ଥୁଆମୂଳ ରାମପୁର,୨୨ା୮(ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ସଦରସ୍ଥିତ ଆଇଟିଡିଏ ୪ ନମ୍ବର ମାର୍କେଟ କମ୍ପ୍ଲେକ୍ସରେ ଆକ୍ସିସ୍ ବ୍ୟାଙ୍କ ଦ୍ବାରା ସ୍ଥାପିତ ଏଟିଏମ୍ ଦୀର୍ଘ ୧୦ମାସରୁ ଊର୍ଦ୍ଧ୍ୱ ସମୟ ହେବ ବନ୍ଦ ରହିଥିବା ବେଳେ ଗ୍ରାହକଙ୍କ ମନରେ ଅସନ୍ତୋଷ ଦାନା ବନ୍ଧିଛି। ଥୁଆମୂଳ ରାମପୁର ବ୍ଲକଟି ୨୪ଟି ପଞ୍ଚାୟତକୁ ନେଇ ଗଠିତ ବ୍ଲକ ହୋଇଥିବା ବେଳେ ୨୦୧୧ ଜନଗଣନା ଅନୁସାରେ ଏହି ବ୍ଲକ ଜନସଂଖ୍ୟା ହାରାହାରି ୭୭ ହଜାରରୁ ଊର୍ଦ୍ଧ୍ୱ ଲୋକ ବସବାସ କରିଛନ୍ତି। ଏହି ବ୍ଲକରେ ହାତ ଗଣତି କିଛି ବ୍ୟାଙ୍କ ରହିଛି ଯେମିତି କି ଭାରତୀୟ ଷ୍ଟେଟ୍ ବ୍ୟାଙ୍କ, ଉତ୍କଳ ଗ୍ରାମୀଣ ବ୍ୟାଙ୍କ, ପୋଷ୍ଟାଲ ବ୍ୟାଙ୍କ ଭଳି ବ୍ୟାଙ୍କ ରହିଥିବା ବେଳେ ଏହି ବ୍ଲକରେ କେବଳ ଷ୍ଟେଟ୍ ବ୍ୟାଙ୍କ୍ ଅଫ୍ ଇଣ୍ଡିଆ ପକ୍ଷରୁ ୨ଟି ଏଟିଏମ୍ ଏବଂ ଆକ୍ସିସ ବ୍ୟାଙ୍କ ତରଫରୁ ଏକମାତ୍ର ଏଟିଏମ୍ ସ୍ଥାପନ କରାଯାଇଛି, କିନ୍ତୁ ଥୁଆମୂଳ ରାମପୁରଠାରେ ସ୍ଥାପିତ ଏହି ଆକ୍ସିସ ବ୍ୟାଙ୍କ ଏଟିଏମ୍ ଅଚଳାବସ୍ଥାରେ ଥିବାବେଳେ ବର୍ତ୍ତମାନ ଷ୍ଟେଟ ବ୍ୟାଙ୍କ ଅଫ୍ ଇଣ୍ଡିଆ ସ୍ଥାପନ କରିଥିବା ଗୁଣୁପୁରସ୍ଥିତ ପେଟ୍ରୋଲ ପମ୍ପଠାରେ ଏବଂ ଗୋଟେ ବ୍ୟାଙ୍କ ଶାଖା ସମ୍ମୁଖରେ ସ୍ଥାପନ କରାଯାଇଥିବା ଏଟିଏମ୍ ହିଁ ଲୋକଙ୍କ ସେବାରେ ରହିଛି। ହେଲେ ତାହା ମଧ୍ୟ ଅଧିକାଂଶ ସମୟରେ ଲୋକଙ୍କ ସେବାରେ ନିୟମିତ ସେବା ଯୋଗାଇବାରେ ଅବହେଳା ରହୁଛି ବୋଲି ଗ୍ରାହକଙ୍କ ମନରେ ଅସନ୍ତୋଷ ଦେଖାଇ ଦେଇଛି। ଉକ୍ତ ବ୍ଲକ ହେଉଛି ଏକ ଆଦିବାସୀ ଅଧିବାସୀ ଅଧ୍ୟୁଷିତ ଅଞ୍ଚଳ ହୋଇଥିବା ବେଳେ ଏହିଠିକାର ଜନସାଧାରଣ କୃଷି ଉପରେ ନିର୍ଭର କରନ୍ତି। ଥୁଆମୂଳ ରାମପୁର ବ୍ଲକ ମୁଖ୍ୟାଳୟ ହୋଇଥିବାରୁ ଏଠାରେ ବ୍ଲକସ୍ତରୀୟ ବିଭିନ୍ନ କାର୍ଯ୍ୟାଳୟ ରହିଛି। ଏହାଯୋଗୁ ଉକ୍ତ ସ୍ଥାନକୁ ପ୍ରତିଦିନ ବିଭିନ୍ନ କାମ ନେଇ ଶହ ଶହ ଲୋକଙ୍କର ଭିଡ଼ ହୋଇଥାଏ। ଲୋକମାନେ ନିଜ ଘରୁ ଟଙ୍କା ଧରି ଆସି ନ ଥିଲେ ବହୁ ହଇରାଣ ହରକତ ହେବାକୁ ପଡ଼ିଥାଏ। ବର୍ତ୍ତମାନ ପଡ଼ୋଶୀ ରାୟଗଡ଼ା ଓ ନବରଙ୍ଗପୁର ଜିଲାର ବ୍ୟବସାୟୀମାନେ ଏହିସ୍ଥାନକୁ ବ୍ୟବସାୟୀ କରିବା ପାଇଁ ଆସୁଛନ୍ତି, ତେଣୁ ଲୋକେ କିଣାକିଣି କରିବା ପାଇଁ ପର୍ଯ୍ୟାପ୍ତ ପରିମାଣରେ ଟଙ୍କା ନ ଧରି ଆସିଲେ ସେମାନେ ନାନାଦି ଅସୁବିଧା ଭୋଗୁଥିବା ଦେଖାଯାଏ l ଆକ୍ସିସ୍ ପକ୍ଷରୁ ବିଗତ କିଛି ବର୍ଷ ତଳେ ଏଠାରେ ଅଞ୍ଚଳର ଲୋକଙ୍କ ସୁବିଧା ଯୋଗାଇ ଦେବା ଦୃଷ୍ଟିରେ ଏକ ଏଟିଏମ୍ ସ୍ଥାପନ ହୋଇଥିଲା। ମାତ୍ର ଗତ ୧୦ ମାସରୁ ଊଦ୍ଧର୍ବ ସମୟ ବିତିଯାଇଛି ହେଲେ ଏଟିଏମ୍ କାରବାର ବନ୍ଦ ଅଛି। ଏହାକୁ ନେଇ ସ୍ଥାନୀୟ ଲୋକେ ବାରମ୍ବାର ବିଭାଗୀୟ କର୍ତ୍ତୃପକ୍ଷଙ୍କ ପାଖରେ ଅଭିଯୋଗ କରୁଥିଲେ ସୁଦ୍ଧା କୌଣସି ସୁଫଳ ହେଉନାହିଁ।
ଏନେଇ ୯୮୬୧୪୪୮୪୮୮ ନମ୍ବରରେ ଆକ୍ସିସ୍ ବ୍ୟାଙ୍କ କ୍ଲଷ୍ଟର ହେଡ୍ ବିକାଶ ଚନ୍ଦ୍ର ସାହୁ ଯୋଗାଯୋଗ କରି ଏ ସମ୍ପର୍କରେ ପଚାରି ବୁଝିବା ପାଇଁ ଯେତେ ଚେଷ୍ଟା କଲେ ମଧ୍ୟ ଫୋନ୍ ଉଠାଇ ନାହାନ୍ତି।