ତେହେରାନ୍,୧୦ା୧୨: ସିରିଆରେ ବିଦ୍ରୋହୀମାନେ ରାଜଧାନୀ ଡମାସ୍କସ୍କୁ ଅକ୍ତିଆର କରିବା ସହ ରାଷ୍ଟ୍ରପତି ବଶର ଅଲ୍-ଅସାଦଙ୍କୁ କ୍ଷମତାଚ୍ୟୁତ କରିଛନ୍ତି। ଯୁଦ୍ଧ ଅପରାଧ ମାମଲାରେ ଅସାଦ ଓ ସିରିଆର ଅନ୍ୟ ଶୀର୍ଷ ଅଧିକାରୀମାନେ ବିଚାରର ସମ୍ମୁଖୀନ ହେବେ ବୋଲି ଜାତିସଂଘ ମାନବାଧିକାର ମୁଖ୍ୟ ଭୋଲକର ତୁର୍କ ସୋମବାର କହିଛନ୍ତି। ସିରିଆରେ କ୍ଷମତା ହନ୍ତାନ୍ତର ପ୍ରକ୍ରିୟା ଗୃହଯୁଦ୍ଧ ବେଳର ଯୁଦ୍ଧ ଅପରାଧ ପାଇଁ ଉତ୍ତରଦାୟୀରୁ ଅଲଗା ହେବା ଉଚିତ ନୁହେଁ ବୋଲି ସେ କହିଛନ୍ତି।
ଇରାନର ଗୁରୁତ୍ୱପୂର୍ଣ୍ଣ ସହଯୋଗୀ ଥିଲେ। ତେଣୁ ସମ୍ପର୍କରେ ପ୍ରତିକୂଳ ସ୍ଥିତି ସୃଷ୍ଟି ହେବା ଇରାନ ଚାହୁଁନାହିଁ। ସେଥିପାଇଁ ନୂଆ ନେତୃତ୍ୱ ନିମନ୍ତେ ତେହେରାନ ବିଦ୍ରୋହୀ ଗୋଷ୍ଠୀ ସହ ପ୍ରତ୍ୟକ୍ଷ ଯୋଗାଯୋଗରେ ରହିଥିବା ଜଣାପଡ଼ିଛି। ହୟାତ୍ ତାହରିର୍ ଅଲ୍-ଶାମ ନେତୃତ୍ୱରେ ବିଦ୍ରୋହୀ ଯୋଦ୍ଧାମାନେ ଦୀର୍ଘ ବର୍ଷର ଅସାଦ୍ ଶାସନର ଅବସାନ ଘଟାଇଛନ୍ତି। ମଧ୍ୟପ୍ରାଚ୍ୟରେ ଏହା ସବୁଠୁ ବଡ଼ ନିର୍ଣ୍ଣାୟକ ମୋଡ଼। କାରଣ ଅସାଦଙ୍କ ଜରିଆରେ ଇରାନ ଏବଂ ରୁଷିଆ ଆରବ ଜଗତରେ ପ୍ରଭାବ ବିସ୍ତାର କରିଥିଲେ। ଅସାଦଙ୍କ ପତନ ସହ ସେମାନଙ୍କ ଗଡ଼ର ଅବସାନ ଘଟିଥିବା ବିଦ୍ରୋହୀ କହିଥିଲେ। ଡମାସ୍କସ୍ରେ କ୍ଷମତା ପରିବର୍ତ୍ତନ ସିରିଆରେ ଆଇନର ପ୍ରଭାବ ହ୍ରାସ ପାଇବ, ଯେଉଁଥି ପାଇଁ ତେହେରାନ ଚିନ୍ତିତ ଥିବା କୁହାଯାଉଛି।
ବିଦ୍ରୋହୀ ଡମାସ୍କସ୍ ଦଖଲ କରିବା ପରେ ସିରିଆର ୪,୦୦୦ ସୈନ୍ୟ ଇରାକ୍ ପଳାଇଯାଇଥିଲେ ବୋଲି ଏହାର ଜଣେ ଅଧିକାରୀ କହିଛନ୍ତି। ସେମାନଙ୍କୁ ଏକ କ୍ୟାମ୍ପ୍ରେ ରଖାଯାଇଛି। ରବିବାର ବିଳମ୍ବିତ ରାତିରେ ସିରିଆର ହାସାକେହ ପ୍ରଦେଶର ଗଭର୍ନର ମଧ୍ୟ ସୀମା ଅତିକ୍ରମ କରିବାକୁ ଚାହିଁଥିଲେ। କ୍ୱାଇମ୍ କ୍ରସିଂ ଦେଇ ତାଙ୍କୁ ଇରାକରେ ପ୍ରବେଶ ଅନୁମତି ଦିଆଯାଇଥିଲା। ଇରାକ୍ ପୂର୍ବରୁ ଅସାଦଙ୍କ ସମର୍ଥକ ରହିଆସିଥିବାବେଳେ ତାଙ୍କର ପତନ ପରେ ନିରପେକ୍ଷ ରହିଛି।
ସିରିଆରେ ସ୍ଥିରତା ଫେରାଇ ଆଣିବା ପାଇଁ ଏକ ଶାନ୍ତିପୂର୍ଣ୍ଣ ଏବଂ ସମାବେଶୀ ସିରିଆ ନେତୃତ୍ୱାଧୀନ ରାଜନୈତିକ ପ୍ରକ୍ରିୟା ସପକ୍ଷରେ ଭାରତ ମତ ଦେଇଛି। ସିରିଆର ଏକତା, ସାର୍ବଭୌମତ୍ୱ ଏବଂ ପାରମ୍ପରିକ ଅଖଣ୍ଡତାର ସୁରକ୍ଷା ପାଇଁ ସବୁ ପକ୍ଷ ଏକାଠି କାର୍ଯ୍ୟ କରିବା ଆବଶ୍ୟକ ବୋଲି ଭାରତର ବହିର୍ବ୍ୟାପାର ମନ୍ତ୍ରଣାଳୟ କହିଛି।
