ବରଗଡ଼,୮।୫(ପ୍ରେମାନନ୍ଦ ଖମାରୀ): ବରଗଡ଼ ସରକାରୀ ବସଷ୍ଟାଣ୍ଡର ସମସ୍ୟା ଅସମାହିତ ହୋଇ ରହିଛି। ଏଠାରେ ପରିମଳ ବ୍ୟବସ୍ଥା ଭୁଷୁଡ଼ି ପଡ଼ିଛି। ଡ୍ରେନେଜ ଅବ୍ୟବସ୍ଥା ନିତିଦିନିଆଁ ଘଟଣା ହୋଇଥିବାବେଳେ ବର୍ତ୍ତମାନ ବସଷ୍ଟାଣ୍ଡ ପରିସରରେ ରହିଥିବା ଶୌଚାଳୟରେ ମଧ୍ୟ ତାଲା ଝୁଲୁଥିଲା। ଫଳରେ ଏଠାକୁ ଆସୁଥିବା ଯାତ୍ରୀମାନେ ହଟହଟା ହେଉଥିଲେ। ବସଷ୍ଟାଣ୍ଡ କର୍ତ୍ତୃପକ୍ଷଙ୍କ ସମେତ ସ୍ଥାନୀୟ ପୌର ପ୍ରଶାସନ ଏବଂ ଜନ ପ୍ରତିନିଧିଙ୍କ ଆଖି ଆଗରେ ଏଭଳି ଅବ୍ୟବସ୍ଥା ଲାଗି ରହିଥିବାବେଳେ ସମସ୍ତେ ଆଖି ବୁଜି ଦେଇଥିଲେ। ଏ ସମ୍ପର୍କରେ ବୁଧବାର ଧରିତ୍ରୀରେ ଏକ ସଚିତ୍ର ଖବର ପ୍ରକାଶ ପାଇଥିଲା। ଏହାପରେ ଗୁରୁବାର ସକାଳ ପ୍ରାୟ ୯ଟାରେ ବରଗଡ଼ ସଚେତନ ନାଗରିକ ମଞ୍ଚର ଏକ ପ୍ରତିନିଧି ଦଳ ଶୌଚାଳୟ ତାଲା ଖୋଲିଛନ୍ତି। ବସଷ୍ଟାଣ୍ଡ ସମ୍ମୁଖରେ ରହିଥିବା ଅନ୍ୟ ଏକ ଶୌଚାଳୟ କର୍ମଚାରୀ ଉକ୍ତ ଶୌଚାଳୟରେ ତାଲା ମାରିଥିଲେ। ସୂଚନା ପାଇ ବରଗଡ଼ ନାଗରିକ ମଞ୍ଚର ପ୍ରତିନିଧିମାନେ ସେଠାରେ ପହଞ୍ଚି ଥିଲେ ଏବଂ ଚାବି ମାଗି ଆଣି ତାଲା ଖୋଲିଥିଲେ। ନାଗରିକ ମଞ୍ଚର ଏହି ପ୍ରତିନିଧି ଦଳରେ ମଞ୍ଚର ଉପ ସଭାପତି ଶୟନ ପଣ୍ଡାଙ୍କ ସମେତ ଯୁଗ୍ମ ସମ୍ପାଦକ ଗୋବିନ୍ଦ ଶର୍ମା ଏବଂ ଅରୁଣ ଭୋସାଗର ଉପସ୍ଥିତ ଥିଲେ।
