ଖୋର୍ଦ୍ଧା,୩୦ା୧୧(ପ୍ରଭାତ ପାଣିଗ୍ରାହୀ): ଖୋର୍ଦ୍ଧା ଜିଲା ଜଟଣୀ ଥାନା ଅଧୀନ ହାଟବଜାର ନିକଟରେ ଶୁକ୍ରବାର ଧରିତ୍ରୀ ଖବରଦାତା ରବୀନ୍ଦ୍ରନାଥ ମହାକୁଡ଼ଙ୍କୁ ଅଶ୍ଳୀଳ ଭାଷାରେ ଗାଳିଗୁଲଜ ସହ ମରଣାନ୍ତକ ଆକ୍ରମଣ ହୋଇଛି। ଏପରିକି ମୁଣ୍ଡରେ ବନ୍ଧୁକ ଲଗାଇବା ସହ ତାଙ୍କୁ ଏବଂ ପରିବାର ସଦସ୍ୟଙ୍କୁ ଜୀବନରୁ ମାରିଦେବାକୁ ଧମକ ଦିଆଯାଇଛି। ହାଟବଜାର (ଜଟଣୀ ଗ୍ରାମ)ର ଚିନୁ ବସ୍ତିଆ ଏବଂ ତାଙ୍କର ୧୦ଜଣ ସହଯୋଗୀ ଆକ୍ରମଣ କରିଥିବା ନେଇ ଜଟଣୀ ଥାନାରେ ଅଭିଯୋଗ ହୋଇଛି। ପୋଲିସ ଅଭିଯୋଗକୁ ଭିତ୍ତିକରି ୩ଜଣଙ୍କୁ ଅଟକ ରଖି ତଦନ୍ତ ଚଳାଇଛି। ଅନ୍ୟପଟେ ଆକ୍ରମଣରେ ଗୁରୁତର ହୋଇଥିବା ରବୀନ୍ଦ୍ର ଭୁବନେଶ୍ୱର ଏମ୍ସରେ ଚିକିତ୍ସାଧୀନ ଅଛନ୍ତି।
ଅଭିଯୋଗ ମୁତାବକ, ଗତ ଅକ୍ଟୋବର ୧୮ତାରିଖ ମଧ୍ୟାହ୍ନ ୧୨ଟାରେ ହାଟବଜାର ମେଲଣ ପଡ଼ିଆସ୍ଥିତ ରାସ୍ତା ମରାମତି କାର୍ଯ୍ୟ ଚାଲିଥିଲା। ସେଠାରେ ନିମ୍ନମାନର କାର୍ଯ୍ୟ ହେଉଥିବା ଖବରପାଇ ରବୀନ୍ଦ୍ର ସେଠାରେ ପହଞ୍ଚିବା ସହ ଫଟୋ ଓ ଭିଡିଓ ଉତ୍ତୋଳନ କରିଥିଲେ। ଗତ ୩୦ ତାରିଖରେ ଜଟଣୀ ଗ୍ରାମର ଜଣେ ବ୍ୟକ୍ତିଙ୍କ ଏକାଦଶାହ କାର୍ଯ୍ୟରେ ରବୀନ୍ଦ୍ର ଯୋଗଦେବାକୁ ଯାଇଥିବା ବେଳେ ଚିନୁ ବସ୍ତିଆ, ବାବିନା ବଳିୟାରସିଂହ ଏବଂ କୁନା ଜେନା ତାଙ୍କୁ ଅଟକାଇ କାହିଁ ଫଟୋ ଉଠାଉଥିଲୁ ବୋଲି ପଚାରିବା ସହ ଗାଳିଗୁଲଜ କରିଥିଲେ। ଏପରିକି ଜୀବନରେ ମାରିଦେବାକୁ ଧମକ ଦେଇଥିଲେ। ସେହିପରି ଗୁରୁବାର ଅପରାହ୍ନ ୨ଟାରେ ସ୍ଥାନୀୟ ରେଲଓ୍ବେ ଷ୍ଟେଶନରେ ବେଆଇନ ହକରିଂକୁ ନେଇ ରବୀନ୍ଦ୍ର ଖବର ସଂଗ୍ରହ ପାଇଁ ଯାଇଥିବା ବେଳେ ସେଠାରେ ଫଟୋ ଉଠାଇବା ସହ ଭିଡିଓ ଉତ୍ତୋଳନ କରିଥିଲେ। ଏନେଇ ରେଳ ସୁରକ୍ଷା ବଳ ଅଧିକାରୀଙ୍କୁ ଅବଗତ ମଧ୍ୟ କରାଇଥିଲେ। ଏହି ଘଟଣାକୁ ନେଇ ଶୁକ୍ରବାର ଚିନୁ ବସ୍ତିଆ ଏବଂ ତାଙ୍କର ୧୦ଜଣ ସହଯୋଗୀ ଆକ୍ରମଣ କରିଥିବା ନେଇ ଅଭିଯୋଗ ହୋଇଛି। ଏନେଇ ଭୁବନେଶ୍ୱର ଡିସିପି ପିନାକ ମିଶ୍ର କହିଛନ୍ତି, ଅଭିଯୋଗ ପାଇଛି। ଘଟଣାର ତଦନ୍ତ କରି ଅଭିଯୁକ୍ତମାନଙ୍କୁ ତୁରନ୍ତ ଗିରଫ କରିବା ପାଇଁ ନିର୍ଦ୍ଦେଶ ଦେଇଛି। ସେହିପରି ଜଟଣୀ ଥାନା ଅଧିକାରୀ ସୌମ୍ୟକାନ୍ତ ବଳିୟାରସିଂ କହିଛନ୍ତି, ଏହି ଘଟଣାରେ ୩ଜଣଙ୍କୁ ଅଟକ ରଖାଯାଇ ପଚରାଉଚରା ଚାଲିଛି। ଅନ୍ୟପକ୍ଷରେ ଖବରଦାତାଙ୍କ ଉପରେ ଆକ୍ରମଣ ଘଟଣାକୁ ବିଭିନ୍ନ ମହଲରେ ନିନ୍ଦା କରାଯାଇଛି।
