ଭୁବନେଶ୍ୱର,୧୯।୩: ରାଜ୍ୟର ପ୍ରମୁଖ ମନୋରଞ୍ଜନଭିତ୍ତିକ ଘରୋଇ ଚ୍ୟାନେଲ ଜୀ ସାର୍ଥକର ସହଯୋଗୀ ସଂସ୍ଥା ଜୀ ସାର୍ଥକ ଫିଲ୍ମସ୍ର ପ୍ରତୀକ୍ଷିତ ଓଡ଼ିଆ ଚଳଚ୍ଚିତ୍ର ‘ବାହାଘର ଡଟ୍ କମ୍’ ରବିବାର ଓ୍ବାଲ୍ଡର୍ର୍ ଟେଲିଭିଜନ ପ୍ରିମିୟର ହେବାକୁ ଯାଉଛି। ବିଶେଷକରି ଓମ୍ ସାଇ ପ୍ରଯୋଜନା ସଂସ୍ଥା ଦ୍ୱାରା ଉକ୍ତ ଚଳଚ୍ଚିତ୍ରଟି ନିର୍ମାଣ ହୋଇଛି। ଏପରିକି ଏକ ଫୁଲ୍ ଏଣ୍ଟରଟେନମେଣ୍ଟ, ଡ୍ରାମା ଏବଂ ପାରିବାରିକ କାହାଣୀକୁ ନେଇ ଏହି ଫିଲ୍ମ ଗତିଶୀଳ ହେଉଛି। ଉକ୍ତ ଫିଲ୍ମରେ ଅଭିନେତା ଋଷି, ଅଭିନେତ୍ରୀ ସାୟଲ ମୁଖାର୍ଜୀ, ପୁଷ୍ପା ପଣ୍ଡା ଏବଂ ବରିଷ୍ଠ କଳାକାର ପ୍ରଦ୍ୟୁମ୍ନ ଲେଙ୍କା ପ୍ରମୁଖ ନିଖୁଣ ଅଭିନୟ କରିଛନ୍ତି।
ଉଲ୍ଲେଖଯୋଗ୍ୟ, ଅନିଚ୍ଛା ସତ୍ତ୍ୱେ ମାଆଙ୍କ ଶେଷ ଇଚ୍ଛା ପୂରଣ କରିବାକୁ ବିବାହ କରିବାକୁ ପଡ଼ିବ। ହେଲେ ବାହାଘରରେ ଜମା ମନ ନାହିଁ। କିନ୍ତୁ ବାହାହେବାକୁ ତ ପଡ଼ିବ, ତେଣୁ ଭିନ୍ନ ଏକ ଉପାୟରେ ବାହାଘର ହେଉଛି। ପରବର୍ତ୍ତୀ ସମୟରେ ନୂଆ ମୋଡ଼ କାହାଣୀରେ ଆସୁଛି। ଆଉ ତା’ପରେ ଯାହା ଘଟୁଛି, ତାହା ଉକ୍ତ କାହାଣୀର ଅବର୍ଣ୍ଣନୀୟ ଅଂଶ ତେବେ ଏମିତି ମନୋରଞ୍ଜନ ଭିତ୍ତିକ କାହାଣୀ ଆପଣଙ୍କୁ ନିଶ୍ଚିତ ଏକ ନୂଆ ଅନୁଭୂତି ଦେବ ବୋଲି ଉଭୟ ସଂସ୍ଥା ପକ୍ଷରୁ କୁହାଯାଇଛି। ଅପରପକ୍ଷରେ ସୁଧାଂଶୁ ମୋହନ ସାହୁ ଉକ୍ତ ସିନେମାରେ ନିର୍ଦ୍ଦେଶନା ଦେଇଥିବା ବେଳେ ବରିଷ୍ଠ ପ୍ରଯୋଜକ ପ୍ରଦ୍ୟୁମ୍ନ ଲେଙ୍କା ପ୍ରଯୋଜନା ଭାର ତୁଲାଇଛନ୍ତି। ସେହିପରି ଚଳଚ୍ଚିତ୍ରର ସଙ୍ଗୀତ ଭାର ସଙ୍ଗୀତକାର ଗୁଡ୍ଲୀ ରଥ ନେଇଛନ୍ତି। ଏ ସମ୍ପର୍କରେ ପ୍ରଯୋଜନା ସଂସ୍ଥା ଜୀ ସାର୍ଥକ ଚ୍ୟାନେଲର ବିଜ୍ନେସ୍ ହେଡ୍ ପ୍ରତୀକ ସିଲ୍ କହିଛନ୍ତି, ଏଭଳି ଏକ ଚମତ୍କାର କାହାଣୀ ଦର୍ଶକଙ୍କର ବେଶ୍ ମନୋରଞ୍ଜନ କରିବ ବୋଲି ଆମେ ଆଶାବାଦୀ ଅଛୁ। ଏପରିକି ଏହି ଚଳଚ୍ଚିତ୍ର ମାର୍ଚ୍ଚ ୧୯ ତାରିଖ ସନ୍ଧ୍ୟା ୬ ଟା ୩୦ମିନିଟ୍ରେ କେବଳ ଜୀ ସାର୍ଥକରେ ପ୍ରସାରିତ ହେବ ବୋଲି ପ୍ରଯୋଜନା ସଂସ୍ଥା ପକ୍ଷରୁ କୁହାଯାଇଛି।
ସୂଚନାଯୋଗ୍ୟ, ଜୀ-ସାର୍ଥକର ନୂଆ ଓଡ଼ିଆ ଚଳଚ୍ଚିତ୍ର ‘ବାହାଘର ଡଟ୍ କମ୍’ର ଅଡିଓ ଲୋକାର୍ପଣ ଉତ୍ସବ ନିକଟରେ ଏକ ତାରକା ହୋଟେଲରେ ଅନୁଷ୍ଠିତ ହୋଇଯାଇଛି।
