କୋରାପୁଟ,୨୬ା୧୧(ସ୍ବ.ପ୍ର.): କୋରାପୁଟ ବ୍ଲକର ସୁକୁ ପଞ୍ଚାୟତରେ ଏକ ଜମି ପଟ୍ଟା କରାଇ ଦେବା ପାଇଁ ଲାଞ୍ଚ ନେଉଥିବାବେଳେ ଶନିବାର ଜଣେ ସହକାରୀ ରାଜସ୍ବ ନିରୀକ୍ଷକ (ଏଆର୍ଆଇ) ଜୟପୁର ଭିଜିଲାନ୍ସ ବିଭାଗ ଦ୍ୱାରା ଧରା ପଡ଼ି କୋର୍ଟଚାଲାଣ ହୋଇଥିବା ଜଣାପଡ଼ିଛି।
ମିଳିଥିବା ସୂଚନାନୁଯାୟୀ, କୋରାପୁଟ ତହସିଲର ସୁକୁ ଏଆର୍ଆଇ ଅମିତ ବେହେରା ପୈତୃକ ସମ୍ପତ୍ତିକୁ ୨ ଭାଇଙ୍କ ମଧ୍ୟରେ ଭାଗବଣ୍ଟା କରି ଜମି ପଟ୍ଟା କରାଇ ଦେବା ପାଇଁ ଶନିବାର ଜୟପୁରଠାରେ ୬ ହଜାର ଟଙ୍କା ଲାଞ୍ଚ ନେଉଥିବାବେଳେ ଜୟପୁର ଭିଜିଲାନ୍ସ ବିଭାଗ ଦ୍ୱାରା ଗିରଫ ହୋଇଥିବା ଜଣାପଡ଼ିଛି। ଜୟପୁର ଭିଜିଲାନ୍ସ ଏକ ଟିମ୍ କୋରାପୁଟ ବାସଭବନରେ ଚଢ଼ାଉ କରୁଥିବା ଜଣାପଡ଼ିଛି। ଜୟପୁର ବ୍ଲକର ମହାଳିଆପୁଟ ଗ୍ରାମର ନନ୍ଦୁ ଖରା ବାପାଙ୍କ ନାମରେ କୋରାପୁଟ ତହସିଲର ସୁକୁ ଗ୍ରାମରେ ଥିବା କିଛି ଜମି ରହିଥିଲା। ବାପାଙ୍କ ମୃତ୍ୟୁ ପରେ ନନ୍ଦୁ ଖରା ସେହି ଜମିକୁ ନିଜ ୨ ଭାଇଙ୍କ ମଧ୍ୟରେ ଭାଗ ବଣ୍ଟା କରି ଜମି ପଟ୍ଟା କରାଇ ଦେବା ପାଇଁ ପୂର୍ବରୁ ଏଆର୍ଆଇ ୨୦ହଜାର ଟଙ୍କା ମାଗିଥିବାବେଳେ ନନ୍ଦୁ ୧୦ ହଜାର ଟଙ୍କା ସୁକୁ ଏଆର୍ଆଇ କାର୍ଯ୍ୟାଳୟକୁ ଯାଇ ଦେଇଥିଲେ। ବଳକା ୧୦ ହଜାର ଟଙ୍କା ଏଆର୍ଆଇ ଅମିତ ବାରମ୍ବାର ମାଗିବାରୁ ନନ୍ଦୁ ଏସମ୍ପର୍କରେ ଜୟପୁର ଭିଜିଲାନ୍ସର ଦ୍ୱାରସ୍ଥ ହୋଇଥିଲେ।ଶନିବାର ବଳକା ଟଙ୍କା ଦେବା ପାଇଁ ଅମିତ ନନ୍ଦୁଙ୍କୁ ଜୟପୁରର ପାରାବେଡ଼ା ଛକ ଆସିବା ପାଇଁ କହିବାରୁ ନନ୍ଦୁ ଭିଜିଲାନ୍ସ ପକ୍ଷରୁ ରଙ୍ଗବୋଳା ଦିଆଯାଇଥିବା ୬ ହଜାର ଟଙ୍କା ଧରି ପାରାବେଡା ଛକଠାରେ ଆସି ଅମିତକୁ ଦେବା ସମୟରେ ପୂର୍ବରୁ ଯୋଜନା ମୁତାବକ ଜୟପୁର ଭିଜିଲାନ୍ସ ଟିମ୍ ଅମିତଙ୍କୁ ମାଡ଼ି ବସିଥିଲେ। ବର୍ତ୍ତମାନ ଅଭିଯୁକ୍ତ ଏଆର୍ଆଇକୁ ଗିରଫ କରାଯାଇଥିବାବେଳେ ଏକ ମାମଲା ରୁଜୁ କରି କୋର୍ଟ ଚାଲାଣ କରାଯାଇଛି। ସେହିପରି ଭିଜିଲାନ୍ସର ଅନ୍ୟ ଦୁଇଟି ଟିମ୍ ସୁକୁସ୍ଥିତ ଏଆର୍ଆଇ କାର୍ଯ୍ୟାଳୟ ଓ କୋରାପୁଟ କୋଲାବ କଲୋନୀଠାରେ ଥିବା ତାଙ୍କ ବାସଭବନରେ ଚଢ଼ାଉ ଜାରି ରହିଥିବା ଜଣାଯାଇଛି।
