ମେଲବୋର୍ନ,୨୦।୨(ଏପି): ବର୍ଷର ପ୍ରଥମ ଗ୍ରାଣ୍ଡସ୍ଲାମ ଟୁର୍ନାମେଣ୍ଟ ଅଷ୍ଟ୍ରେଲିଆନ ଓପନ୍ରେ ଦ୍ୱିତୀୟ ସିଡ୍ ମାନ୍ୟତାପ୍ରାପ୍ତ ଯୋଡି ଏଲିସ ମେର୍ଟେନ୍ସ ଓ ଅରିନା ସାବାଲେଙ୍କା ମହିଳା ଡବଲ୍ସ ଟାଇଟଲ ଜିତିଛନ୍ତି। ବେଲଜିୟମର ମେର୍ଟେନ୍ସ ଓ ବେଲାରୁଷର ସାବାଲେଙ୍କା ଶୁକ୍ରବାର ଖେଳାଯାଇଥିବା ଫାଇନାଲ ମ୍ୟାଚ୍ରେ ତୃତୀୟ ସିଡ୍ ଯୋଡି ଚେକ୍ ଗଣରାଜ୍ୟର କାଟେରିନା ସିନିଆକୋଭା ଓ ବାର୍ବୋରା କ୍ରେଜସିକୋଭାଙ୍କୁ ୬-୨, ୬-୩ ସେଟ୍ରେ ଅତି ସହଜରେ ପରାସ୍ତ କରି ଚାମ୍ପିୟନ ହୋଇଛନ୍ତି।
୯ଟି ସିଙ୍ଗଲ୍ସ ଟାଇଟଲ ଜିତିଥିବା ସାବାଲେଙ୍କା ଡବ୍ଲ୍ୟୁଟିଏ ର଼୍ୟାଙ୍କିଙ୍ଗ୍ର ଟପ୍-୧୦ରେ ସ୍ଥାନ ପାଇଛନ୍ତି। ପୂର୍ବରୁ କ୍ରେଜେସିକୋଭା ଓ ସିନିଆକୋଭା ୨୦୧୮ରେ ମିଳିତ ଭାବେ ଓ୍ବିମ୍ବେଲଡନ ଓ ଫ୍ରେଞ୍ଚ୍ ଓପନ ମହିଳା ଡବଲ୍ସ ଟାଇଟଲ ଜିତିଥିଲେ। କିନ୍ତୁ ଏହି ଫାଇନାଲ ମୁକାବିଲାରେ ଆଶାନୁରୂପ ପ୍ରଦର୍ଶନ କରିପାରି ନ ଥିଲେ। ମହିଳା ସିଙ୍ଗଲ୍ସରେ ସପ୍ତମ ସିଡ୍ ମାନ୍ୟତା ପାଇଥିବା ସାବାଲେଙ୍କା ୬-୪, ୨-୬, ୬-୪ ସେଟ୍ରେ ଦଶମ ସିଡ୍ ସେରେନା ଓ୍ବିଲିୟମ୍ସଙ୍କଠାରୁ ପରାସ୍ତ ହୋଇଥିଲେ। ତେବେ ଏହି ବିଜୟ ଖୁସି ଦେଇଛି ବୋଲି ସେ କହିଛନ୍ତି ।
