ଭୁବନେଶ୍ୱର,୭।୮: ଓଡ଼ିଶା ସରକାର ଓ ଟାଟା ପାୱାରର ଯୌଥ ଉଦ୍ୟୋଗ ଟିପି ସେଣ୍ଟ୍ରାଲ୍ ଓଡ଼ିଶା ଡିଷ୍ଟ୍ରିବ୍ୟୁଶନ ଲିମିଟେଡ୍ (ଟିପିସିଓଡିଏଲ୍) ପକ୍ଷରୁ ଜାତୀୟ ହସ୍ତତନ୍ତ ଦିବସକୁ ଆଖି ଆଗରେ ରଖି ଶନିବାର ସ୍ଥାନୀୟ ରାଜ୍ୟ ସଚିବାଳୟ (ଲୋକସେବା ଭବନ)ଠାରେ ଆୟୋଜିତ ଏକ ସ୍ବତନ୍ତ୍ର କାର୍ଯ୍ୟକ୍ରମରେ ଆଭା ଶକ୍ତି ମହିଳା (ମହିଳା ସ୍ବୟଂ ସହାୟକ ଗୋଷ୍ଠୀ (ଡବ୍ଲ୍ୟୁଏସ୍ଏଚ୍ଜି) ସଦସ୍ୟାଙ୍କୁ ହାତ ତିଆରି ଇକତ୍ ଶାଢ଼ି ଓ ସ୍ବତନ୍ତ୍ର ଭାବେ ପ୍ରସ୍ତୁତ ଢୋକ୍ରା ବ୍ୟାଜ୍ ବଣ୍ଟନ କରାଯାଇଛି। ଏହି ଅବସରରେ ଶକ୍ତିମନ୍ତ୍ରୀ ପ୍ରତାପ କେଶରୀ ଦେବ ମୁଖ୍ୟ ଅତିଥି ଭାବେ ଯୋଗଦେଇଥିବା ବେଳେ ଟିପିସିଓଡିଏଲ୍ର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିଇଓ) ଏମ୍.ସେନ୍ବାଗମ୍ ଓ ଟିପିସିଓଡିଏଲ୍ ଓ ଟାଟା ପାୱାରର ଅନ୍ୟ ବରିଷ୍ଠ ଅଧିକାରୀମାନେ ମଧ୍ୟ ଉପସ୍ଥିତ ଥିଲେ।
ଏହି ପରିପ୍ରେକ୍ଷୀରେ ମନ୍ତ୍ରୀ ଦେବ କହିଛନ୍ତି, ଦେଶର ବିକାଶ ଓ ମହିଳା ସଶକ୍ତୀକରଣ ପାଇଁ ସ୍ଥାନୀୟ ସ୍ବୟଂ ସହାୟକ ଗୋଷ୍ଠୀଙ୍କ ଅଭିବୃଦ୍ଧି ଗୁରୁତ୍ୱପୂର୍ଣ୍ଣ। ମୁଁ ବହୁତ ଖୁସି ଯେ ଆମର ଐତିହ୍ୟର ପ୍ରସାର କରିବା ସହିତ ମହିଳା ସଶକ୍ତୀକରଣକୁ ସୁଦୃଢ଼ କରିବା ପାଇଁ ଓଡ଼ିଶା ସରକାରଙ୍କ ସହିତ ଟାଟା ପାୱାର ସହଯୋଗିତା ସ୍ଥାପନ କରିଛି। ସେହିଭଳି ଟିପିସିଓଡିଏଲ୍ର ସିଇଓ ସେନ୍ବାଗମ କହିଛନ୍ତି, ଆମର ଆଭା ଶକ୍ତି ସଦସ୍ୟାମାନେ ହେଉଛନ୍ତି ପରିବର୍ତ୍ତନର ବାର୍ତ୍ତାବହ। ସେମାନେ ସ୍ଥାନୀୟ ଗୋଷ୍ଠୀଙ୍କୁ ପ୍ରେରଣା ଦେବା ସହ ଟିପିସିଓଡିଏଲ୍ର ସାମାଜିକ ବିକାଶ ପ୍ରୟାସରେ ଯୋଗଦାନ କରୁଛନ୍ତି। ସେମାନଙ୍କ ସହଯୋଗିତାକୁ ସ୍ବୀକୃତି ପ୍ରଦାନ କରିବା ପାଇଁ ଆମେ ସେମାନଙ୍କ ପାଇଁ ଏକ ନୂଆ ପରିଚୟ ପ୍ରସ୍ତୁତ କରିଛୁ, ଯାହା ହେଉଛି ପାରମ୍ପରିକ ଓଡ଼ିଆ କାରିଗରି ଓ ନୂଆ ପିଢ଼ିର ପଦ୍ଧତିର ମିଶ୍ରଣ ଯାହା ସ୍ଥାନୀୟ ସଂସ୍କୃତିର ପ୍ରସାର କରିବ। ସେହିପରି ଟାଟା ପାୱାରର ସଭାପତି (ଟି ଆଣ୍ଡ୍ ଡି) ସଞ୍ଜୟ ବାଙ୍ଗା କହିଛନ୍ତି, ଟାଟା ପାୱାର ଏହାର ସିଏସ୍ଆର୍ ଦର୍ଶନ ଅଧୀନରେ ମହିଳା ସଶକ୍ତୀକରଣ ଓ ସାମାଜିକ ଉଦ୍ୟମିତା ଉପରେ ସର୍ବଦା ଗୁରୁତ୍ୱ ପ୍ରଦାନ କରୁଛି। ଜାତିସଂଘର ଏସ୍ଡିଜି ସହ ଖାପଖୁଆଇ ସାମଗ୍ରିକ ନିରନ୍ତର ବିକାଶକୁ ତ୍ୱରାନ୍ବିତ କରିବା ସହ ଆଞ୍ଚଳିକ ଐତିହ୍ୟର ପ୍ରସାର ଓ ସଂରକ୍ଷଣ ଲାଗି ଆମର ଉଦ୍ୟମକୁ ପ୍ରସ୍ତୁତ କରାଯାଇଛି।
