ନୂଆଦିଲ୍ଲୀ,୧୫।୩: ସୋମବାର ଏବଂ ମଙ୍ଗଳବାର ୨ ଦିନ ସାରା ଦେଶରେ ବ୍ୟାଙ୍କ ସେବା ବାଧାପ୍ରାପ୍ତ ହୋଇପାରେ। ୟୁନାଇଟେଡ ଫୋରମ ଅଫ୍ ବ୍ୟାଙ୍କ ୟୁନିୟନ୍ସ (ୟୁଏଫ୍ବିୟୁ) ପକ୍ଷରୁ ଦେଶବ୍ୟାପୀ ଧର୍ମଘଟ ଡାକରା ଦିଆଯାଇଥିବାରୁ ବ୍ୟାଙ୍କ ସେବାରେ ଏଭଳି ବାଧା ଆସିବ ବୋଲି ଆଶଙ୍କା କରାଯାଉଛି। ୨ ରାଷ୍ଟ୍ରାୟତ୍ତ ବ୍ୟାଙ୍କର ଘରୋଇକରଣକୁ ସଂଘଗୁଡିକ ବିରୋଧ କରୁଛନ୍ତି। କର୍ମଚାରୀମାନେ ଧାରଣା ଦେବାକୁ ଥିବାରୁ ବ୍ୟାଙ୍କ ଶାଖାଗୁଡିକରେ ଉଠାଣ, ଜମା, ଚେକ୍ କ୍ଲିୟରାନ୍ସ ଏବଂ ଋଣ ମଞ୍ଜୁରୀ ଭଳି କାର୍ଯ୍ୟ ପ୍ରଭାବିତ ହେବା ନେଇ ଆଶଙ୍କା କରାଯାଉଛି।
ବ୍ୟାଙ୍କ ଅଧିକାରୀ ଏବଂ କର୍ମଚାରୀଙ୍କ ୯ ସଂଘର ଛାମୁଆ ସଙ୍ଗଠନ ୟୁଏଫ୍ବିୟୁ ସୂଚନା ମୁତାବକ, ୧୦ ଲକ୍ଷ କର୍ମଚାରୀ ଧର୍ମଘଟରେ ସାମିଲ ହେବେ। ଧର୍ମଘଟରେ କର୍ମଚାରୀ ବହୁ ମାତ୍ରାରେ ଯଦି ସାମିଲ ହୁଅନ୍ତି ତେବେ ବ୍ୟାଙ୍କ ସେବା ବାଧାପ୍ରାପ୍ତ ହେବା ନେଇ ଏସ୍ବିଆଇ ଏହାର ଗ୍ରାହକଙ୍କୁ ଅବଗତ କରାଇ ଦେଇଛି। ବ୍ୟାଙ୍କ ଶାଖା ଏବଂ କାର୍ଯ୍ୟାଳୟ ଯେଭଳି ଠିକ୍ ଭାବେ କାର୍ଯ୍ୟ କରିବ ତାକୁ ଧ୍ୟାନରେ ରଖାଯାଉଛି ବୋଲି ଏସ୍ବିଆଇ କହିଛି। ଗତ ମାସରେ ଆସିଥିବା ବଜେଟରେ ଅର୍ଥମନ୍ତ୍ରୀ ନିର୍ମଳା ସୀତାରାମନ ଘୋଷଣା କରିଥିଲେ ଯେ, ସରକାରଙ୍କ ପୁଞ୍ଜି ପ୍ରତ୍ୟାହାର ଯୋଜନା ମୁତାବକ, ୨ ରାଷ୍ଟ୍ରାୟତ୍ତ ବ୍ୟାଙ୍କର ଘରୋଇକରଣ କରାଯିବ।
ସୂଚନାଯୋଗ୍ୟ, ସରକାର ଆଇଡିବିଆଇ ବ୍ୟାଙ୍କକୁ ଘରୋଇକରଣ କରିସାରିଛନ୍ତି। ଏହି ବ୍ୟାଙ୍କରେ ରହିଥିବା ଅଧିକାଂଶ ଅଂଶଧନକୁ ସରକାର ଏଲ୍ଆଇସିକୁ ୨୦୧୯ରେ ବିକ୍ରି କରିଦେଇଥିଲେ। ଗତ ୪ ବର୍ଷରେ ୧୪ ରାଷ୍ଟ୍ରାୟତ୍ତ ବ୍ୟାଙ୍କକୁ ମିଶ୍ରଣ କରାଯାଇଛି। ଅତିରିକ୍ତ ମୁଖ୍ୟ ଶ୍ରମ ଆୟୁକ୍ତଙ୍କ ସହ ହୋଇଥିବା ବୈଠକରେ କୌଣସି ନିଷ୍କର୍ଷ ନ ବାହାରିବାକୁ ବାଧ୍ୟ ହୋଇ ଧର୍ମଘଟକୁ ଓହ୍ଲାଉଥିବା ସର୍ବଭାରତୀୟ ବ୍ୟାଙ୍କ କର୍ମଚାରୀ ସଂଘ(ଏଆଇବିଇଏ)ସାଧାରଣ ସମ୍ପାଦକ ସି.ଏଚ୍. ଭେଙ୍କଟଚଳମ କହିଛନ୍ତି। ବର୍ତ୍ତମାନ ୟୁଏଫ୍ବିୟୁରେ ଏଆଇବିଇଏ, ଏଆଇବିଓସି, ଏନ୍ସିବିଇ, ଏଆଇବିଓଏ, ବିଇଏଫ୍ଆଇ ସଂଘ ରହିଛନ୍ତି। ସେହିଭଳି ଅନ୍ୟ ସଙ୍ଗଠନଗୁଡିକ ମଧ୍ୟରେ ଆଇଏନ୍ବିଇଏଫ୍, ଆଇଏନ୍ବିଓସି, ଏନ୍ଓବିଡ୍ଲ୍ୟୁ ଏବଂ ଏନ୍ଓବିଓ ରହିଥିବା ଜଣାପଡିଛି।
