ବାରିପଦା ଅଫିସ,୩୦।୬: ଦ୍ୱିତୀୟ ଶ୍ରୀକ୍ଷେତ୍ର ଭାବେ ପରିଚିତ ମୟୂରଭଞ୍ଜ ଜିଲା ବାରିପଦାସ୍ଥିତ ଶ୍ରୀଶ୍ରୀ ହରିବଳଦେବ ଜୀଉ ବିଜେଙ୍କ ରଥଯାତ୍ରା ଶାନ୍ତିଶୃଙ୍ଖଳାର ସହିତ ସମ୍ପନ୍ନ କରିବା ନେଇ ପ୍ରଶାସନ ପକ୍ଷରୁ ତତ୍ପତ୍ରତା ପ୍ରକାଶ ପାଇଛି। ଜିଲାପାଳ ବିନୀତ ଭରଦ୍ୱାଜ ଓ ଏସ୍ପି ଋଷିକେଶ ଦ୍ୟାନଦେଓ ଖିଲାରୀ ବୁଧବାର ବଡ଼ଦାଣ୍ଡ, ରଥଖଳା ବୁଲି ଦେଖିବା ସହ ରଥ କାର୍ଯ୍ୟର ଅଗ୍ରଗତି ସମ୍ପର୍କରେ ଅନୁଧ୍ୟାନ କରିଛନ୍ତି।
ଧରି କରୋନା କଟକଣା ଯୋଗୁ ରଥଯାତ୍ରା ବନ୍ଦ ରହିଥିବାରୁ ଚଳିତ ବର୍ଷ ପ୍ରବଳ ଜନସମାଗମ ହେବା ନେଇ ସମ୍ଭାବନା ରହିଛି। ବାରିପଦା ଉପଜିଲାପାଳ ତଥା ଦେବୋତ୍ତର ଅଧିକାରୀ ଅନ୍ୟା ଦାସ ରଥଯାତ୍ରା ପରିଚାଳନା ସମ୍ପର୍କିତ ପ୍ରସ୍ତୁତି ଓ ଏହାର ସ୍ଥିତି ସମ୍ପର୍କରେ ଜଣାଇଛନ୍ତି। ରଥ ନିର୍ମାଣ, କର୍ଡନ ବ୍ୟବସ୍ଥା, ବଡ଼ଦାଣ୍ଡରେ ଅସ୍ଥାୟୀ ଶିବିର, ଆମ୍ବୁଲାନ୍ସ ସେବା, ପାନୀୟ ଜଳ, ପରିମଳ, ଅଗ୍ନି ନିର୍ବାପକ ବ୍ୟବସ୍ଥା ସହିତ ସ୍ବେଚ୍ଛାସେବୀଙ୍କୁ ନିୟୋଜିତ କରାଯିବା ଆଦି ପ୍ରସଙ୍ଗରେ ନିଆଯାଇଥିବା ପଦକ୍ଷେପ ସମ୍ପର୍କରେ ସୂଚନା ଦେଇଛନ୍ତି। ଠାକୁରଙ୍କ ନୀତିକାନ୍ତି ସୂଚାରୁ ରୂପେ ପରିଚାଳନା ପାଇଁ ସେବାୟତମାନଙ୍କ ସହିତ ଜିଲାପାଳ ଭରଦ୍ୱାଜ ଆଲୋଚନା କରିଛନ୍ତି। ଏଥିରେ ବିଭିନ୍ନ ବିଭାଗର ଅଧିକାରୀମାନଙ୍କ ସହ ପୋଲିସ ବିଭାଗର ଅଧିକାରୀମାନେ ଉପସ୍ଥିତ ଥିଲେ। ରଥଯାତ୍ରା ନିମନ୍ତେ ୨୫ପ୍ଲାଟୁନ ଫୋର୍ସ, ୫୦ଅଫିସର, ଆବଶ୍ୟକ ମୁତାବକ ସିସିଟିଭି କ୍ୟାମେରା, ଜିଲାର ପ୍ରବେଶ ପଥ ଗୁଡ଼ିକରେ କଡ଼ାକଡ଼ି ଯାଞ୍ଚ କରାଯିବା ସହିତ ଚୋରି, ଛିନତାଇ ଓ ପକେଟମାର ଭଳି ଅପରାଧିକ କାର୍ଯ୍ୟକଳାପ ରୋକିବା ନିମନ୍ତେ ସାଦା ପୋଷାକଧାରୀ ପୋଲିସ ନିୟୋଜନ ସମ୍ପର୍କରେ ଆଲୋଚନା ହୋଇଥିଲା।
