ହାଟଡିହୀ,୭ା୭(ଶୁଭକାନ୍ତ ନାୟକ): ସୂଚନା ଅଧିକାର ଆଇନ ଅନୁସାରେ କେନ୍ଦୁଝର ଜିଲା ହାଟଡିହୀ ବ୍ଲକ ଅଞ୍ଚଳର ଜଣେ ବ୍ୟକ୍ତି ଏକ ସୂଚନା ସମ୍ପର୍କରେ ତଥ୍ୟ ପାଇବା ପାଇଁ କେନ୍ଦୁଝର ଜିଲାପାଳଙ୍କ କାର୍ଯ୍ୟାଳୟର ଜନ ସୂଚନା ଅଧିକାରୀଙ୍କ ନିକଟରେ ୧୦.୧୦.୨୦୨୩ରେ ଆବେଦନ କରିଥିଲେ। ଜନ ସୂଚନା ଅଧିକାରୀ ପ୍ରଭୁ କଲ୍ୟାଣ ଦାସ ୩୦ ପୃଷ୍ଠା ସମ୍ବଳିତ ତଥ୍ୟ ପ୍ରଦାନ ପାଇଁ ଜେରକ୍ସ ଖର୍ଚ୍ଚ ବାବଦରେ ୬୦ ଟଙ୍କା ଡେପୁଟି କଲେକ୍ଟର ଏମର୍ଜନି୍ସଙ୍କ ଠାରେ ଜମା କରିବାକୁ ଜଣାଇଥିଲେ। ଧାର୍ଯ୍ୟ ସମୟ ମଧ୍ୟରେ ଆବେଦନକାରୀ ଉକ୍ତ ଟଙ୍କା ଜମା କରିଥିଲେ। ଟଙ୍କା ଜମା ହୋଇ ନ ଥିବା ଦର୍ଶାଇ ୨୦ ଦିନ ପରେ ଜନ ସୂଚନା ଅଧିକାରୀ ପ୍ରଭୁ କଲ୍ୟାଣ ଆବେଦନ ପତ୍ରକୁ ନାକଚ କରିଦେଇଥିଲେ। ଫଳରେ ପ୍ରଥମ ଅପିଲେଟ ଅଧିକାରୀ ତଥା ଏଡିଏମଙ୍କ ନିକଟରେ ଆବେଦନକାରୀ ଅପିଲ କରିଥିଲେ। ଅପିଲ କେସ୍ ନଂ ୧୮/୨୦୨୩ ଅଟେ l ୨୦୨୩ ଡିସେମ୍ବର ୨୨ରେ ଶୁଣାଣି ପାଇଁ ଦିନ ଧାର୍ଯ୍ୟ ହୋଇଥିଲା। ୨୦୨୪ ଫେବୃଆରୀ ୨ରେ ଅର୍ଡର ପ୍ରକାଶ ହୋଇଥିଲା। ଅର୍ଡରରେ ଦର୍ଶାଯାଇଛି ଯେ, ଶୁଣାଣି ସମୟରେ ଉକ୍ତ ୬୦ ଟଙ୍କା ଜମା ହୋଇଥିବା ସ୍ପଷ୍ଟ ହୋଇଥିଲା। ଜମା ହୋଇଥିବା ଟଙ୍କା ବାବଦରେ ଜନ ସୂଚନା ଅଧିକାରୀ ପ୍ରଭୁ କଲ୍ୟାଣ ଜାଣି ନ ଥିବା ଶୁଣାଣିରେ କହିଥିଲେ। ବିନା ମୂଲ୍ୟରେ ସୂଚନା ପ୍ରଦାନ ପାଇଁ ଅପିଲେଟ ଅଧିକାରୀ ତଥା ଏଡିଏମ ଯଦୁମଣି ମହଲା ଜନ ସୂଚନା ଅଧିକାରୀ ପ୍ରଭୁ କଲ୍ୟାଣଙ୍କୁ ନିର୍ଦ୍ଦେଶ ଦେଇଥିଲେ । କିନ୍ତୁ ନିର୍ଦ୍ଦେଶ ପରେ ଅସମ୍ପୂର୍ଣ୍ଣ ସୂଚନା ପ୍ରଦାନ କରାଯାଇଥିଲା ଏବଂ ପୂର୍ବରୁ ଜମା ହୋଇଥିବା ୬୦ ଟଙ୍କା ଆବେଦନକାରୀଙ୍କୁ ଫେରସ୍ତ ହୋଇ ନ ଥିଲା। ଫଳରେ ଏ ନେଇ ଆବେଦନକାରୀ ୧.୭.୨୦୨୪ରେ ଆଇନଗତ କାର୍ଯ୍ୟାନୁଷ୍ଠାନ ସହ କ୍ଷତି ପୂରଣ ପ୍ରଦାନ ନିମନ୍ତେ ଅପିଲେଟ ଅଧିକାରୀ ତଥା ଏଡିଏମଙ୍କୁ ଲିଖିତ ଭାବେ ପ୍ରାର୍ଥନା କରିଛନ୍ତି।
