ବରଗଡ଼,୭।୫(ପ୍ରେମାନନ୍ଦ ଖମାରୀ): ବରଗଡ଼ ସରକାରୀ ବସଷ୍ଟାଣ୍ଡର ସମସ୍ୟା ଅସମାହିତ ହୋଇ ରହିଛି। ଏଠାରେ ପରିମଳ ବ୍ୟବସ୍ଥା ଭୁଷୁଡ଼ି ପଡ଼ିଛି। ଡ୍ରେନେଜ ଅବ୍ୟବସ୍ଥା ନିତିଦିନିଆଁ ଘଟଣା ହୋଇଥିବାବେଳେ ବର୍ତ୍ତମାନ ବସଷ୍ଟାଣ୍ଡ ପରିସରରେ ରହିଥିବା ଶୌଚାଳୟରେ ମଧ୍ୟ ତାଲା ଝୁଲୁଛି। ଫଳରେ ଏଠାକୁ ଆସୁଥିବା ଯାତ୍ରୀମାନେ ହଟହଟା ହେଉଛନ୍ତି। ବସଷ୍ଟାଣ୍ଡ କର୍ତ୍ତୃପକ୍ଷଙ୍କ ସମେତ ସ୍ଥାନୀୟ ପୌର ପ୍ରଶାସନ ଏବଂ ଜନ ପ୍ରତିନିଧିଙ୍କ ଆଖି ଆଗରେ ଏଭଳି ଅବ୍ୟବସ୍ଥା ଲାଗି ରହିଛି। ଏହାସତ୍ତ୍ୱେ ଏହାର କୌଣସି ପ୍ରତିକାର ବ୍ୟବସ୍ଥା କରାଯାଉ ନାହିଁ। ଏହାକୁ ନେଇ ସାଧାରଣରେ ଅସନ୍ତୋଷ ବଢ଼ି ଚାଲିଛି।
ଉକ୍ତ ସରକାରୀ ବସଷ୍ଟାଣ୍ଡ ରାଜ୍ୟର ସର୍ବପୁରାତନ ବସଷ୍ଟାଣ୍ଡ ମଧ୍ୟରୁ ଗୋଟିଏ ଅଟେ। ରାଜ୍ୟର ଅନ୍ୟ ସରକାରୀ ବସଷ୍ଟାଣ୍ଡ ଗୁଡ଼ିକୁ ଆଧୁନିକୀକରଣ ତଥା ନବୀକରଣ କରାଯାଇ ଥିବାବେଳେ ଏହି ବସଷ୍ଟାଣ୍ଡ ପ୍ରତି ସରକାର ଆଖି ବୁଜି ଦେଇଛନ୍ତି। ଉକ୍ତ ବସଷ୍ଟାଣ୍ଡ ସ୍ଥାନୀୟ ଘରୋଇ ବସଷ୍ଟାଣ୍ଡ ପାଖକୁ ସ୍ଥାନାନ୍ତର କରାଯିବ ବୋଲି ସରକାରୀସ୍ତରରେ ପରିକଳ୍ପନା କରାଯାଇଛି। ଏଥିପାଇଁ ସ୍ଥାନୀୟ ବିଧାୟକ ଏବଂ ବିଭାଗୀୟ ଅଧିକାରୀବୃନ୍ଦ ଜାଗା ଚିହ୍ନଟ କରିଛନ୍ତି। ତେବେ ବର୍ତ୍ତମାନ ସହର ମଧ୍ୟରେ ରହିଥିବା ସର୍ବପୁରାତନ ସରକାରୀ ବସଷ୍ଟାଣ୍ଡରୁ ଯାତ୍ରୀମାନଙ୍କୁ ସର୍ବନିମ୍ନ ମୌଳିକ ସୁବିଧା ଅପହଞ୍ଚ ହୋଇପଡ଼ି ଥିବାବେଳେ ନୂଆ ସରକାରୀ ବସଷ୍ଟାଣ୍ଡ ମଧ୍ୟ ଜାଗା ଚିହ୍ନଟରେ ସୀମିତ ରହି ଯାଇଛି।
ବରଗଡ଼ ସରକାରୀ ବସଷ୍ଟାଣ୍ଡ ଦେଇ ରାଜ୍ୟର ସମ୍ବଲପୁର, ବଲାଙ୍ଗିର, ସୁନ୍ଦରଗଡ଼, ଭୁବନେଶ୍ୱର, କେନ୍ଦୁଝର, ଭବାନୀପାଟଣା, ଦେବଗଡ଼, ସୋନପୁର ଆଦି ଜିଲାକୁ ନିୟମିତ ବସ୍ ଯାତାୟାତ କରୁଛି। ସେହିପରି ବରଗଡ଼-ସମ୍ବଲପୁର ମଧ୍ୟରେ ସିଟିବସ୍ ଯାତାୟାତ କରୁଥିବାବେଳେ ଏଠାରୁ ବରଗଡ଼ ବ୍ଲକର ବିଭିନ୍ନ ବ୍ଲକକୁ ଲକ୍ଷ୍ମୀ ବସ୍ ମଧ୍ୟ ପ୍ରତିଦିନ ଯିବା ଆସିବା କରୁଛି। ସ୍କୁଲ, କଲେଜ ଛାତ୍ରୀଛାତ୍ରଙ୍କଠାରୁ ଆରମ୍ଭ କରି ଚାକିରିଆ, ଚାଷୀ, ବ୍ୟବସାୟୀଙ୍କ ସମେତ ସାଧାରଣ ଜନତା ଉକ୍ତ ବସଷ୍ଟାଣ୍ଡ ଉପରେ ନିର୍ଭର କରିଥାନ୍ତି। ଫଳରେ ଏହି ବସଷ୍ଟାଣ୍ଡରେ ସବୁଦିନ ଯାତ୍ରୀଙ୍କ ଗହଳି ଲାଗି ରହିଥାଏ।