ଯାନବାହନ ଚଳାଚଳରେ କଟକଣା
ଚଳିତବର୍ଷ ବାରିପଦା ରଥଯାତ୍ରା ନିମନ୍ତେ ପୋଲିସ ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି ଗ୍ରହଣ କରାଯାଇଛି। ପ୍ରବଳ ଜନସମାଗମକୁ ଦୃଷ୍ଟିରେ ରଖି ଜିଲା ଆରକ୍ଷୀ ଅଧିକ୍ଷକ ଋଷିକେଷ ଦ୍ୟାନଦେଓ ଖିଲାରୀ କଟକଣା ଜାରି କରିଛନ୍ତି। ଜୁଲାଇ ୧ତାରିଖ ସକାଳ ୬ଟାରୁ ୧୧ତାରିଖ ପର୍ଯ୍ୟନ୍ତ ଏହି କଟକଣା ବଳବତ୍ତର ରହିବ ବୋଲି ବିଭାଗ ସୂତ୍ରରୁ ଜଣାପଡିଛି। ସହର ଦେଇ ଚଳପ୍ରଚଳ କରୁଥିବା ଯାନବାହାନ, ବସ୍, ଟ୍ରକ୍, ଟ୍ୟାକ୍ସି ଓ ଅଟୋରିକ୍ସା ମାଲିକ ସଂଘମାନେ ଏଥିରେ ସହଯୋଗ କରିବାକୁ ନିବେଦନ କରାଯାଇଛି। ଉଦଳା ଓ ବାଲେଶ୍ୱର ଅଭିମୁଖେ ଯାଉଥିବା ବସ୍, ଟ୍ରକ୍ଗୁଡ଼ିକ ସତ୍ୟସାଇ ଛକ ଦାରଗାଡାହି ଗୋଲେଇ ଓ ପାଲବଣୀ ଗୋଲେଇ ଦେଇ ଯାତାୟାତ କରିବେ। ହରିବଳଦେବଜୀଉ ମନ୍ଦିରଠାରୁ ମା’ ଅମ୍ବିକା ମନ୍ଦିର ଛକ ପର୍ଯ୍ୟନ୍ତ ବଡ଼ଦାଣ୍ଡରେ କୌଣସି ଯାନବାହାନ ଚଳାଚଳ ନ କରିବା ସହ ନିର୍ଦ୍ଧାରିତ ସ୍ଥାନ ବ୍ୟତିତ ଅନ୍ୟ କୌଣସି ସ୍ଥାନରେ ଗାଡ଼ି ରଖିବାକୁ ବାରଣ କରାଯାଇଛି। ୧,୨,୩,୯,୧୦ ଓ ୧୧ ତାରିଖ ଦିନ ପହଣ୍ଡି ଓ ରଥଟଣାର ଦୁଇ ଘଣ୍ଟା ପୂର୍ବରୁ କୌଣସି ସାଇକେଲ, ରିକ୍ସା, ଅଟୋରିକ୍ସା, ଟ୍ରଲିରିକ୍ସା ବଡ଼ଦାଣ୍ଡକୁ ନ ଆସିବାକୁ କୁହାଯାଇଛି। ଏହି କଟକଣା କର୍ତ୍ତବ୍ୟରତ ମାଜିଷ୍ଟ୍ରେଟ, ପୋଲିସ, ଦମକଳ,ଆମ୍ବୁଲାନ୍ସ ଏବଂ ଦେବୋତ୍ତର ବିଭାଗ ଗାଡ଼ି ପ୍ରତି ଲାଗୁ ହେବ ନାହିଁ ବୋଲି ସୂଚନା ମିଳିଛି।