ନୂଆଦିଲ୍ଲୀ,୨୮।୩: ଉମେଶ ପାଲ ଅପହରଣ ମାମଲାରେ ପ୍ରୟାଗରାଜର ଏମ୍ପି-ଏମ୍ଏଲ୍ଏ କୋର୍ଟ ରାୟ ପ୍ରକାଶ କରିଛନ୍ତି। ୧୭ ବର୍ଷ ପୁରୁଣା ମାମଲାରେ ଅତିକ ଅହମ୍ମଦଙ୍କ ସମେତ ୩ଜଣଙ୍କୁ କୋର୍ଟ ମଙ୍ଗଳବାର ଦୋଷୀ ସାବ୍ୟସ୍ତ କରିଛନ୍ତି। ସେହିପରି ଅତିକଙ୍କ ଭାଇ ଅଶରଫଙ୍କ ସମେତ ୭ ଜଣଙ୍କୁ କୋର୍ଟ ନିର୍ଦ୍ଦୋଷରେ ଖଲାସ ହୋଇଛନ୍ତି। ତେବେ କୋର୍ଟଙ୍କ ଏହି ନିଷ୍ପତ୍ତି ପରେ ଭାଜପାର ସମସ୍ତ ନେତାଙ୍କ ପ୍ରତିକ୍ରିୟା ସାମ୍ନାକୁ ଆସିଛି। ଯୋଗୀ ରାଜରେ ଦୋଷୀଙ୍କୁ ରକ୍ଷା କରାଯିବ ନାହିଁ ବୋଲି ଭାଜପା କହିଛି। ଅତିକ ଅହମ୍ମଦ ଦୋଷୀ ସାବ୍ୟସ୍ତ ହେବା ପରେ ଭାଜପାର ରାଜ୍ୟ ସଭା ଏମ୍ପି ହରନାଥ ସିଂ ଯାଦବ କହିଛନ୍ତି, ଉତ୍ତରପ୍ରଦେଶରେ ଆଇନ ଶୃଙ୍ଖଳାର ରାଜୁତି ଚାଲିଛିି, ଅପରାଧୀଙ୍କୁ ଛଡାଯିବ ନାହିଁ ସେ ଯିଏ ହେଉନା କାହିଁକି। ଅନ୍ୟପଟେ ବସ୍ତିର ଭାଜପା ଏମ୍ପି ହରିଶ ଦ୍ୱିବେଦୀ କହିଛନ୍ତି, ଏହି ନିଷ୍ପତ୍ତି ପରେ ନ୍ୟାୟର ଆଶା ବଢ଼ିଯାଇଛି ଏବଂ ଯୋଗୀ ଉତ୍ତରପ୍ରଦେଶରେ ଆଇନ ଶୃଙ୍ଖଳା ପ୍ରତିଷ୍ଠା କରିବାରେ ବ୍ୟସ୍ତ ଅଛନ୍ତି ବୋଲି ସେ କହିଛନ୍ତି। ଅନ୍ୟପଟେ ଭାଜପା ମୁଖପାତ୍ର ରାକେଶ ତ୍ରିପାଠୀ କହିଛନ୍ତି, ଯୋଗୀ ସରକାରରେ ଅତିକଙ୍କ ଭୟ ସମାପ୍ତ ହୋଇଛି। ଗୋଟିଏ ସମୟରେ ଥିଲା ଯେତେବେଳେ ଅତିିକଙ୍କ ମାମଲାରେ ଶୁଣାଣିରୁ ୧୨ଜଣ ବିଚାରପତି ନିଜକୁ ପ୍ରତ୍ୟାହାର କରିନେଇଥିଲେ। ହେଲେ ଆଜି ନ୍ୟାୟ ମିଳିଛି। ମାଫିଆକୁ ଧ୍ୱଂସ କରିବା ପାଇଁ ଆମେ ଆମର ସଂକଳ୍ପ ପୂରଣ କରିବୁ ବୋଲି ମୁଖପାତ୍ର ରାକେଶ ତ୍ରିପାଠୀ କହିଛନ୍ତି।
