ବାଲେଶ୍ୱର,୬।୪(ମାନସ ବିଶ୍ୱାଳ): ବାଲେଶ୍ୱର ବିଧାନସଭା ନିର୍ବାଚନମଣ୍ଡଳୀରେ ପୁଣି ପୁରୁଣା ପ୍ରତିଦ୍ୱନ୍ଦ୍ୱୀଙ୍କ ମଧ୍ୟରେ ଲଢ଼େଇ ଦେଖିବାକୁ ମିଳିବ। କିଛିଦିନ ପୂର୍ବରୁ ଭାଜପା ଏହି ନିର୍ବାଚନମଣ୍ଡଳୀ ପାଇଁ ବିଧାୟକ ପ୍ରାର୍ଥୀ ଭାବେ ମାନସ ଦତ୍ତଙ୍କ ନାମ ଘୋଷଣା କରିଥିବା ବେଳେ ଶୁକ୍ରବାର ଅପରାହ୍ନରେ ବିଜେଡି ମୁଖ୍ୟ ନବୀନ ପଟ୍ଟନାୟକ ସ୍ବରୂପ ଦାସଙ୍କ ନାମ ଘୋଷଣା କରିଛନ୍ତି। ବିଜେଡି ପୁନର୍ବାର ସ୍ବରୂପଙ୍କ ଉପରେ ଭରସା କରି ମଇଦାନକୁ ଓହ୍ଲାଇଛି। ମାତ୍ର କଂଗ୍ରେସ ଏଯାବତ୍ ପ୍ରାର୍ଥୀ ଘୋଷଣା କରିନାହିଁ।
ଗତ ୨୦୧୯ ସାଧାରଣ ନିର୍ବାଚନରେ ଭାଜପା ପ୍ରାର୍ଥୀ ମଦନମୋହନ ଦତ୍ତ ୪୭.୨୬% ଭୋଟ ପାଇଥିବାବେଳେ ବିଜେଡି ପ୍ରାର୍ଥୀ ଜୀବନ ପ୍ରଦୀପ ଦାଶ ୩୮.୪୯% ଭୋଟ ପାଇ ପରାଜିତ ହୋଇଥିଲେ। ବିଧାୟକ ମଦନମୋହନଙ୍କ ମୃତ୍ୟୁ ପରେ ୨୦୨୦ ନଭେମ୍ବରରେ ଉପନିର୍ବାଚନ ହୋଇଥିଲା। ବିଜେଡିରୁ ସ୍ବରୂପ କୁମାର ଦାସ ପ୍ରାର୍ଥୀ ହୋଇ ୮୪, ୦୯୭ ଭୋଟ (୫୧.୮%) ପାଇ ବିଜୟୀ ହୋଇଥିଲେ। ତାଙ୍କର ନିକଟତମ ପ୍ରତିଦ୍ୱନ୍ଦ୍ୱୀ ଭାଜପା ପ୍ରାର୍ଥୀ ମାନସ କୁମାର ଦତ୍ତ ୭୦, ୭୪୬ ଭୋଟ୍ (୪୩.୫୮%) ପାଇ ପରାସ୍ତ ହୋଇଥିଲେ। ଅନ୍ୟପକ୍ଷରେ କଂଗ୍ରେସ ଏବଂ ନିର୍ଦଳୀୟ ପ୍ରାର୍ଥୀମାନେ ନିଜର ଅମାନତ ରଖିପାରି ନ ଥିଲେ। ପୁଣି ହେବାକୁ ଥିବା ୨୦୨୪ ସାଧାରଣ ନିର୍ବାଚନରେ ସାମ୍ନାସାମ୍ନି ହେବେ ବିଜେଡି ପ୍ରାର୍ଥୀ ସ୍ବରୂପ ଏବଂ ମାନସ। ବିଜେଡିର ଅନ୍ତର୍ଦ୍ୱନ୍ଦ୍ୱ ସ୍ବରୂପଙ୍କ ପାଇଁ ମୁଖ୍ୟ ସମସ୍ୟା ସୃଷ୍ଟି କରିବା ଅନୁମାନ କରାଯାଉଥିବା ବେଳେ ଭାଜପା ପ୍ରାର୍ଥୀଙ୍କ ପାଇଁ ମୁଖ୍ୟମନ୍ତ୍ରୀଙ୍କ ଲୋକପ୍ରିୟତା ସମସ୍ୟା ସୃଷ୍ଟି କରିବ। ଅନ୍ୟପକ୍ଷରେ ଭାଜପାରେ ଦୀର୍ଘଦିନରୁ ଲାଗି ରହିଥିବା ଗୋଷ୍ଠୀକନ୍ଦଳ ଧୀରେ ଧୀରେ ସମାଧାନ ହେଉଥିବା ଦେଖିବାକୁ ମିଳୁଛି। ଉପନିର୍ବାଚନରେ ଏମ୍ପି ଗୋଷ୍ଠୀ ଓ ବିଧାୟକ ପ୍ରାର୍ଥୀଙ୍କ ଗୋଷ୍ଠୀ ମଧ୍ୟରେ ସମନ୍ବୟ ନ ଥିବାରୁ ଭାଜପା ପରାଜୟର ମୁଖ୍ୟ କାରଣ ବୋଲି ରାଜନୈତିକ ବିଶେଷଜ୍ଞମାନେ କହିଥିଲେ। ଆଗାମୀ ନିର୍ବାଚନରେ ଭାଜପାର ଉଭୟ ଗୋଷ୍ଠୀ ଏମ୍ପି ଓ ବିଧାୟକ ପ୍ରାର୍ଥୀଙ୍କୁ ବିଜୟୀ କରିବା ପାଇଁ କର୍ମୀମାନେ ଶପଥ ନେଉଥିବା ଦେଖିବାକୁ ମିଳିଛି। ଅନ୍ୟପକ୍ଷରେ ବିଜେଡିର ପୂର୍ବତନ ଏମ୍ପି ଇଂ. ରବୀନ୍ଦ୍ର କୁମାର ଜେନାଙ୍କ ଗୋଷ୍ଠୀରେ ଥିବା ନେତା ଓ ଦଳୀୟ ପଦାଧିକାରୀମାନେ ସ୍ବରୂପଙ୍କ ପ୍ରାର୍ଥତ୍ତ୍ୱକୁ କେତେଦୂର ଗ୍ରହଣ କରିବେ ତାକୁ ନେଇ ଚର୍ଚ୍ଚା ଆରମ୍ଭ ହୋଇଛି। ଯଦି ବିଜେଡିର ଗୋଷ୍ଠୀ କନ୍ଦଳ ଲାଗି ରହିବ ତା’ହେଲେ ଦଳୀୟ ପ୍ରାର୍ଥୀଙ୍କୁ ମହଙ୍ଗା ପଡ଼ିପାରେ ବୋଲି ରାଜନୈତିକ ବିଶେଷଜ୍ଞମାନେ କୁହନ୍ତି।
ଉଲ୍ଲେଖଯୋଗ୍ୟ, ବାଲେଶ୍ୱର ନିର୍ବାଚନମଣ୍ଡଳୀରେ ପୁରୁଷ ଭୋଟର ୧ଲକ୍ଷ ୧୪ହଜାର ୪୮୬, ମହିଳା ଭୋଟର ୧ଲକ୍ଷ ୧୦ହଜାର ୯୮୦ ଓ ଅନ୍ୟାନ୍ୟ ୫୯ ସହ ମୋଟ୍ ୨ଲକ୍ଷ ୨୫ହଜାର ୫୨୫ଜଣ ଭୋଟର ରହିଛନ୍ତି।
