ଭୁବନେଶ୍ୱର,୫ା୧(ରବିନାରାୟଣ ଜେନା):ରାଜ୍ୟ ସରକାରଙ୍କ ପକ୍ଷରୁ ବଜେଟରେ ଯେଉଁ ଅର୍ଥ ଭିତ୍ତିଭୂମି ତଥା କାର୍ଯ୍ୟକ୍ରମ ବାବଦରେ ରଖାଯାଉଛି ତାହାକୁ ତ୍ୱରିତ ଭାବରେ ଖର୍ଚ୍ଚ କର। ଏହାସହିତ ଇଂଲିଶ ନୂଆବର୍ଷଠାରୁ ଯେତେସବୁ ବିଭାଗୀୟ ନିଯୁକ୍ତି ପରୀକ୍ଷା ହେବ, ସେଥିରେ ଯେଭଳି କୌଣସି ତ୍ରୁଟି ନ ହେବ ସେଥିପାଇଁ ଉପଯୁକ୍ତ ପଦକ୍ଷେପ ଗ୍ରହଣ କରିବାକୁ ମୁଖ୍ୟ ଶାସନ ସଚିବ ଅନୁ ଗର୍ଗ ସମସ୍ତ ସଚିବଙ୍କୁ କଡ଼ା ନିର୍ଦ୍ଦେଶ ଦେଇଛନ୍ତି। ଜାନୁଆରୀ ପହିଲାରେ ଲୋକସେବା ଭବନରେ ଅନୁଷ୍ଠିତ ସଚିବସ୍ତରୀୟ ବୈଠକରେ ମୁଖ୍ୟ ଶାସନ ସଚିବ କହିଛନ୍ତି, ଅଦ୍ୟାବଧି ଯେଉଁସବୁ ବିଭାଗର କମ୍ ଖର୍ଚ୍ଚ ହୋଇଛି ତାହା କିଭଳି ତ୍ୱରାନ୍ବିତ ହୋଇପାରିବ ସେଥିପ୍ରତି ଗୁରୁତ୍ୱ ଦିଅ।
ଏହି ଅବସରରେ ମୁଖ୍ୟ ଶାସନ ସଚିବ ଗର୍ଗ ଉନ୍ନୟନ ଆୟୁକ୍ତ ଏବଂ ଅର୍ଥ ବିଭାଗ ପ୍ରମୁଖ ସଚିବଙ୍କୁ ଏକ ବିଶେଷ ପରାମର୍ଶ ଦେଇଛନ୍ତି। ମୁଖ୍ୟ ସଚିବ କହିଛନ୍ତି, ରାଜ୍ୟର ପ୍ରମୁଖ ୧୦ଟି ବିଭାଗର ଖର୍ଚ୍ଚ କେତେ ହୋଇଛି ଏବଂ ଏହା କିଭଳି ଆଗକୁ ତ୍ୱରାନ୍ବିତ ହୋଇପାରିବ ତାହାକୁ ନିୟମିତ ଭାବେ ସମୀକ୍ଷା କରିବେ। ସେହିପରି ଜାନୁଆରୀ ୨୯ରେ ବିଶ୍ୱବ୍ୟାଙ୍କ ପ୍ରେସିଡେଣ୍ଟ ଓଡ଼ିଶା ଗସ୍ତରେ ଆସିବାର କାର୍ଯ୍ୟକ୍ରମ ରହିଛି। ଏଥିପାଇଁ ଶିଳ୍ପ ବିଭାଗ ସ୍ବତନ୍ତ୍ର ପ୍ରସ୍ତୁତି କରିବାର ଆବଶ୍ୟକତା ରହିଛି। ଏହାସହ ଜାନୁଆରୀ ୨୬ରେ ହେବାକୁଥିବା ସାଧାରଣତନ୍ତ୍ର ଦିବସ ଲାଗି ପ୍ରସ୍ତୁତି କରିବାକୁ ମୁଖ୍ୟ ସଚିବ ପରାମର୍ଶ ଦେଇଛନ୍ତି।
ମୁଖ୍ୟ ସଚିବ ସମସ୍ତ ବିଭାଗକୁ ଏକ ବିଶେଷ ନିର୍ଦ୍ଦେଶ ଜାରି କରି କହିଛନ୍ତି, ଏଣିକି କୌଣସି ବିଭାଗର ନିଯୁକ୍ତି ପରୀକ୍ଷାବେଳେ ଯେପରି ତ୍ରୁଟିବିଚ୍ୟୁତି ଦେଖା ନ ଦେବ ସେଥିପ୍ରତି ଗୁରୁତ୍ୱ ଦିଅ। ଯଦି କୌଣସି ପରିସ୍ଥିତିରେ ପରୀକ୍ଷା ବେଳେ ପ୍ରଶ୍ନପତ୍ର