କୁଏତ,୧୩ ।୬: ଭାରତୀୟ ଜନତା ପାର୍ଟି(ଭାଜପା)ର ପୂର୍ବତନ ପ୍ରବକ୍ତା ନୁପୁର ଶର୍ମାଙ୍କ ବିରୋଧରେ ଜୁନ ୧୦ରେ ଫହାହିଲ ଅଞ୍ଚଳରେ ବିରୋଧ ପ୍ରଦର୍ଶନ କରୁଥିବା ଭାରତୀୟଙ୍କ ସମେତ ଅଣପ୍ରବାସୀ ଏସିଆ ନାଗରିକଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ପାଇଁ ନିଷ୍ପତ୍ତି ନିଆଯାଇଛି । ଏମାନଙ୍କୁ ଗିରଫ କରାଯାଇଛି ଓ ଏବେ ସେମାନଙ୍କୁ ନିଜ ନିଜ ଦେଶକୁ ପଠାଇ ଦିଆଯିବ ।
ସୂଚନାଯୋଗ୍ୟ, ଫହାହିଲ ଅଞ୍ଚଳରେ ଏମାନେ ଯେତେବେଳେ ଏକାଠି ହୋଇ ବିରୋଧ ପ୍ରଦର୍ଶନ କରୁଥିଲେ ଖବର ପାଇ ବହୁ ସଂଖ୍ୟାରେ ପୋଲିସ ସେଠାରେ ପହଞ୍ଚିଥିଲେ । ଏହାପରେ ସମସ୍ତଙ୍କୁ ଏକାଠି ଟ୍ରକଯୋଗେ ସେଠାରୁ ନିଆଯାଇଥିଲା । ଆଇନ ଉଲ୍ଲଂଘନ ଅଭିଯୋଗରେ ସମସ୍ତଙ୍କ ଭିଜା ରଦ୍ଦ କରାଯିବା ସହ ବିରୋଧ ପ୍ରଦର୍ଶନ କରୁଥିବା ଲୋକଙ୍କୁ ନିର୍ବାସନ କେନ୍ଦ୍ରକୁ ପଠାଇ ଦିଆଯାଇଥିଲା । ଏବେ ଏହି ସମସ୍ତ ପ୍ରବାସୀ ନାଗରିକଙ୍କୁ ସେମାନଙ୍କ ଦେଶକୁ ପଠାଇ ଦିଆଯିବ । ଏବେ ପୋଲିସ ଯାଞ୍ଚ କରୁଛି ଯେ ଏମାନଙ୍କୁ ବିରୋଧ ପ୍ରଦର୍ଶନ କରିବାକୁ କିଏ ଉସକାଇଥିଲା ।
ନିର୍ବାସିତ କେନ୍ଦ୍ର ପଠାଯାଇଥିବା ସମସ୍ତ ଭାରତୀୟ ସମେତ ଏସିଆ ନାଗରିକଙ୍କ ଉପରେ ପ୍ରତିବନ୍ଧକ ଲଗାଯାଇଛି । ଏମାନେ ଦ୍ୱିତୀୟ ଥର କୁଏତ ପ୍ରବେଶ କରିପାରିବେ ନାହିଁ ।
