ଭୁବନେଶ୍ୱର ,୬।୭ (ଅଭୟ ଦାଶ): ବଜାଜ୍ ଅଟୋ ଲିମିଟେଡ୍ର ବହୁ ପ୍ରତୀକ୍ଷିତ ତଥା ଅତ୍ୟାଧୁନିକ ଜ୍ଞାନକୌଶଳରେ ନିର୍ମିତ କମ୍ପ୍ରେସ୍ଡ ନ୍ୟାଚୁରାଲ ଗ୍ୟାସ୍ ବା ସିଏନ୍ଜି ବାଇକ୍ ‘ଫ୍ରିଡମ ୧୨୫’ର ଆନୁଷ୍ଠାନିକ ଅନାବରଣ ଶୁକ୍ରବାର ସର୍ବଭାରତୀୟ ସ୍ତରରେ ହୋଇଯାଇଛି। ଏପରିକି ଭାରତ (ଭାରତୀୟ ବଜାର) ରେ ବିଶ୍ୱର ପ୍ରଥମ ସିଏନ୍ଜି ବାଇକ୍ର ଅଫିସିଆଲ ଶୁଭାରମ୍ଭ ନୂଆଦିଲ୍ଲୀଠାରେ ହୋଇଯାଇଛି। ଏହି ଅବସରରେ କେନ୍ଦ୍ର ପରିବହନ ଓ ରାଜପଥ ମନ୍ତ୍ରୀ ନୀତିନ ଗଡକରୀ ସମ୍ମାନିତ ଅତିଥି ଭାବେ ଯୋଗଦେଇ ଏହାର ଅନାବରଣ ସହ ବଜାର ପ୍ରବେଶ କରାଇଥିଲେ। ଅନ୍ୟମାନଙ୍କ ମଧ୍ୟରେ ବଜାଜ ଅଟୋ ଲିମିଟେଡ୍ର ଏମ୍ଡି ରାଜୀବ ବଜାଜ୍ ଏବଂ କାର୍ଯ୍ୟନିର୍ବାହୀ ନିର୍ଦ୍ଦେଶକ ରାକେଶ ଶର୍ମାଙ୍କ ସମେତ କମ୍ପାନୀର ବହୁ ବରିଷ୍ଠ ଅଧିକାରୀ ଓ ଅନ୍ୟମାନେ ଉପସ୍ଥିତ ଥିଲେ।
ଉଲ୍ଲେଖଯୋଗ୍ୟ, ବଜାଜ୍ ଫ୍ରିଡମ ୧୨୫ରେ ସମସ୍ତ ପ୍ରକାର ଅତ୍ୟାଧୁନିକ ସୁରକ୍ଷା ବ୍ୟବସ୍ଥା ସାଙ୍ଗକୁ ଅନେକ ଫିଚର ସାମିଲ ରହିଛି। ଏପରିକି ପେଟ୍ରୋଲ ଗାଡ଼ି ତୁଳନାରେ ଗ୍ରାହକ ଫ୍ରିଡମ ୧୨୫ରେ ପ୍ରାୟ ୫୦% ଅର୍ଥର ସଞ୍ଚୟ କରିପାରିବେ। ଏପରିକି ୨କେ.ଜି ସିଏନଜିରେ ଏହି ଗାଡି ପ୍ରାୟ ୨୦୦ କିମିର ଯାତ୍ରା କରିଥାଏ। ଅପରପକ୍ଷରେ ୩ଟି ଭାରିଆଣ୍ଟରେ ଉପଲବ୍ଧ ହେଉଥିବା ଏହି ମଡେଲ ୭ଟି ଆକର୍ଷଣୀୟ ରଙ୍ଗ ଓ ମନଲୋଭା ଡିଜାଇନ ଗ୍ରାହକଙ୍କୁ ବେଶ୍ ଆକୃଷ୍ଟ କରିବ ବୋଲି କମ୍ପାନୀ ପକ୍ଷରୁ ଆଶାବ୍ୟକ୍ତ କରାଯାଇଛି।
ଏ ସମ୍ପର୍କରେ ବଜାଜ୍ ଅଟୋ ଲିମିଟେଡ୍ର ଏମ୍ଡି ରାଜୀବ ବଜାଜ୍ କହିଥିଲେ, ଆମେ ଆମ ବହୁ ପ୍ରତୀକ୍ଷିତ ପ୍ରକଳ୍ପ ତଥା ବିଶ୍ୱର ପ୍ରଥମ ସିଏନ୍ଜି ବାଇକ୍ ‘ଫ୍ରିଡମ ୧୨୫’କୁ ଆନୁଷ୍ଠାନିକ ଭାବେ ଅନାବରଣ କରାଇ ବେଶ୍ ଉତ୍ସାହିତ ଅଛୁ। ସେହିଭଳି ବଜାଜ ଅଟୋ ଲିମିଟେଡ୍ର କାର୍ଯ୍ୟନିର୍ବାହୀ ନିର୍ଦ୍ଦେଶକ ରାକେଶ ଶର୍ମା କହିଥିଲେ, ଆମେ ବଜାର ଚାହିଦା ଓ ଗ୍ରାହକଙ୍କ ମତାମତକୁ ଅଧିକ ଗୁରୁତ୍ୱ ଦେବା ସହିତ ଆମର ମହାରାଷ୍ଟ୍ର ଓ ଗୁଜରାଟ ଉତ୍ପାଦନ ୟୁନିଟ୍ରୁ ମାସିକ ୧୦,୦୦୦ ୟୁନିଟ୍ ଉତ୍ପାଦନ ସହ ଆଗାମୀ ଦିନରେ ଏହି ସଂଖ୍ୟା ୪୦,୦୦୦ ୟୁନିଟ୍ରେ ପହଞ୍ଚାଇବାର ଯୋଜନା ରହିଛି।
ସେହିପରି ଭାରତର ୩୩୫ ସହରରେ ୬୦୦୦ରୁ ଅଧିକ ସିଏନ୍ଜି ପଏଣ୍ଟ ରହିଛି। ଏହି ପଏଣ୍ଟଗୁଡିକ ଜରିଆରେ ଗ୍ରାହକ ସେମାନଙ୍କର ଚାହିଦା ଅନୁଯାୟୀ ସିଏନ୍ଜି ଭର୍ତ୍ତି କରିବେ। ଏହି ମଡେଲ ‘ଫ୍ରିଡମ ୧୨୫’ର ବଜାର ମୂଲ୍ୟ ୯୫,୦୦୦ରୁ ୧,୧୦,୦୦୦ ଟଙ୍କା ମଧ୍ୟରେ ରହିଛି ବୋଲି କମ୍ପାନୀ ପକ୍ଷରୁ ବିସ୍ତୃତ ଭାବେ ସୂଚନା ଦିଆଯାଇଛି।
