ନୂଆଦିଲ୍ଲୀ,୯।୨: ପୁରୁଷ T20 ବିଶ୍ୱକପ୍ରେ ବାଂଲାଦେଶର ଅନୁପସ୍ଥିତିକୁ ନେଇ ICC ଦୁଃଖ ପ୍ରକାଶ କରିଛି। ତେବେ ଏହି ଘଟଣା ପାଇଁ ବାଂଲାଦେଶ କ୍ରିକେଟ ବୋର୍ଡ (BCB) ଉପରେ କୌଣସି ଆର୍ଥିକ, କ୍ରୀଡ଼ା ସମ୍ବନ୍ଧୀୟ କିମ୍ବା ପ୍ରଶାସନିକ ଦଣ୍ଡ ବିଧାନ କରାଯିବ ନାହିଁ ବୋଲି ICC ସ୍ପଷ୍ଟ କରିଛି।
ICC, PCB ଏବଂ BCB ମଧ୍ୟରେ ଅନୁଷ୍ଠିତ ଏକ ସୌହାର୍ଦ୍ଦ୍ୟପୂର୍ଣ୍ଣ ଆଲୋଚନା ପରେ ଏହି ନିଷ୍ପତ୍ତି ନିଆଯାଇଛି। ବାଂଲାଦେଶକୁ ICC ଏକ ଗୁରୁତ୍ୱପୂର୍ଣ୍ଣ ‘ଫୁଲ୍ ମେମ୍ବର’ ଭାବେ ସ୍ୱୀକୃତି ଦେଇଛି ଏବଂ ସମ୍ପ୍ରତି ବିବାଦ ପାଇଁ କୌଣସି ‘ପେନାଲ୍ଟି’ ନ ଲଗାଇବାକୁ ସହମତି ପ୍ରକାଶ କରିଛି।
ବାଂଲାଦେଶର କ୍ରିକେଟ୍ ପ୍ରତି ଥିବା ଆଗ୍ରହକୁ ଦୃଷ୍ଟିରେ ରଖି ୨୦୨୮ ରୁ ୨୦୩୧ ମଧ୍ୟରେ ବାଂଲାଦେଶକୁ ଏକ ବଡ଼ ICC ଇଭେଣ୍ଟ ଆୟୋଜନ କରିବାର ସୁଯୋଗ ମିଳିବ। ୨୦୩୧ ବିଶ୍ୱକପ୍ ପୂର୍ବରୁ ଏହି ଟୁର୍ଣ୍ଣାମେଣ୍ଟ ଅନୁଷ୍ଠିତ ହେବ।
ICC ମୁଖ୍ୟ କାର୍ଯ୍ୟନିର୍ବାହୀ ସଞ୍ଜୋଗ ଗୁପ୍ତା କହିଛନ୍ତି ଯେ, ବାଂଲାଦେଶରେ ପ୍ରାୟ ୨୦ କୋଟିରୁ ଅଧିକ କ୍ରିକେଟ ପ୍ରେମୀ ଅଛନ୍ତି। ବିଶ୍ୱକପ୍ରେ ଦଳର ଅନୁପସ୍ଥିତି ସତ୍ତ୍ୱେ ବାଂଲାଦେଶରେ କ୍ରିକେଟର ବିକାଶ ପାଇଁ ICC ପୂର୍ବଭଳି ସହଯୋଗ ଜାରି ରଖିବ।
BCB ଚାହିଁଲେ ନିୟମ ଅନୁଯାୟୀ ଏହି ପ୍ରସଙ୍ଗରେ ‘ଡିସପ୍ୟୁଟ୍ ରେଜୋଲ୍ୟୁସନ କମିଟି’ (DRC) ର ଦ୍ୱାରସ୍ଥ ହୋଇପାରିବ। ICC ପକ୍ଷରୁ କୁହାଯାଇଛି ଯେ, ସେମାନେ ନିରପେକ୍ଷତା ଏବଂ ନ୍ୟାୟ ପ୍ରଦାନ ଉପରେ ଗୁରୁତ୍ୱ ଦେଉଛନ୍ତି, ଯେପରି କ୍ରିକେଟର ଏହି ସନ୍ଦର୍ଭ ଦେଶର କ୍ରିକେଟ୍ ଭବିଷ୍ୟତ ଉପରେ କୌଣସି ଖରାପ ପ୍ରଭାବ ନ ପକାଏ।
