ଦୁବାଇ, ୬।୧୦: ଆଇପିଏଲ୍ ଚଳିତ ସଂସ୍କରଣରେ ସୋମବାର ଅନୁଷ୍ଠିତ ଏକ ହାଇସ୍କୋରିଂ ମୁକାବିଲାରେ ଦିଲ୍ଲୀ କ୍ୟାପିଟାଲ୍ସ ୫୯ ରନରେ ବିରାଟ କୋହଲିଙ୍କ ନେତୃତ୍ୱାଧୀନ ରୟାଲ୍ ଚ୍ୟାଲେଞ୍ଜର୍ସ ବାଙ୍ଗାଲୋରକୁ ପରାସ୍ତ କରିଛି। ମ୍ୟାଚ୍ରେ ପ୍ରଥମେ ବ୍ୟାଟିଂ କରି ଦିଲ୍ଲୀ ୧୯୫ ରନ କରିଥିଲା। ଜବାବରେ ବାଙ୍ଗାଲୋର ୧୩୭ ରନ କରିବାକୁ ସମର୍ଥ ହୋଇଥିଲା। ଏହି ମ୍ୟାଚ୍ରେ ଦିଲ୍ଲୀର ପ୍ରମୁଖ ସ୍ପିନର ରବିଚନ୍ଦ୍ରନ ଅଶ୍ୱିନ ଗୋଟିଏ ଉଇକେଟ୍ ହାସଲ କରିପାରି ନ ଥିଲେ ମଧ୍ୟ ଭିନ୍ନ ଏକ କାରଣ ଲାଗି ଚର୍ଚ୍ଚାରେ ରହିଥିଲେ।
ଇନିଂସର ୩ୟ ଓଭରରେ ଅଶ୍ୱିନୀ ବୋଲିଂ କରିଥିଲେ। ଏହି ସମୟରେ ଏକ ବଲ୍ ଅଶ୍ୱିନଙ୍କ ହାତରୁ ରିଲିଜ୍ ହୋଇ ନ ଥିବାବେଳେ ନନ୍-ଷ୍ଟ୍ରାଇକରେ ଥିବା ବିସ୍ଫୋରକ ବ୍ୟାଟ୍ସମ୍ୟାନ ଆରୋନ୍ ଫିଞ୍ଚ୍ କ୍ରିଜ ଛାଡ଼ି ବାହାରକୁ ଚାଲିଯାଇଥିଲେ। ଏହି ସମୟରେ ଅଶ୍ୱିନ ବଲ୍କୁ ନ ପକାଇ ହାତରେ ରଖି ଦେଇଥିଲେ ଏବଂ ଫିଞ୍ଚ୍ଙ୍କୁ କ୍ରିଜ୍ ଭିତରରେ ରହିବାକୁ ଚେତାବନୀ ଦେଇ ‘ମଙ୍କଡିଙ୍ଗ୍’ ଆଉଟ୍ ନ କରିଛାଡ଼ି ଦେଇଥିଲେ। ଏଠାରେ ସ୍ମରଣଯୋଗ୍ୟ, ଗତ ବର୍ଷ ଆଇପିଏଲ୍ରେ ଅଶ୍ୱିନ ରାଜସ୍ଥାନ ବ୍ୟାଟ୍ସମ୍ୟାନ ଜୋଶ୍ ବଟ୍ଲରଙ୍କୁ ସମାନ ଢଙ୍ଗରେ ‘ମଙ୍କଡିଙ୍ଗ୍’ ଆଉଟ୍ କରି ବେଶ୍ ଚର୍ଚ୍ଚାରେ ରହିଥିଲେ। ଯାହାକୁ ନେଇ ସେତେବେଳେ ଖୁବ୍ ବିତର୍କ ହୋଇଥିଲା। ଏପରିକି କେତେକ ପୂର୍ବତନ ଖେଳାଳି ଏଭଳି ଆଉଟ୍କୁ ଖେଳ ଭାବନାର ବିପରୀତ ବୋଲି କହିଥିଲେ। ତେବେ ଚଳିତ ଥର ଫିଞ୍ଚ୍ଙ୍କୁ ଚେତାବନୀ ଦେଇ ଛାଡ଼ିବା ପରେ ଅଶ୍ୱିନ ଟୁଇଟ୍ କରି କହିଛନ୍ତି, ‘ମୁଁ ସ୍ପଷ୍ଟ ଭାବେ କହିଦେଉଛି, ୨୦୨୦ ଆଇପିଏଲ୍ରେ ଏହା ପ୍ରଥମ ଓ ଅନ୍ତିମ ଚେତାବନୀ। ଏହାେ ମୁଁ ଆନୁଷ୍ଠନିକ ଭାବେ ଚେତାବନୀ ଦେଉଛି। ପରେ ମୋତେ ଆଉ କେହି ଦୋଷ ଦେବେ ନାହିଁ।’
