ବ୍ରହ୍ମପୁର, ୧୧।୧(ସୁବାସ ଚନ୍ଦ୍ର ପାଢ଼ୀ): ବ୍ରହ୍ମପୁର ସହର ଏବେ ଧୀରେ ଧୀରେ ପୁଣିଥରେ ଅଶାନ୍ତ ଆଡକୁ ଗତି କରୁଛି। ନୂତନ ଭାବେ ଯୁବଗୋଷ୍ଠୀ ଅପରାଧ ଦୁନିଆରେ ପାଦ ଥାପୁଥିବାର ଦେଖିବାକୁ ମିଳିଛି।
ଅପରାଧୀ ଗୋଷ୍ଠୀଙ୍କୁ ପୋଲିସ ଧରିବାକୁ ଚଢ଼ାଉବେଳେ ପୋଲିସ ହାତରେ ସେମାନେ ଧରାପଡି ନ ଥିବା ଜଣାପଡିଛି। ହେଲେ ବୈଦ୍ୟନାଥପୁର ଥାନା ଅନ୍ତର୍ଗତ ଜାତୀୟ ରାଜପଥରେ ଥିବା ଏକ ଫାର୍ମହାଉସ ନିକଟରେ ଥିବା ଏକ ଖଳା ନିକଟରୁ ବୋମା ଭର୍ତ୍ତି ଏୟାର ବ୍ୟାଗ ପୋଲିସ ଜବତ କରିଛି। ଉକ୍ତ ବ୍ୟାଗର ଉପରେ କୁଣ୍ଡା ରଖାଯାଇଥିବାବେଳେ ତଳ ଭାଗରେ ବୋମା ରହିଥିଲା। ପୋଲିସ ୫ ଗୋଟି ବୋମା ଜବତ କରିଛି। ସେଠାରେ ବୋମା କିଏ ରଖିଥିଲା ଓ ତାର କଣ ଉଦ୍ଦେଶ୍ୟ ଥିଲା ସେନେଇ ପୋଲିସ ଏବେ ଖୋଳତାଡ କରୁଛି। ପ୍ରଥମ ପର୍ଯ୍ୟାୟରେ ଏକ ବୋମା ନିଷ୍କ୍ରିୟକାରୀ ଦଳ ଆସି ତାହା ନିଷ୍କ୍ରିୟ କରିବାରେ ବିଫଳ ହୋଇଛନ୍ତି। ତେଣୁ କଟକରୁ ବୋମା ନିଷ୍କ୍ରିୟକାରୀ ଦଳ ଆସିବାକୁ ଯୋଜନା କରାଯାଉଛି। ଅପରାଧୀ ଏବେ ସହରରେ ସକ୍ରିୟ ହେଉଥିବାବେଳେ ସେମାନଙ୍କ ପାଖରେ ମାରଣାସ୍ତ୍ର, ବୋମା ଓ ପିସ୍ତଲ ମଧ୍ୟ ରଖୁଛନ୍ତି। ଅପରାଧୀମାନେ ଏଠାରେ କାହିଁ କି ମେଳି ବାନ୍ଧିଥିଲେ ଏବଂ କାହା ଉପରେ ଟାର୍ଗେଟ ଥୁଲା ଖୋଳତାଡ଼ କରୁଛି ପୋଲିସ। ମେଳି ବାନ୍ଧିଥିବା ଅପରାଧୀଙ୍କୁ ପୋଲିସ ଚିହ୍ନଟ ପାଇଁ ପ୍ରୟାସ ଜାରି ରଖିଛି। ଅପରାଧୀମାନେ ନିର୍ଭୟରେ ଏବେ ବୋମା ପ୍ରସ୍ତୁତ ରଖି ଗ୍ୟାଙ୍ଗ ଓ୍ବାରକୁ ଆହ୍ବାନ ଦେଉଛନ୍ତି ବୋଲି ସାଧାରଣରେ ମତ ପ୍ରକାଶ ପାଉଛି।
ସେମାନଙ୍କୁ ଗିରଫ କରିବା ପରେ କାହାକୁ ଟାର୍ଗେଟ କରି ବୋମା ରଖିଥିଲେ ତାହା ସ୍ପଷ୍ଟ ଜଣାପଡିବ ବୋଲି ଜଣେ ବରିଷ୍ଠ ପୋଲିସ ଅଧିକାରୀ ସୂଚନା ଦେଇଛନ୍ତି।