ଲିକ୍ କିମ୍ବା ଅନ୍ୟାନ୍ୟ ଅଭିଯୋଗ ଆସିବ ତାକୁ ସରକାର ବରଦାସ୍ତ କରିବେ ନାହିଁ। ଏହାର ସମ୍ପୂର୍ଣ୍ଣ ଦାୟିତ୍ୱ ସାଧାରଣ ପ୍ରଶାସନ ଏବଂ ଗୃହ ବିଭାଗ ନେବାକୁ ମୁଖ୍ୟ ସଚିବ କହିଛନ୍ତି। ସେହିପରି ପ୍ରତ୍ୟେକ ବିଭାଗର ସଚିବମାନେ କାର୍ଯ୍ୟାଳୟରେ ଆଇଟି ଭିତ୍ତିଭୂମି କିଭଳି ସୁଦୃଢ଼ ହେବ, ସେଥିପ୍ରତି ଗୁରୁତ୍ୱ ଦେବେ। ଯାହାଦ୍ୱାରା କାର୍ଯ୍ୟରେ ସ୍ବଚ୍ଛତା, ଦକ୍ଷତା ରହିବା ସହ ସାଧାରଣ ଲୋକେ ଉତ୍ତମ ସେବା ପାଇପାରିବେ।
ବୈଠକର ସୂଚନା ଅନୁଯାୟୀ, ଭିତ୍ତିଭୂମି ତଥା କାର୍ଯ୍ୟକ୍ରମ ବାବଦ ଖର୍ଚ୍ଚରେ ପ୍ରାୟ ୧୦ଟି ବିଭାଗ ପଛରେ ପଡ଼ିଛି। ସେଥିମଧ୍ୟରେ ଯୁବ ଓ କ୍ରୀଡ଼ା ବିଭାଗର ଖର୍ଚ୍ଚ ସବୁଠାରୁ ନୈରାଶ୍ୟଜନକ। ଏହି ବିଭାଗ ୨୦୨୪-୨୫ ଆର୍ଥିକ ବର୍ଷରେ ୯.୮୮ପ୍ରତିଶତ ଖର୍ଚ୍ଚ କରିଥିବାବେଳେ ୨୦୨୬-୨୭ରେ ମାତ୍ର ୫.୬୭ପ୍ରତିଶତ ଡିସେମ୍ବର ୨୦୨୫ ସୁଦ୍ଧା ଖର୍ଚ୍ଚ କରିଛି। ସେହିପରି ଇସ୍ପାତ ଓ ଖଣି ବିଭାଗ ୭.୭୨ ପ୍ରତିଶତ ଖର୍ଚ୍ଚ କରିଥିବାବେଳେ ସାଧାରଣ ଉଦ୍ୟୋଗ ୩.୫୫% ଖର୍ଚ୍ଚ କରିଛି। ସରକାରଙ୍କ ନିୟମ ଅନୁଯାୟୀ, ଡିସେମ୍ବର ସୁଦ୍ଧା ବଜେଟରେ ପ୍ରାବଧାନ ହୋଇଥିବା ଟଙ୍କାର ୬୦ପ୍ରତିଶତ ଅର୍ଥ ଖର୍ଚ୍ଚ ହେବାକଥା। ଏହି ଦୃଷ୍ଟିରୁ ବିପର୍ଯ୍ୟୟ ଓ ପରିଚାଳନା ବିଭାଗ ସର୍ବାଧିକ ୯୯.୧୪ପ୍ରତିଶତ ଖର୍ଚ୍ଚ କରିଥିବାବେଳେ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ ୭୮.୬୯ପ୍ରତିଶତ ଅର୍ଥ ଖର୍ଚ୍ଚ କରିଛି। ସେହିପରି ସରକାରଙ୍କ ଲକ୍ଷ୍ୟଧାର୍ଯ୍ୟଠାରୁ ଆଗରେ ମତ୍ସ୍ୟ ଓ ପଶୁସମ୍ପଦ, ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତୀକରଣ ବିଭାଗ ୭୦ରୁ ୭୫ ପ୍ରତିଶତ ପର୍ଯ୍ୟନ୍ତ ବଜେଟ ଅର୍ଥ ଖର୍ଚ୍ଚ କରିଥିବା ମୁଖ୍ୟ ଶାସନ ସଚିବଙ୍କ ବୈଠକରୁ ଜଣାପଡ଼ିଛି।
Dharitri – Odisha’s No.1 Odia Daily
