ନୂଆଦିଲ୍ଲୀ,୧୧ା୯: ଦୂରଦୂରାନ୍ତରେ ରହୁଥିବା ଉଭୟ ଗ୍ରାହକ ଓ ରିଟେଲରମାନଙ୍କ ସଞ୍ଚୟ ଖାତା ଓ ଚଳନ୍ତି ଖାତା ଖୋଲିବା ଲାଗି ଭାରତର ଅଗ୍ରଣୀ ଶାଖା ବିହୀନ ଓ ଡିଜିଟାଲ ସେବା ପ୍ରଦାନକାରୀ ସଂସ୍ଥା ପେ ନିଅରବାଏ ସହ ଆକ୍ସିସ୍ ବ୍ୟାଙ୍କର ଏକ ଚୁକ୍ତିନାମା ବା ସହଯୋଗିତା ସ୍ଥାପନ କରାଯାଇଛି। ଆଖପାଖ ଷ୍ଟୋରରେ ଗ୍ରାହକମାନେ ଆଧାର ଭିତ୍ତିକ ସ୍ବୀକୃତି (ଇ-କେୱାଇସି) ଜରିଆରେ ଅତି ସହଜ ଏବଂ ସୁବିଧାରେ ଖାତା ଖୋଲିପାରିବେ। ଏହି ସହଯୋଗିତା ଆକ୍ସିସ୍ ବ୍ୟାଙ୍କ ଓ ପେ ନିଅରବାଏକୁ ଦୁର୍ଗମ ଅଞ୍ଚଳରେ ଥିବା ଗ୍ରାହକମାନଙ୍କ ପାଖରେ ପହଞ୍ଚତ୍ବା ଓ ସେମାନେ ସମ୍ମୁଖୀନ ହେଉଥିବା ବିଭିନ୍ନ ସମସ୍ୟା ଯଥା କାଗଜପତ୍ର କାମ, ଲମ୍ବା ପ୍ରକ୍ରିୟା, ପ୍ରଯୁକ୍ତି, ଦୂରରେ ରହିବା ଓ ସୁହାଇବା ଭଳି ପରିବେଶର ଅଭାବ ଆଦିକୁ ସମାଧାନ କରିବା ଲାଗି ସଶକ୍ତ କରିବ। ଏହି ସହଯୋଗିତା ଜରିଆରେ ପେ ନିଅରବାଏର ପ୍ରଯୁକ୍ତିଭିତ୍ତିକ ବିତରଣ ସେବା ଯେଉଁଥିରେ ୨୦ହଜାର ପିନ୍କୋଡ୍ର ୫୦ଲକ୍ଷରୁ ଅଧିକ ଲଘୁ ଉଦ୍ୟୋଗୀ ଯୋଡ଼ିହୋଇଛନ୍ତି ତାହାକୁ ଆକ୍ସିସ୍ ବ୍ୟାଙ୍କ ବ୍ୟବହାରକରି ଦେଶର କୋଣ ଅନୁକୋଣରେ ଏହାର ଆର୍ଥିକ ସମାଧାନଗୁଡ଼ିକୁ ପହଞ୍ଚାଇପାରିବ। ଏ ସମ୍ପର୍କରେ ଆକ୍ସିସ୍ ବ୍ୟାଙ୍କର ଗ୍ରୁପ୍ ଏକ୍ଜିକ୍ୟୁଟିଭ୍ ତଥା ମୁଖ୍ୟ ଭାରତ ବ୍ୟାଙ୍କିଙ୍ଗ୍ ମୁନୀସ ଶାରଦା କହିଛନ୍ତି, ଗ୍ରାହକମାନଙ୍କୁ ସେମାନଙ୍କ ଆବଶ୍ୟକତା ଅନୁସାରେ ସ୍ବତନ୍ତ୍ର ଧରଣର ସମାଧାନ ପ୍ରଦାନ କରିବା ଲାଗି ନବସୃଜନ ଭିତ୍ତିକ ସହଯୋଗିତା ମଡେଲ ଉପରେ ଆମେ ନିରବଚ୍ଛିନ୍ନ ଭାବେ କାର୍ଯ୍ୟ କରୁଛୁ। ପେ ନିଅରବାଏ ସହ ଆମର ଏହି ସହଯୋଗିତା ଜରିଆରେ ଆମେ ଅର୍ଦ୍ଧସହରାଞ୍ଚଳ ଓ ଗ୍ରାମାଞ୍ଚଳର ଏକ ବଡ଼ ଗ୍ରାହକ ଭାଗ ପାଖରେ ପହଞ୍ଚିପାରିବୁ ଏବଂ ସେମାନଙ୍କୁ ବ୍ୟାଙ୍କ ଖାତା ଖୋଲିବା ସହ ବିଭିନ୍ନ ପ୍ରକାର ସୁବିଧା ଯୋଗାଇଦେବୁ। ସେହିଭଳି ପେ ନିଅରବାଏର ପ୍ରତିଷ୍ଠାତା, ଏମ୍ଡି ଓ ସିଇଓ ଆନନ୍ଦ କୁମାର ବଜାଜ କହିଛନ୍ତି, ଭାରତକୁ ଶେଷ ଦୂରତା ପର୍ଯ୍ୟନ୍ତ ଆର୍ଥିକ ଓ ଡିଜିଟାଲ୍ କ୍ଷେତ୍ରରେ ସଶକ୍ତ କରିବା ପାଇଁ ସ୍ଥାନୀୟ ରିଟେଲରମାନଙ୍କ ଅଭିବୃଦ୍ଧି ଆଗକୁ ବଢ଼ାଇବା ଲାଗି ସେମାନଙ୍କୁ ଆବଶ୍ୟକ ଉପକରଣ ପ୍ରଦାନ କରିବା ବେଶ୍ ଗୁରୁତ୍ୱପୂର୍ଣ୍ଣ।
