ନୂଆଦିଲ୍ଲୀ, ୨।୫: ଆପଲ୍ ଗୁରୁବାର ପ୍ରଥମ ତ୍ରୈମାସିକରେ ଆଶାଠାରୁ ଅଧିକ ଲାଭ ଘୋଷଣା କରିଛି, କିନ୍ତୁ ଯୁକ୍ତରାଷ୍ଟ୍ର ଆମେରିକାର ଶୁଳ୍କ ନୀତି ଯୋଗୁଁ କମ୍ପାନୀକୁ ଆର୍ଥିକ କ୍ଷତି ହେବା ସହ ଏହାର ଯୋଗାଣ ଶୃଙ୍ଖଳାରେ ବାଧା ସୃଷ୍ଟି ହେଉଥିବା ଚେତାବନୀ ପାଇଛି।
ଆପଲ୍ର ମୁଖ୍ୟ କାର୍ଯ୍ୟନିର୍ବାହୀ ଟିମ୍ କୁକ୍ କହିଛନ୍ତି ଯେ, ଚଳିତ ତ୍ରୈମାସିକରେ ଆମେରିକାର ଶୁଳ୍କ ଯୋଗୁଁ ୯୦୦ ମିଲିୟନ୍ ଡଲାର୍ କ୍ଷତି ହେବ ବୋଲି ଆଶଙ୍କା କରାଯାଉଛି, ଯଦିଓ ଏହାର ପ୍ରଭାବ ବର୍ଷ ଆରମ୍ଭରେ “ସୀମିତ” ଥିଲା।
କୁକ୍ କହିଛନ୍ତି, “ଆମେରିକାରେ ବିକ୍ରି ହେଉଥିବା ଅଧିକାଂଶ ଆଇଫୋନ୍ର ଉତ୍ପତ୍ତି ଦେଶ ଭାରତ ହେବ,” ଏବଂ ଆପଲ୍ର ଉତ୍ପାଦଗୁଡ଼ିକ ବର୍ତ୍ତମାନ ଟ୍ରମ୍ପଙ୍କ ସବୁଠାରୁ କଠୋର ପ୍ରତିଶୋଧମୂଳକ ଶୁଳ୍କରୁ ମୁକ୍ତ ରହିଛି।
ସେ ଆହୁରି କହିଛନ୍ତି, “ଆମେ ଶୁଳ୍କର ପ୍ରଭାବକୁ ସଠିକ୍ ଭାବେ ଆକଳନ କରିପାରୁନାହୁଁ, କାରଣ ତ୍ରୈମାସିକ ଶେଷ ହେବା ପୂର୍ବରୁ ଭବିଷ୍ୟତ କାର୍ଯ୍ୟକ୍ରମ ସମ୍ପର୍କରେ ଅନିଶ୍ଚିତତା ରହିଛି। ବର୍ତ୍ତମାନର ବିଶ୍ୱ ଶୁଳ୍କ ହାର, ନୀତି ଏବଂ ପ୍ରୟୋଗ ଅପରିବର୍ତ୍ତିତ ରହିଲେ ଏବଂ ନୂଆ ଶୁଳ୍କ ଯୋଡ଼ା ନଗଲେ, ଆମେ ଆକଳନ କରୁଛୁ ଯେ ଏହା ଆମର ଖର୍ଚ୍ଚରେ ୯୦୦ ମିଲିୟନ୍ ଡଲାର୍ ଯୋଡ଼ିବ।”
ପାଲଟା ଶୁଳ୍କ ବିନିମୟ ଯୋଗୁଁ ଚାଇନା ଉପରେ ଯୁକ୍ତରାଷ୍ଟ୍ର ଭାରୀ ଶୁଳ୍କ ଲାଗୁ କରିଛି, ଏବଂ ବେଜିଂ ଯୁକ୍ତରାଷ୍ଟ୍ରର ଆମଦାନୀ ଉପରେ ପ୍ରତିଶୋଧମୂଳକ ପ୍ରତିବନ୍ଧକ ଲଗାଇଛି।
ସ୍ମାର୍ଟଫୋନ୍, ସେମିକଣ୍ଡକ୍ଟର ଏବଂ କମ୍ପ୍ୟୁଟର ଭଳି ଉଚ୍ଚମାନର ଟେକ୍ ଉତ୍ପାଦଗୁଡ଼ିକ ଯୁକ୍ତରାଷ୍ଟ୍ରର ଶୁଳ୍କରୁ ଅସ୍ଥାୟୀ ମୁକ୍ତି ପାଇଛି।
