ଆବୁଧାବି,୧୦।୯: ଏସିଆ କପ ୨୦୨୫ ଆରମ୍ଭ ହେବା ପୂର୍ବରୁ ଆୟୋଜିତ ସାମ୍ବାଦିକ ସମ୍ମିଳନୀ ଏବେ ପଡ଼ିଆ ଅପେକ୍ଷା ସୋସିଆଲ ମିଡିଆରେ ଅଧିକ ଶିରୋନାମା ସୃଷ୍ଟି କରୁଛି। ଏହାର କାରଣ ହେଉଛି ଭାରତୀୟ ଅଧିନାୟକ ସୂର୍ଯ୍ୟକୁମାର ଯାଦବ ପାକିସ୍ତାନ ଗୃହମନ୍ତ୍ରୀ ଏବଂ ପାକିସ୍ତାନ କ୍ରିକେଟ ବୋର୍ଡ (PCB) ସଭାପତି ମୋହସିନ ନକଭିଙ୍କ ସହ ହାତ ମିଳାଇବା। ନକଭି ସେହି ବ୍ୟକ୍ତି ଯିଏ କିଛି ଦିନ ପୂର୍ବରୁ ଭାରତ ଉପରେ ପରମାଣୁ ଆକ୍ରମଣ କରିବାକୁ ଧମକ ଦେଇଥିଲେ। ଏହି କାରଣରୁ ତାଙ୍କ ସହ ସୂର୍ଯ୍ୟକୁମାର ହାତ ମିଳାଇବାର ଭିଡିଓ ସାମ୍ନାକୁ ଆସିବା ମାତ୍ରେ ଲୋକମାନେ ରାଗି ଯାଇଛନ୍ତି।
ଏସିଆ କପର ସରକାରୀ ସାମ୍ବାଦିକ ସମ୍ମିଳନୀ ଆବୁଧାବିରେ ଅନୁଷ୍ଠିତ ହୋଇଥିଲା, ଯେଉଁଥିରେ ସମସ୍ତ ଦଳର ଅଧିନାୟକ ଉପସ୍ଥିତ ଥିଲେ। ଏସୀୟାନ କ୍ରିକେଟ କାଉନସିଲ (ACC)ର ସଭାପତି ଭାବରେ ମୋହସିନ ନକଭି ମଧ୍ୟ ମଞ୍ଚକୁ ଆସିଥିଲେ। ଏହି ସମୟରେ ନକଭି ସୂର୍ଯ୍ୟକୁମାର ଯାଦବଙ୍କୁ ସ୍ବାଗତ କରିଥିଲେ ଏବଂ ଉଭୟ ହାତ ମିଳାଇଥିଲେ। ଏହି ମୁହୂର୍ତ୍ତ କ୍ୟାମେରାରେ କଏଦ ହୋଇଥିଲା ଏବଂ କିଛି ମିନିଟ ମଧ୍ୟରେ ଏହାର ଭିଡିଓ ଇଣ୍ଟରନେଟରେ ଭାଇରାଲ ହୋଇଥିଲା।
ଭିଡିଓଟି ସାମ୍ନାକୁ ଆସିବା ମାତ୍ରେ ଭାରତୀୟ ପ୍ରଶଂସକମାନେ ସୋସିଆଲ ମିଡିଆରେ ତୀବ୍ର ପ୍ରତିକ୍ରିୟା ପ୍ରକାଶ କରିବା ଆରମ୍ଭ କରିଥିଲେ। ଅନେକ ଲୋକ ଏହାକୁ ‘କ୍ରିକେଟ କୂଟନୀତି’ କହି ସମାଲୋଚନା କରିଥିଲେ, ଯେତେବେଳେ କେତେକ ଏହାକୁ ଶହୀଦ ସୈନିକଙ୍କ ବଳିଦାନର ଅପମାନ ବୋଲି କହିଥିଲେ।
ର୍ଶୌଯ୍ୟଚକ୍ର ବିଜେତା (ଅବସରପ୍ରାପ୍ତ) ମେଜର ପବନ କୁମାର ମଧ୍ୟ ଏହା ଉପରେ ନିଜର କ୍ରୋଧ ପ୍ରକାଶ କରି X (ପୂର୍ବ ଟୁଇଟରରେ) ଲେଖିଛନ୍ତି, ‘ଆଜି ପାକିସ୍ତାନୀ ଆତଙ୍କବାଦୀମାନେ ଆମର ଦୁଇ ସୈନିକଙ୍କୁ ଶହୀଦ କରିଛନ୍ତି ଏବଂ ଭାରତୀୟ ଦଳର ଅଧିନାୟକ ହସି ହସି PCB ସଭାପତି ମୋହସିନ ନକଭିଙ୍କ ସହ ହାତ ମିଳାଉଛନ୍ତି। ଏହି ନକଭି ହେଉଛନ୍ତି ସେହି ନକଭି ଯିଏ ଭାରତ ଉପରେ ପରମାଣୁ ଆକ୍ରମଣ କରିବାକୁ ଧମକ ଦେଇଥିଲେ। ଯଦି ଏହାକୁ କ୍ରୀଡ଼ା କୂଟନୀତି କୁହାଯାଏ, ତେବେ ଏହା ଅତ୍ୟନ୍ତ ଲଜ୍ଜାଜନକ।’ ଏହା ଉଲ୍ଲେଖନୀୟ ଯେ ମୋହସିନ ନକଭି ପାକିସ୍ତାନର ଗୃହମନ୍ତ୍ରୀ ଏବଂ PCB ସଭାପତି। ସେ ତାଙ୍କର ଭାରତ ବିରୋଧୀ ବୟାନବାଜି ପାଇଁ ବିଖ୍ୟାତ। ସମ୍ପ୍ରତି, ସେ ଅପରେଶନ ସିନ୍ଦୂର ପରେ ମଧ୍ୟ ଭାରତ ବିରୁଦ୍ଧରେ ଜ୍ୱଳନ୍ତ ମନ୍ତବ୍ୟ ଦେଇଥିଲେ। ଏହି କାରଣରୁ, ମଞ୍ଚରେ ଭାରତୀୟ ଅଧିନାୟକଙ୍କ ସହ ତାଙ୍କର ହାତ ମିଳାଇବା ଲୋକଙ୍କୁ ବିରକ୍ତ କରିଥିଲା। ଅନେକ ପ୍ରଶଂସକ ଲେଖିଛନ୍ତି ଯେ ‘ଆମେ ପହଲଗାମ ଆତଙ୍କବାଦୀ ଆକ୍ରମଣର ପୀଡିତ ପରିବାରଙ୍କୁ କ୍ଷମା ମାଗିବା ଉଚିତ। ଯେତେବେଳେ ଆମର ସୈନିକମାନେ ଶହୀଦ ହେଉଛନ୍ତି, ଆମର ଖେଳାଳିମାନେ ପାକିସ୍ତାନୀ ନେତାଙ୍କ ସହ ହାତ ମିଳାଉଛନ୍ତି। ଏହାକୁ ଆଦୌ ସହ୍ୟ କରାଯାଇପାରିବ ନାହିଁ।’ ଆଉ ଜଣେ ୟୁଜର କହିଛନ୍ତି, ‘କ୍ରିକେଟ କୂଟନୀତି ଅପେକ୍ଷା ଦେଶର ମର୍ଯ୍ୟାଦା ଅଧିକ ଗୁରୁତ୍ୱପୂର୍ଣ୍ଣ।’
