ଢାକା/ନୂଆଦିଲ୍ଲୀ,୨।୯: ମହମ୍ମଦ ୟୁନୁସଙ୍କ ନେତୃତ୍ୱରେ ବାଂଲାଦେଶର ମଧ୍ୟବର୍ତ୍ତୀକାଳୀନ ସରକାର ଭାରତ ସହିତ ସ୍ବାକ୍ଷରିତ ବୁଝାମଣାପତ୍ର (ଏମଓୟୁ) ସମୀକ୍ଷା କରିପାରିବେ। ରବିବାର ବାଂଲାଦେଶ ବୈଦେଶିକ ମନ୍ତ୍ରୀ ତାହିଦ ହୁସେନ କହିଛନ୍ତି ଯେ ନୋବେଲ ବିଜେତା ମହମ୍ମଦ ୟୁନୁସଙ୍କ ନେତୃତ୍ୱରେ ବାଂଲାଦେଶର ମଧ୍ୟବର୍ତ୍ତୀକାଳୀନ ସରକାର ଭାରତ ସହ ସ୍ବାକ୍ଷରିତ ଏମଓୟୁ ସମୀକ୍ଷା କରିପାରିବେ। ଯଦି ସେଗୁଡିକ ଦେଶ ପାଇଁ ଲାଭଦାୟକ ବିବେଚନା କରାଯାଏ ନାହିଁ, ତେବେ ଏହି ଏମଓୟୁଗୁଡିକ ବାତିଲ ହୋଇପାରିବ। ଯଦି ଏହା ଘଟେ, ତେବେ ଏହା ବାଂଲାଦେଶ ସରକାର ନିଜ ଗୋଡରେ ନିଜେ କୁରାଢି ମାରିବା ସହିତ ସମାନ ହେବ। ତେବେ କେନ୍ଦ୍ର ସରକାରଙ୍କ ସୂତ୍ର ଅନୁଯାୟୀ ଏହି ଏମଓୟୁଗୁଡ଼ିକର ସମୀକ୍ଷା ସମ୍ପର୍କରେ କୌଣସି ସରକାରୀ ସୂଚନା ଗ୍ରହଣ କରାଯାଇ ନାହିଁ।
ଜୁନ ୨୨, ୨୦୨୪ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ବାଂଲାଦେଶର ତତ୍କାଳୀନ ପ୍ରଧାନମନ୍ତ୍ରୀ ଶେଖ ହାସିନାଙ୍କ ମଧ୍ୟରେ ୧୦ଟି ଚୁକ୍ତିନାମା ସ୍ବାକ୍ଷରିତ ହୋଇଥିଲା। ଏହି ପ୍ରମୁଖ ଚୁକ୍ତିଗୁଡ଼ିକ ମଧ୍ୟରୁ କେତେକ ହେଉଛି:
ବାଂଲାଦେଶର ନାଗରିକମାନଙ୍କୁ ମେଡିକାଲ ଇ-ଭିସା ସୁବିଧା ଯୋଗାଇବା ପାଇଁ ଘୋଷଣା। ଏଥିପାଇଁ ଭାରତ ସରକାର ବାଂଲାଦେଶର ରଙ୍ଗପୁରରେ ଏକ ଡେପୁଟି ହାଇ କମିଶନ ଖୋଲିବେ।
ରାଜଶାହୀ ଏବଂ କୋଲକାତା ମଧ୍ୟରେ ନୂତନ ଟ୍ରେନ ସେବା ।
ଚିତ୍ରକୋଣ୍ଡା ଏବଂ କୋଲକାତା ମଧ୍ୟରେ ନୂତନ ବସ ସେବା।
ଡାଲଗାଓଁ ପର୍ଯ୍ୟନ୍ତ ଗେଡେ-ଦାରସାନା ଏବଂ ହାଲଡିବାରୀ-ଚିଲାହାଟି ମଧ୍ୟରେ ମାଲଗାଡି ଟ୍ରେନ ସେବା ଆରମ୍ଭ ।
ସିରାଜଗଞ୍ଜରେ ଆଭ୍ୟନ୍ତରୀଣ କଣ୍ଟେନର ଡିପୋ (ଆଇସିଡି) ନିର୍ମାଣ।
ଭାରତୀୟ ଗ୍ରୀଡ ମାଧ୍ୟମରେ ନେପାଳରୁ ବାଂଲାଦେଶକୁ ୪୦ ମେଗାୱାଟ ବିଦ୍ୟୁତ ରପ୍ତାନି।
ଗଙ୍ଗା ଜଳ ଚୁକ୍ତି ନବୀକରଣ ଉପରେ ଆଲୋଚନା ପାଇଁ ମିଳିତ ବୈଷୟିକ କମିଟି।
ତିସ୍ତା ନଦୀର ଜଳ ବଣ୍ଟନ ବିଷୟରେ ଆଲୋଚନା କରିବା ପାଇଁ ଏକ ବୈଷୟିକ ଦଳ ପଠାଇବାକୁ ସହମତି।
