାନୀୟ ଆଇଆଇସି ସଂଗ୍ରାମ କେଶରୀ ଜେନା, ବିଡ଼ିଓ ପ୍ରୀତିରଞ୍ଜନ ରଥ ଓ ସମସ୍ତ ସରକାରୀ ଓ ବେସରକାରୀ କର୍ମଚାରୀ ସୁରକ୍ଷାକର୍ମୀ ବସନ୍ତଙ୍କୁ ସାଧୁବାଦ ଦେଇଛନ୍ତି।ସମସ୍ତଙ୍କ ମୁହଁରେ ଗୋଟିଏ କଥା ସୁରକ୍ଷକର୍ମୀ ହେବ ତ ବସନ୍ତଙ୍କ ଭଳି ବୋଲି ଚର୍ଚ୍ଚା ହେଉଥିଲା।
Dharitri – Odisha’s No.1 Odia Daily
