ଲକ୍ଷ୍ନୌ,୧୬।୪: ଉମେଶ ପାଲ ହତ୍ୟା କାଣ୍ଡରେ ପୋଲିସ କଷ୍ଟଡି ରିମାଣ୍ଡରେ ଥିବା ମାଫିଆ ଅତିକ ଅହମଦ ଓ ତାଙ୍କ ଭାଇ ଅଶରଫଙ୍କୁ ଶନିବାର ରାତିରେ କାଲଓ୍ବିନ ହସ୍ପିଟାଲ ନିକଟରେ ଗୁଳି କରି ହତ୍ୟା କରାଯାଇଛି। ଉଭୟଙ୍କୁ ସ୍ବାସ୍ଥ୍ୟ ପରୀକ୍ଷା ପାଇଁ ହସ୍ପିଟାଲ ନିଆଯାଉଥିବା ସମୟରେ ଏହି ଘଟଣା ଘଟିଛି। ଏହି ସମୟରେ ୧୦ ରାଉଣ୍ଡ ଗୁଳି ଚଳାଯାଇଥିଲା। ଅତିକଙ୍କ କାନ ମୁଣ୍ଡାକୁ ଲକ୍ଷ୍ୟ କରି ଗୁଳି କରାଯାଇଥିଲା। ଅଜଣା ଗାଡିରେ ଆସିଥିବା ଆକ୍ରମଣକାରୀ ଆଖିବୁଜା ଗୁଳି ଚାଳନା କରିଥିଲେ। ଏହି ଘଟଣା ପରେ ଜିଲାର ସୀମାକୁ ସିଲ କରିଦିଆଯିବା ସହ ଘଟଣା ସ୍ଥଳକୁ ଆରଏଏଫକୁ ଡକାଯାଇଥିଲା।
ଏହି ଡନ ବ୍ରଦର୍ସଙ୍କ ମୃତ୍ୟୁ ଖବର ସମସ୍ତଙ୍କୁୂ ଚମକାଇ ଦେଇଥିବା ବେଳେ ଏବେ ଏହାର ତଦନ୍ତ ଉପରେ ରହିଛି ସମସ୍ତଙ୍କ ନଜର। ଏମାନଙ୍କ ହତ୍ୟାକାଣ୍ଡକୁ ନେଇ ରାଜନୀତି ସରଗରମ ହୋଇଥିବା ବେଳେ ଏସଆରଏନ ହସ୍ପିଟାଲରେ ଏମାନଙ୍କର ପୋଷ୍ଟ ମର୍ଟମ କରାଯିବ ବୋଲି ଜଣାପଡିଛି। ତେବେ ଏଥିପାଇଁ କଡା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି।
