ଭଞ୍ଜନଗର,୧୭।୧୧(ଡି.ଏନ୍.ଏ.): ଭଞ୍ଜନଗର ବାର୍ ଆସୋସିଏଶନର ବରିଷ୍ଠ ମହିଳା ଆଇନଜୀବୀ ଅଭାଙ୍ଗିନୀ ବିଷୋୟୀ, କୋର୍ଟର ପୂର୍ବତନ ସିଏସ୍ଆଇ ରାଜେନ୍ଦ୍ର ପ୍ରସାଦ ପଣ୍ଡାଙ୍କ ସମେତ ୫ଜଣଙ୍କୁ ବୁଧବାର ରାତିରେ କେତେଜଣ ଯୁବକ ଆକ୍ରମଣ କରିଛନ୍ତି। ଏଥିରେ ରାଜେନ୍ଦ୍ରଙ୍କ ହାତ ଭାଙ୍ଗି ଯାଇଥିବା ବେଳେ ଅନ୍ୟମାନେ ଆହତ ହୋଇଛନ୍ତି। ପୋଲିସ ଘଟଣାସ୍ଥଳରେ ତଦନ୍ତ ଆରମ୍ଭ କରିଛି ।
ଅନ୍ୟପକ୍ଷେ ଏହି ଘଟଣାକୁ ନେଇ ବାର୍ ଆସୋସିଏଶନ ପକ୍ଷରୁ ଅସନ୍ତୋଷ ପ୍ରକାଶ ପାଇଛି । ଅଭିଯୁକ୍ତମାନଙ୍କୁ ତୁରନ୍ତ ଗିରଫ କରିବା ପାଇଁ ଗୁରୁବାର ବାର୍ ଆସୋସିଏଶନ ବୈଠକରେ ଦାବି କରାଯାଇଛି। ପୋଲିସ ଟାଳଟୁଳ ନୀତି ଅବଲମ୍ବନ କଲେ ବାର୍ ଆସୋସିଏଶନ ଆନ୍ଦୋଳନକୁ ଓହ୍ଲାଇବ ବୋଲି ସଭାପତି ସନ୍ତୋଷ କୁମାର ନାୟକ ସୂଚନା ଦେଇଛନ୍ତି। ସନ୍ଧ୍ୟାରେ ବାର୍ ଆସୋସିଏଶନ କର୍ମକର୍ତ୍ତାମାନେ ଥାନାକୁ ଯାଇ ଘଟଣା ସମ୍ପର୍କରେ ଆଲୋଚନା କରିଛନ୍ତି ।
ବୁଧବାର ରାତି ପ୍ରାୟ ୧୦ଟାରେ ଭଞ୍ଜନଗର କଳିଙ୍ଗନଗର ଦ୍ୱିତୀୟ ଲାଇନ ବାସିନ୍ଦା ଅଜିତ କୁମାର ସେଠୀ ନାହାତୋଟାସାହି ଆଡ଼େ କୌଣସି କାମରେ ଯାଇଥିଲେ । ଏହି ସମୟରେ କେତେଜଣ ଯୁବକ କୌଣସି କଥାକୁ ନେଇ ତାଙ୍କ ସହ ବଚସା କରିବା ସହ ପରେ ଆକ୍ରମଣ କରିଥିଲେ। ଅଜିତ୍ ନିଜକୁ ବଞ୍ଚାଇବାକୁ ଆଇନଜୀବୀ ଅଭାଙ୍ଗିନୀଙ୍କ ଘରକୁ ଚାଲି ଆସିଥିଲେ। ଅଭାଙ୍ଗିନୀଙ୍କ ପରିବାର ଲୋକେ ଘଟଣା ସମ୍ପର୍କରେ ଜାଣି ସାହିବାସିନ୍ଦାଙ୍କୁ ଡ଼ାକିବାରୁ ସେମାନେ ଫେରାର ହୋଇଯାଇଥିଲେ। ପରେ ଅଜିତ ଥାନାକୁ ଯାଇ ଅଭିଯୋଗ କରିଥିଲେ। ଅଜିତଙ୍କୁ ଅଭାଙ୍ଗିନୀ ସହାୟତା ଯୋଗାଇଥିବା ସନ୍ଦେହ କରି ଅଭିଯୁକ୍ତମାନେ ତାଙ୍କ ଘରେ ପଶି ୨ଟି ବାଇକ୍କୁ ଭାଙ୍ଗି ଦେଇଥିଲେ । ପ୍ରତିବାଦ କରିବାରୁ ସେମାନେ ଅଭାଙ୍ଗିନୀ, ତାଙ୍କ ଭାଇ ଦୁଃଖୀଶ୍ୟାମ, ଭାଉଜ ସୁଜତାଙ୍କୁ ଆକ୍ରମଣ କରିଥିଲେ। ଏକରିକି ଅଭାଙ୍ଗିନୀଙ୍କ ଘର ନିକଟରେ ରହୁଥିବା କୋର୍ଟ ସିଏସ୍ଆଇ ପଣ୍ଡାଙ୍କୁ ମଧ୍ୟ ଆକ୍ରମଣ କରାଯାଇଛି। ଏନେଇ ଅଭାଙ୍ଗିନୀ, ରାଜେନ୍ଦ୍ର ଭଞ୍ଜନଗର ଥାନାରେ ଘଟଣା ସମ୍ପର୍କରେ ଅଭିଯୋଗ କରିଛନ୍ତି ।
