ନୂଆଦିଲ୍ଲୀ,୧୧।୧୧: ପାକିସ୍ତାନର ଷ୍ଟାର୍ ବ୍ୟାଟର୍ ବାବର ଆଜମ୍ଙ୍କ ଖରାପ ଫର୍ମ ଜାରି ରହିଛି। ମଙ୍ଗଳବାର ରାୱଲପିଣ୍ଡିରେ ଶ୍ରୀଲଙ୍କା ବିପକ୍ଷ ପ୍ରଥମ ଦିନିକିଆ ମ୍ୟାଚ୍ ସମୟରେ, ସେ ଶ୍ରୀଲଙ୍କା ସ୍ପିନର୍ ୱାନିନ୍ଦୁ ହସରଙ୍ଗାଙ୍କ ଏକ ଚମତ୍କାର ବଲରେ ଆଉଟ୍ ହୋଇଥିଲେ।
ପାକିସ୍ତାନ ଇନିଂସ୍ର ୨୪ ତମ ଓଭରରେ ହସରଙ୍ଗାଙ୍କ ବଲ୍ ଅଫ୍-ଷ୍ଟମ୍ପ୍ ବାହାରେ ପଡ଼ି ଅତ୍ୟଧିକ ସ୍ପିନ୍ ହେବା ଫଳରେ ବାବରଙ୍କ ଡିଫେନ୍ସକୁ ଭେଦ କରି ଷ୍ଟମ୍ପରେ ବାଜିଥିଲା। ବାବର ୫୧ ବଲରେ ମାତ୍ର ୨୯ ରନ୍ କରିଥିଲେ। ଏହି ମ୍ୟାଚ୍ ପରେ ଅନ୍ତର୍ଜାତୀୟ କ୍ରିକେଟରେ ବାବରଙ୍କ ଶତକ ନକରିବା ଇନିଂସ ସଂଖ୍ୟା ୮୩ ରେ ପହଞ୍ଚିଛି। ତାଙ୍କର ଶେଷ ଶତକ ଏସିଆ କପ୍ ୨୦୨୩ ରେ ନେପାଳ ବିପକ୍ଷରେ ଆସିଥିଲା।
ଏହି ବିଫଳତା ସହିତ ବାବର ଅନ୍ତର୍ଜାତୀୟ କ୍ରିକେଟରେ ଶତକ ନକରି ସର୍ବାଧିକ ୮୩ ଇନିଂସ୍ ଖେଳିବାରେ ଭାରତୀୟ ବ୍ୟାଟର୍ ବିରାଟ୍ କୋହଲିଙ୍କ ଅଲୋଡ଼ା ରେକର୍ଡ ସହ ସମକକ୍ଷ ହୋଇଛନ୍ତି। ଏସୀୟ ବ୍ୟାଟର୍ମାନଙ୍କ ମଧ୍ୟରେ ଶ୍ରୀଲଙ୍କାର ସନତ ଜୟସୂରିୟା (୮୮ ଇନିଂସ୍) ଏହି ତାଲିକାର ଶୀର୍ଷରେ ଅଛନ୍ତି।