ବସଷ୍ଟାଣ୍ଡରେ ବସ୍ ସଂଖ୍ୟା ବଢୁଛି। ଅନୁରୂପଭାବେ ଯାତ୍ରୀଙ୍କ ସମସ୍ୟା ମଧ୍ୟ ବୃଦ୍ଧି ପାଉଛି। କିନ୍ତୁ ବସଷ୍ଟାଣ୍ଡର ସମସ୍ୟା ଯେଉଁ ତିମିରେକୁ ସେହି ତିମିରେ ରହିଯାଇଛି। ଏଠାରେ ସାମାନ୍ୟ ବର୍ଷା ହେଲେ ବସଷ୍ଟାଣ୍ଡ ପରିସରରେ ନର୍ଦ୍ଦମା ପାଣି ଜମି ରହୁଛି। ସେହିପରି ଏଠାରେ ଥିବା ଶୌଚାଳୟର ଅବସ୍ଥା ମଧ୍ୟ ସମାନ ଅଟେ। ଥରେ ଖରାପ ହେଲେ ମାସମାସ ଧରି ଶୌଚାଳୟରେ ତାଲା ଝୁଲୁଛି। ବସଷ୍ଟାଣ୍ଡରେ ଯାତ୍ରୀମାନଙ୍କ ଆବଶ୍ୟକତାକୁ ଦୃଷ୍ଟିରେ ରଖି ତତ୍କାଳୀନ ବରଗଡ଼ ଲୋକସଭା ଏମ୍ପି ସଞ୍ଜୟ ଭୋଇଙ୍କ ଅନୁଦାନ ପାଣ୍ଠିରେ ଉକ୍ତ ବସଷ୍ଟାଣ୍ଡ ପରିସରରେ ଶୌଚାଳୟ ଏବଂ ଥଣ୍ଡା ପାନୀୟଜଳ ପ୍ରକଳ୍ପ ହୋଇଛି।
ତେବେ ଶୌଚାଳୟ ବାରମ୍ବାର ଖରାପ ହେବା ଯୋଗୁ ଗତ ସାଧାରଣ ନିର୍ବାଚନ ପୂର୍ବରୁ ଏହାର ନବୀକରଣ କରାଯାଇଥିଲା। ଶୌଚାଳୟ ମଧ୍ୟ କାର୍ଯ୍ୟକ୍ଷମ ହୋଇଥିଲା। ପୌର ପ୍ରଶାସନ ଏହାର ଦାୟିତ୍ୱ ନେଇଥିଲା ଏବଂ ଯାତ୍ରୀମାନେ ମଧ୍ୟ ଉପକୃତ ହେଉଥିଲେ। କିନ୍ତୁ ବର୍ତ୍ତମାନ ଏହି ଶୌଚାଳୟ ପୁଣି ଅଚଳ ହୋଇ ପଡ଼ିଛି ଏବଂ ସେଠାରେ ତାଲା ଝୁଲୁଛି। ଫଳରେ ପରିସ୍ରା ପାଇଁ ଯାତ୍ରୀମାନଙ୍କୁ ହଟହଟା ହେବାକୁ ପଡୁଛି। ଅନ୍ୟପଟେ ଶୌଚାଳୟ ପଛପଟ ଖୋଲା ପରିସ୍ରାଗାର ପାଲଟିଛି। କେବଳ ସେତିକି ନୁହେଁ, ଶୌଚାଳୟ ପାଖରେ ନର୍ଦ୍ଦମା ପାଣି ଦୀର୍ଘଦିନ ଧରି ଜମି ରହୁଥିଲେ ସୁଦ୍ଧା ତାର ନିଷ୍କାସନ ବ୍ୟବସ୍ଥା ହେଉନାହିଁ। ଫଳରେ ମଶା, ମାଛି ସମେତ ନାନା ରୋଗ ଜୀବାଣୁଙ୍କ ଉପଦ୍ରବ ଘଟୁଛି ଏବଂ ବସଷ୍ଟାଣ୍ଡ ପରିସରରେ ପୂତିଗନ୍ଧମୟ ପରିବେଶ ସୃଷ୍ଟି ହେଉଛି। ଏପରିକି କାଳବୈଶାଖୀରେ ବସଷ୍ଟାଣ୍ଡ ପରିସରରେ ଏକ ଗଛ ଢ଼ଳି ପଡ଼ିଥିଲେ ସୁଦ୍ଧା ଏପର୍ଯ୍ୟନ୍ତ ତାକୁ ସମ୍ପୂର୍ଣ୍ଣ ହଟାଯାଇ ପାରି ନାହିଁ। ଉକ୍ତ ବସଷ୍ଟାଣ୍ଡର ସମସ୍ୟାକୁ ଉଭୟ ରାଜନୈତିକ, ପ୍ରଶାସନିକସ୍ତରରେ ଅଣଦେଖା କରାଯାଉଥିବା ଯୋଗୁ ସାଧାରଣରେ ଅସନ୍ତୋଷ ତେଜି ଉଠିଛି।