କାନାଲିସ୍ ରିସର୍ଚ୍ଚ ମ୍ୟାନେଜର ଲେ ଜୁଆନ୍ ଚିୟୁ କହିଛନ୍ତି, “ଆପଲ୍ ଆଗୁଆ ଶୁଳ୍କ ନୀତିକୁ ଦୃଷ୍ଟିରେ ରଖି ଅନେକ ଗୁଡିଏ ଉତ୍ପାଦ ମହଜୁଦ କରିଥିଲା। ପାଲଟା ଶୁଳ୍କ ନୀତିରେ ଚାଲୁଥିବା ଅସ୍ଥିରତା ମଧ୍ୟରେ, ଆପଲ୍ ଭବିଷ୍ୟତ ଚାପ ହ୍ରାସ କରିବା ପାଇଁ ଯୁକ୍ତରାଷ୍ଟ୍ର ଅଭିମୁଖୀ ଉତ୍ପାଦନକୁ ଭାରତକୁ ଆହୁରି ସ୍ଥାନାନ୍ତର କରିବାର ସମ୍ଭାବନା ରହିଛି।”
କାନାଲିସ୍ ଅନୁଯାୟୀ, ଚାଇନାରେ ଉତ୍ପାଦିତ ଆଇଫୋନ୍ ଏବେ ମଧ୍ୟ ଯୁକ୍ତରାଷ୍ଟ୍ର ପାଇଁ ଅଧିକାଂଶ ଯୋଗାଣରେ ରହିଥିଲେ ହେଁ, ତ୍ରୈମାସିକର ଶେଷ ଆଡ଼କୁ ଭାରତରେ ଉତ୍ପାଦନ ବୃଦ୍ଧି ପାଇଛି।
କୁକ୍ କହିଛନ୍ତି, ଯୁକ୍ତରାଷ୍ଟ୍ରରେ ବିକ୍ରି ହେଉଥିବା ପ୍ରାୟ ସମସ୍ତ ଆଇପ୍ୟାଡ୍, ମ୍ୟାକ୍, ଆପଲ୍ ୱାଚ୍ ଏବଂ ଏୟାରପଡ୍ ଉତ୍ପାଦର ଉତ୍ପତ୍ତି ଦେଶ ଭିଏତନାମ ହେବ।
ସେ ଜୋର ଦେଇ କହିଛନ୍ତି ଯେ, ଆମେରିକା ବାହାରେ ବିକ୍ରି ପାଇଁ ଅଧିକାଂଶ ଆପଲ୍ ଉତ୍ପାଦ ଚାଇନାରେ ନିର୍ମାଣ ହେବ।
ଆୟ ରିପୋର୍ଟ ଅନୁଯାୟୀ, ସମ୍ପ୍ରତି ଶେଷ ହୋଇଥିବା ତ୍ରୈମାସିକରେ ଆପଲ୍ର ୯୫.୪ ବିଲିୟନ୍ ଡଲାର୍ ରାଜସ୍ୱ ଆଇଫୋନ୍ ବିକ୍ରି ଦ୍ୱାରା ହୋଇଥିଲା, ଯେଉଁଥିରେ କମ୍ପାନୀ ଚାଇନା ବଜାରରୁ ୧୭ ବିଲିୟନ୍ ଡଲାର୍ ଆୟ କରିଛି। ତ୍ରୈମାସିକରେ ଲାଭ ଥିଲା ୨୪.୮ ବିଲିୟନ୍ ଡଲାର୍।
ତେବେ ଆପଲ୍ର ଉତ୍ପାଦନକୁ ଭାରତକୁ ସ୍ଥାନାନ୍ତର କରିବା ଯୋଜନା “କାର୍ଯ୍ୟନିର୍ବାହ ସମୟସୀମା, କ୍ଷମତା ସୀମା ଏବଂ ଅନିବାର୍ଯ ଖର୍ଚ୍ଚ ବୃଦ୍ଧି ସମ୍ପର୍କିତ ଜରୁରୀ ପ୍ରଶ୍ନ ଉଠାଉଛି, ଯାହା ମାର୍ଜିନ୍ ହ୍ରାସ କରିପାରେ, ଗ୍ରାହକଙ୍କୁ ହସ୍ତାନ୍ତର ହୋଇପାରେ କିମ୍ବା ମିଶ୍ରିତ ପରିଣାମ ଆଣିପାରେ,” ବୋର୍ନ୍ ଯୋଗ କରିଛନ୍ତି।
