ନୂଆଦିଲ୍ଲୀ,୨୦।୧୨: ବିଜୟ ମାଲ୍ୟା, ନିରବ ମୋଦି ଓ ମେହୁଲ ଚୋକ୍ସିଙ୍କ ଭଳି ପଳାତକଙ୍କଠାରୁ ୧୩,୧୦୯.୧୭ କୋଟି ଟଙ୍କା ଆଦାୟ କରିଛି। ଏ ନେଇ ସୋମବାର ଲୋକସଭାରେ କହିଛନ୍ତି ଅର୍ଥ ମନ୍ତ୍ରୀ ନିର୍ମଳା ସିଥାରମଣ। ବିରୋଧୀଙ୍କ ହଟ୍ଟଗୋଳରେ ଲୋକସଭାରେ ଅତିରିକ୍ତ ଖର୍ଚ୍ଚ ଦାବି ଉପରେ ଆଲୋଚନା ବେଳେ ପଳାତକଙ୍କ ଠାରୁ କେତେ ପରିମାଣର ସମ୍ପତ୍ତି ଜବତ ହୋଇଛି ତାହାର ତଥ୍ୟ ରଖିଥିଲେ ଅର୍ଥମନ୍ତ୍ରୀ।
ଚଳିତ ଆର୍ଥତ୍କ ବର୍ଷରେ ସରକାର ଅତିରିକ୍ତ ୩.୭୩ ଲକ୍ଷ କୋଟି ଟଙ୍କା ଖର୍ଚ୍ଚ କରିବାକୁ ଚାହୁଁଛନ୍ତି। ଏହାକୁ ଅନୁମତି ଦାବି ଉପରେ ଆଲୋଚନା ହୋଇଥିଲା।
ଏହି ଅତିରିକ୍ତ ଖର୍ଚ୍ଚ ମଧ୍ୟରୁ ଏୟାର ଇଣ୍ଡିଆର ଅବିଶିଷ୍ଟ ସମ୍ପତ୍ତି ରଖିଥିବା କମ୍ପାନୀକୁ ୬୨ ହଜାର କୋଟି ଦିଆଯିବ। ଅତିରିକ୍ତ ସାର ସବସିଡି ବାବଦକୁ ୫୮,୪୩୦ କୋଟି ଓ ଏହାର ରପ୍ତାନୀ ପାଇଁ ୫୩,୧୨୩ କୋଟି ଟଙ୍କା ବକେୟା ରହିଛି। ଜାତୀୟ ଗ୍ରାମୀଣ ନିଯୁକ୍ତି ଗ୍ୟାରେଣ୍ଟି ଫଣ୍ଡକୁ ୨୨,୦୩୯ କୋଟି ଟଙ୍କା ଦିଆଯିବ ବୋଲି ସରକାରଙ୍କ ପକ୍ଷରୁ କୁହାଯାଇଛି।
ଇଚ୍ଛାକୃତ ଡିଫଲ୍ଟରଙ୍କ ଠାରୁ କେତେ ପରିମାଣର ସମ୍ପତ୍ତି ଆଦାୟ ହୋଇଛି ପ୍ରଶ୍ନ କରାଯିବାରୁ ଅର୍ଥମନ୍ତ୍ରୀ ଉତ୍ତରରେ କହିଥିଲେ, “ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି)ଠାରୁ ଚଳିତ ବର୍ଷ ଜୁଲାଇରେ ମିଳିଥିବା ତଥ୍ୟ ମୁତାବକ ମାଲ୍ୟା, ଚୋକ୍ସି ଏବଂ ମୋଦିଙ୍କ ଭଳି ପଳାତକଙ୍କ ସମ୍ପତ୍ତି ବିକ୍ରରୁ ୧୩,୧୦୯.୧୭ କୋଟି ଟଙ୍କା ରିକଭର କରାଯାଇଛି। ଅନ୍ତିମ ଥର ମାଲ୍ୟା ଓ ଅନ୍ୟମାନଙ୍କ ସମ୍ପତ୍ତି ବିକ୍ରିରୁ ଜୁଲାଇ ୧୬ ତାରିଖରେ ୭୯୨ କୋଟି ଟଙ୍କା ଆସିଥିଲା”।
